O le ā le Ituaiga o Agaga o E Faaalia?
1 Na faaiu e Paulo lana tusi i le faapotopotoga i Filipi i le apoapoaiga lenei: “Ia iai le alofa tunoa o le Alii o Iesu Keriso i le agaga ua outou faaalia.” (Fili. 4:23, NW) Sa ia faamālō i a i latou ona o lo latou naunau moni i le talaʻiina o le tala lelei, faapea foi ma lo latou lava manatu mamafa ma le alofa mo le lelei o isi.—Fili. 1:3-5; 4:15, 16.
2 E ao ona avea ma ō tatou faanaunauga le faaalia o lea lava agaga i la tatou faapotopotoga. Pe a faaalia e tagata uma le maelega, agalelei, ma le agaga talimalo, o le a atiina aʻe ai i lenei mea se agaga o le a mafai ona vaaia e ē o matamata mai. O se agaga mautinoa ma le alofa, e aumaia ai le autasi ma agaigai ai i luma faaleagaga. (1 Kori. 1:10) O se agaga lē mautinoa, e aumaia ai le lotovaivai ma le faalotolotolua.—Faaa. 3:15, 16.
3 Ia Taimua le ʻAu Toeaina: Ua iai i toeaina se tiute tauave o lo latou faatumauina lea o se agaga mautinoa i a i latou lava, faapena ma totonu o ā latou faapotopotoga. Aisea? Auā e ono mafai ai ona taaina le faapotopotoga i ō latou uiga ma amioga. Tatou te talisapaia le iai o ni toeaina o ē o loo maelega i le auaunaga i le fanua, o ē o loo latou faafeiloaia maia i tatou ma le laumata fiafia, ma i ni uiga mafana, ma upu agalelei, ma o ni ē e mautinoa ma e atiina aʻe ai i ā latou fautuaga, e tusa pe tuuina mai taitoatasi, pe fai mai i luga o le pulelaa.—Epe. 13:7.
4 O le mea moni, e ao i a i tatou uma lava ona faia la tatou vaega, ina ia fealofani ai le faapotopotoga, talimalo, maelega, ma ia faamuamua mea faaleagaga. E mafai e i tatou taitoatasi ona faaalia le alofa mafana i a tatou aufaatasiga ma isi. (1 Kori. 16:14) E lē tatau ona iai se faaeseesega o tausaga, lanu, aʻoaʻoga, po o tulaga tau tamaoaiga i a i tatou. (Faatusatusa i le Efeso 2:21.) Ona o lo tatou faamoemoe, e mafai ai ona tatou faaalia le agaga o le olioli, limafoai, talimalo, ma le maelega i le faiva.—Roma 12:13; Kolo. 3:22, 23.
5 O i latou uma e auaufaatasi ma i tatou, e aofia ai ma ē fou, e tatau ona tausia ina ia maua e i latou le faalogona talileleia, ma ia logo i tino le alofa ma le tuutoina o le auuso. E ala i la tatou faiva ma le faaalia o uiga lelei faa-Kerisiano, ua tatou faamaonia atu ai e faapea o le faapotopotoga o “le poutu . . . ma le lagolago o le upu moni.” (1 Timo. 3:15) Ua tatou tofo foi i le saogalemu faaleagaga e ala i “le filemu mai le Atua” lea e leoleoina ai o tatou loto ma mafaufau. (Fili. 4:6, 7, NW) Tau ina ia tatou taumafai uma lava ma le filigā e faaalia le ituaiga o agaga o le a faamautinoaina ai lo tatou olioli i le alofa tunoa o Ieova e ala i le Alii o Iesu Keriso.—2 Timo. 4:22.