Faia Mea Uma Lava ia Viia ai le Atua
1 Maeu se faafouina ai i le ʻauʻau faatasi ma o tatou uso ma tuafāfine pele! (1 Kori. 16:17, 18) E tatou te faia lenei mea i sauniga, i fonotaga, i tauaofiaga, ma i le faiva i le fanua. I nisi taimi, tatou te ʻauʻau faatasi faasamasamanoa ai foi, e pei o le taimi e asiasi mai ai ni mālō i lo tatou aiga. O le faia faapea, e tatou te faaalia ai le agaga talimalo ma faalaeiau ai e le tasi le isi. (Roma 12:13; 1 Pete. 4:9) Pe a fuafuaina ni sauniga o ni faaipoipoga, ia teu mau i loto le fautuaga matagofie i le Watchtower o Aperila 15, 1984.
2 Faatasitasiga Faitele Saunia Lelei: Pe tatou te “aai, pe [tatou] te inu, po o se tasi mea,” e tatau ona tatou “faia mea uma lava ia viia ai le Atua.” (1 Kori. 10:31-33) E lē o utagiaina e isi lenei fautuaga, ma ua faaauau ai pea ona tutupu faafitauli ona o le toatele o faatasiga faitele, e matuā faigata ai ona vaavaaia lelei. I nisi o tulaga, e faitau selau tagata ua valaaulia i faatasiga lē pulea lelei, e faia ai faafiafiaga faalelalolagi. I nisi taimi, o i latou e auai ua talosagaina ina ia totogi ni tupe e ulu ai, po o nisi foi tupe totogi. O na faatasiga ua atagia lelei ai faatasitasiga a le lalolagi, le agaga lea e feteenai ma tulaga maopoopo faapea ma mataupu silisili o le Tusi Paia.—Roma 13:13, 14; Efe. 5:15-20.
3 Ua lipotia mai e faapea, e iai se vaega e toatele o Molimau ua faapotopoto faatasi i fale totogi i mea e faia ai faafiafiaga lē mamā ma faalelalolagi, ma ua leai ai se vaavaaiga lelei. Ua iai foi ni mea faapena ua faasalalauina o ni faatasitasiga i faaiuga o vaiaso a “Molimau a Ieova” ua faia i fale talimalo ma nofoaga mo maimoaga. Talu ai ona o le faigata ona pulea lelei o ni faatasitasiga tetele faapena, ua tutupu ai faafitauli. I nisi taimi, ua iu ai i le faia o amioga paʻaʻā ma le lē pulea, le inu tele i le ʻava malosi, ma oo ai ina faia amioga lē mamā i nisi taimi. (Efe. 5:3, 4) O faatasitasiga faitele e faia ai na amioga, e lē viia ai Ieova. E nai lo o lea, ua faalumaina ai le igoa lelei o le faapotopotoga ma ua tausuai ai nisi.—1 Kori. 10:23, 24, 29.
4 Ua faalaeiauina Kerisiano ina ia faaalia le agaga talimalo, ae e tatau ona taulai atu i le faatāuaina o feofoofoaiga faaleagaga. (Roma 1:11, 12) E masani lava ona sili ona lelei nai faatasitasiga toaitiiti. Ua faapea mai la tatou tusi Our Ministry i le itulau e 135-136: “I nisi taimi, e mafai ai ona valaaulia ni nai aiga i se fale mo se faatasiga a le auuso Kerisiano. . . . E talafeagai ai la ia i latou o talimalo i na tulaga, le tatau ona iloa o ia totino lava e iai le matafaioi o le vaavaaia o le faatasiga. I le manatua o lenei mea, ua iloa ai e Kerisiano faautauta le atamai o le faatapulaaina o le aofaiga o na faatasiga ma le umi o le taimi e faia ai.” Na taʻua e Iesu e faapea, e leai ni tapenaga sasalu e manaomia pe afai o lo tatou sini o le faalaeiauina faaleagaga o a tatou uo.—Luka 10:40-42.
5 O se mea lelei le faaalia o le agaga talimalo i uso Kerisiano. Ae peitai, e iai se eseesega tele o faatasiga pulea lelei i o tatou aiga ma se faatasiga tele e faaalia ai le agaga o le lalolagi i se fale totogi. Afai e te valaaulia nisi e avea ma au mālō, e ao lava ona e mautinoa, e mafai ona e pulea atoatoa le faatasiga o loo faia.—Tagai i le Watchtower o Aokuso 15, 1992, itulau e 17-20.
6 E moni, ua faamanuiaina i tatou e Ieova i se auuso lea tatou te maua mai ai faalaeiauga e faafouina ai, lea ua uunaia ai i tatou ina ia faaauau i galuega lelei. (Mata. 5:16; 1 Pete. 2:12) O le faaalia o le pulea ma le magafagafa i faatasiga faitele, tatou te avatu ai pea le viiga i lo tatou Atua ma atiina aʻe ai foi isi.—Roma 15:2.