Vivii ia Ieova i Lea Aso ma Lea Aso
1 O lo tatou Atua o Ieova, o Lē na Foafoaina Mea e mamana ma alofa, o le Puna o ola uma lava ma le fiafia. I le manatu i lona silisili ese, ua tatau moni ai i ana foafoaga uma ona vivii atu ia te ia. Ua taitoatasi ai ona tatou mananao e faapea atu e pei ona faia e le faisalamo: “Ma aʻu toe faaopoopoina atu i ou viiga uma lava. E taʻutaʻu atu i loʻu gutu le amiotonu mai ia te oe, e taʻutaʻu foi le olataga mai ia te oe i aso uma lava.” (Sala. 71:14, 15) Ina ia faia faapea, e tatau ona tatou sailia auala e vivii atu ai ia Ieova i lea aso ma lea aso ma ia uunaia ai e tautala e uiga i ona lelei, lana amiotonu, ma ana sauniuniga mo le faaolataga.
2 Ua faataatia e uluai Kerisiano se faaaoaoga lelei i le vivii atu ia Ieova. I le faasino atu i le 3,000 na papatisoina i le aso Penetekoso, ua tatou faitau ai i le Galuega 2:46, 47 e faapea: “Ua latou i ai pea ma le loto gatasi i le malumalu i lea aso ma lea aso, . . . ua latou vivii atu i le Atua, ma ua alofaina e le nuu uma lava. . . . [Ma] ua faaopoopoina i le ekalesia e le Alii [“Ieova”] i aso fai soo o e ua faaolaina.” Na latou aʻoaʻoina upu moni ofoofogia e uiga ia Ieova ma lana Mesia. Na salalau atu lo latou olioli, na faalaeiauina ai pea isi ina ia faalogo ma aʻoaʻoina ma vivii atu ai ia Ieova.
3 E Maua Pea Avanoa i Aso Uma: I aso nei, e toatele ua latou iloa e faapea, e mafai ona latou vivii atu ia Ieova i aso uma e ala i le molimau atu lē fuafuaina. O le muai faia o ni sauniuniga ua fesoasoani ia i latou ina ia fua tele mai. O se tuafafine o lē na fuafua e faia sona sao i se talaʻiga lē fuafuaina, na iloa ua tataʻe e se tagata ni faamalama se lua o lana taavale ma oso i totonu. Na telefoni atu o ia i se fale inisinia, ma sauniuni loa e molimau atu i le tamaloa na faia le galuega. O lana sauniuniga sa aofia ai ma lona tatalo atu mo le taʻitaʻiga a Ieova. Na iu i lona molimau atu i le tamaloa mo se itula ma tuuina ai loa le tusi, Ola e Faavavau.
4 Sa masani foi ona feiloai se tasi tuafafine ma se tuaoi, a o la ō e faasavalivali a la taifau. I se tasi feiloaiga, na faia ai sa la talanoaga uigā i faafitauli o le olaga, ma na iu ai i nisi talanoaga atili. Na oo ina amataina ai se suesuega faale-Tusi Paia. O le mea mālie, na tautino atu mulimuli ane e le tuaoi e faapea, semanū e lē tāitāi ona ia faalogo i Molimau a Ieova pe a ō mai i lona fale, ona sa lē talitonu o ia i le Atua po o le Tusi Paia.
5 Na mafai foi e nisi ona molimau atu pe a ō atu i o latou fale ni tagata faatau oloa po o nisi. Na asiasi atu i le fale o se tuafafine i Aialani se tamaloa na te faatauina atu inisiua mo ola o tagata. Sa faamatala atu e le tuafafine e faapea, o loo ia vaavaai atu i luma e olioli i le ola e faavavau. O lenei manatu, sa matuā fou lava i le tamaloa, o lē sa ola aʻe o se Katoliko Roma. Na ia talia le tusi Ola e Faavavau, auai i se sauniga i le vaiaso na sosoo ai, ma na ioe e faia se suesuega faale-Tusi Paia. Ua avea nei lenei tagata faaali oloa ma uso papatisoina.
6 E tatau ia i tatou uma lava ona mataʻalia mo avanoa e vivii atu ai ia Ieova i aso uma lava. E fesoasoani tele le tuuina o ni nai mekasini po o ni sāvali i se mea e faigofie ona iloa ai ma sauni ai e ofo atu i tagata e asiasi mai. I nisi vaipanoa, o le faaalu o sina taimi puupuu e nofonofo ai i se nofoa i se pāka, e mafai ona e maua ai ni nai avanoa e molimau atu ai i isi o ē o loo faia ai sina mālōlōga puupuu iina. O nisi Molimau talavou i le aʻoga e latou te tuua lomiga faale-Tusi Paia i luga o a latou kesi e avea o se auala e faamaʻite ai se talanoaga ma se tasi e na te mātauina ma lagā ai ni fesili. Ia manatua se mau se tasi pe lua e mafai ona e faaaogā. Tatalo ia Ieova ina ia fesoasoani ia te oe. O lou faia faapea, o le a faamanuiaina ai oe.—1 Ioa. 5:14.