Pusa Fesili

◼ O le ā le faaaogaina saʻo o upu ia o le “uso” ma le “tuafafine”?

Pe a faaaogā i lona tulaga moni, o ia upu o le “uso” ma le “tuafafine” e faasino i tagata e tutusa mātua. O lenei faiā faalesoifuaga e masani ona maua ai se fesootaiga mafana, ma o lagona vavalalata o loo iai i ia tagata ua faamalosia atili e le faifaimea faatasi, e siomaga i mea e nonofo ai ma o latou tulaga tau faalogona.

Na aʻoaʻo e Iesu ona soo ina ia faapea atu ia Ieova i le tatalo, “Lo matou Tamā e.” O le faaaogaina o lena faaupuga ua faailoa ai e faapea, ona o i tatou o Kerisiano, ua avea uma ai i tatou ma vaega o se auaiga mafana lea tatou te olioli ai i se faiā faaoaina faaleagaga. Na faamamafa atili e Iesu lenei mea ina ua ia taʻu atu i ona soo e faapea “o outou uma o le au uso.”—Mata. 6:9; 23:8.

Ona o lo tatou noataga mafana faaleagaga i totonu o le auaiga o le Atua, tatou te faapea atu ai o le tasi i le isi, “Uso” ma “Tuafafine,” ae maise lava i sauniga a le faapotopotoga. I ia faatasiga faaleagaga, o lē e taʻimua i sauniga e na te faailoaina mai tagata taitoatasi ua papatisoina i le faaaogaina o le faaupuga “uso” po o le “tuafafine” ma mulimuli mai ai le igoa o le tagata o taʻua.

Ae faapefea pe afai ua manao se tagata e lei papatisoina e fai se sao i le sauniga? Pe afai ua auaufaatasi se tagata mo se taimi umi ma tagata o Ieova ma ua agaʻi atu i le tuuina atu, ma manatu ia te ia lava o se tasi o Molimau a Ieova, e leai la se mea o iai i le taʻua o lona igoa faatasi ma le “Uso” po o le “Tuafafine.” O le a sili atu ona fetaui lelei le taʻua faapea pe afai ua avea le tagata o se tagata talaʻi e lei papatisoina.

Ae ua iai tagata fiafia e lei leva ona amata auai i a tatou sauniga e lei faia ni laasaga e iloa ai o i latou o se vaega o le auaiga o le Atua. O le a lē taʻua atu la ia i latou na e faapea o se “Uso” po o se “Tuafafine,” talu ai e lē o aofia i latou i lea faiā faaleagaga o le aiga o le Atua. I taimi la o sauniga, e tatou te taʻua ai ma le faaaloalo i latou, i le faaaogaina o se taʻu talafeagai e pei o le “Alii” ma le “Tamaitai” faatasi ma o latou igoa.

O le faaaogaina o faaupuga “uso” ma le “tuafafine” i a tatou sauniga a le faapotopotoga e faaalia ai se fusi e sili atu ona vavalalata ma sili atu ona tautele nai lo so o se isi lava noataga e faaalia mai i le na o le faaaogaina o igoa totino. Ua faamanatu mai ai ia i tatou le faiā faamanuiaina tele o loo tatou olioli ai o se aiga faaleagaga i le Tamā e toatasi, o Ieova le Atua. Ua faamanatu mai ai foi ia i tatou le alofa loloto ma lagona mafana ua ia i tatou mo le tasi i le isi.—Efe. 2:19; 1 Pete. 3:8.