O le Auai e Lē Aunoa i Sauniga—E Tāua Tele mo le Faatumauina o i Tatou
1 Na uunaia i tatou e le aposetolo o Paulo ina ia tumau ona tatou “faamaoni [“malolosi,” NW] i le faatuatua.” (Tito 1:9, 13) I sauniga a le faapotopotoga, tatou te talanoaina ai manatu e atoatoa ona mamā, ma e faatonuina ai i le auala e faaofuina atoatoa ai i tatou i le ofu tau faaleagaga ina ia mafai ai ona tatou “tetee atu i togafiti a le tiapolo.”—Efe. 6:11; Fili. 4:8.
2 Ua Saunia e Sauniga Mea o Tatou Manaomia: O le auai e lē aunoa i sauniga a le faapotopotoga, e matuā tatau mo le faatumauina ai o i tatou. (1 Kori. 16:13) I sauniga, e ofoina atu ai tatalo e faafetai ma vivii atu ai i le Atua, ma talosaga atu ai foi ia te ia e fai ma sui o le faapotopotoga ma ona manaoga. (Fili. 4:6, 7) O le aufaatasi ai i viiga o le Malo e faagaeetia ai i tatou e faailoa atu o tatou manaoga ma faalogona a o tatou tapuai atu ia Ieova. (Efe. 5:19, 20) O a tatou mafutaga faaleauuso i le Maota o le Malo a o lei amataina ma pe a uma sauniga, e faamalosia ai i tatou, atiina aʻe ai, ma faafouina ai i tatou.—1 Tesa. 5:11.
3 Ia Aperila na seʻi mavae atu, na faia ai le lauga faapitoa e faapea, “Ua Lata Mai le Iuga o Lotu Sese,” na matuā tamau ai i mafaufau o i latou e alolofa i le upu moni, le faanatinati ona faia loa o se gaoioiga ina ia ō ese mai ia Papelonia le Aai Tele. (Faaa. 18:4) Ia Iuni ma Iulai, na matuā faagaeetia ai ina ua suesueina mataupu e tolu mo suesuega i Le Olomatamata e uiga i faasusuluina mai o le malamalama ua faamalamalamaina ai le ala o ē amiotonu! (Faata. 4:18) Seʻi manatu i mea semanū tatou te misia pe ana tatou lafoaiina le auai i na sauniga.
4 I la tatou Tauaofiaga Itumalo, “O Ē Vivii ma le Olioli,” na faamamafa ai le manaoga mo le aʻoaʻoga lea e faaleleia ai la tatou faiva. E pei ona faasino mai e le tusi Organized to Accomplish Our Ministry i le itulau e 72 e faapea, o le Aʻoga o le Faiva Faatiokarate, o se sauniuniga mo le faaauauina pea o le aʻoaʻoina o le faapotopotoga atoa. I le taimi nei, o le tasi o vala o le polokalame ua fesoasoani ia i tatou ia faamasani lelei ai i le talafaasolopito o le faalapotopotoga i ona po nei, o le faaaogaina lea o le tusi Proclaimers. E lē tatau ona tatou misia lenei avanoa e aʻoaʻoina ai.
5 O la tatou Sauniga o le Auaunaga, e faaauupegaina ai i tatou ina ia atili ai ona uigā i le faiva. Na faataʻitaʻia lenei mea i le sauniga lea na faatonuina ai i tatou ina ia faia se sao i le tufatufaina atu i le lalolagi aoao o le Tala o le Malo Nu. 34. Sa anoanoai faamanuiaga a Ieova i lenei galuega, e pei ona vaaia i iuga sili ona lelei ua iai i le lalolagi aoao. (Faatusatusa i le 2 Korinito 9:6, 7.) O i latou e auai e lē aunoa i sauniga, na faalaeiauina ai, ma na latou fesoasoani foi e uunaia le lagolagosua na tuuina atu i le tauiviga.
6 I le Suesuega Tautusi a le Faapotopotoga, ua faamaualugaina ai lo tatou lagona o le faanatinati e ala i mea ua tatou aʻoaʻoina mai le Afioga a le Atua, faatasi ma le fesoasoani o le tusi, Autasia i le Tapuaiga Moni. Ona o le saoasaoa o le agaʻi i luma o mea tutupu i le lalolagi, e manaomia ai ona tatou malamalama i le faataunuuga o valoaga sili ona loloto o le Tusi Paia.
7 Faamuamua le Auai e Lē Aunoa i Sauniga: I le tele o atunuu o loo pagatia ai o tatou uso i tofotofoga, e tumau pea ona latou iloa le matuā tāua mo i latou o le faapotopoto faatasi i vaiaso taitasi. Mo se faaaoaoga, i Burundi, Rwanda, Liberia, Bosnia ma Herzegovina, e matuā toatele ai tagata fou e auai i sauniga, pe faalua pe faatolu ona sili atu ai nai lo o le aofai o le au talaʻi e auai. I lenei auala ua fesoasoani ai Ieova i uso ina ia tutū mausalī i le loto e tasi.—Fili. 1:27; Epe. 10:23-25.
8 O nisi o ē atonu ua tuulafoaiina le auai e lē aunoa i sauniga, e tatau ona faia nei loa ni laasaga ina ia faaleleia ai lea itu. (Fai. 4:9-12) Ina ia tutū mausalī, e manaomia ona tatou fefaamafanafanai ma ē taumatuaina, e pei ona maua i le auai e lē aunoa i sauniga.—Roma 1:11.