Savavali i le Faatuatua

¹ E faitau miliona tagata o loo faaautū o latou olaga i a latou mea faitino, i le faatuatua ma le valea i le mana taufaasese o le oa. (Mata. 13:22) Ua latou aʻoaʻoina le moni o lenei mea pe a leiloa pe gaoia a latou oa, pe iloa foi le itiiti o se aogā ia i latou. Ua uunaia i tatou ina ia tuliloa se auala e sili atu ona atamai, o le tauivi lea mo oa faaleagaga. (Mata. 6:19, 20) E aofia ai i lenei mea le ‘savavali i le faatuatua.’—2 Kori. 5:7.

² O le upu “faatuatua” ua faaliliuina mai i le upu Eleni o loo faaalia ai le manatu, o le mautinoa, faatuatuaina, talitonu maumauai. O le savavali i le faatuatua, o lona uiga, o le faafesagaia lea o tulaga faigata faatasi ma le mautinoa i le Atua, e faatuatua i lona tomai e taitaiina ai o tatou laasaga, ma lona finagalo malie e tausia o tatou manaoga. Na faataatia e Iesu se faaaoaoga lelei atoatoa; sa ia taulai atu pea i mea sa tāua moni lava. (Epe. 12:2) E faapena foi i tatou, e manaomia ona taulai atu pea o tatou loto i mea faaleagaga e lē vaaia. (2 Kori. 4:18) E tatau ona tatou mataala pea e uiga i le lē mautinoa o lenei olaga o loo tatou ola ai ma iloa lelei lo tatou faalagolago atoatoa atu ia Ieova.

³ E tatau foi ona tatou matuā mautinoa o loo taʻitaʻia i tatou e Ieova e ala i lana faalapotopotoga vaaia i lalo o le faatonutonuga a “le auauna faamaoni ma le mafaufau.” (Mata. 24:45-47) E faaalia lo tatou faatuatua pe afai tatou te ‘usiusitai ia i latou o taʻimua’ i le faapotopotoga. (Epe. 13:17) O le galulue ma le lotomaulalo i le felagolagomai ma faatulagaga faatiokarate ua faaalia ai lo tatou faatuatua ia Ieova. (1 Pete. 5:6) E tatau ona uunaia i tatou e lagolagosua ma le loto atoa le galuega ua tuuina atu i le faalapotopotoga e faia. O le a tosina vavalalata ai i tatou e lenei mea i o tatou uso i se fusi malosi o le alofa ma le autasi.—1 Kori. 1:10.

⁴ Le Auala e Faamalosia ai le Faatuatua: E lē tatau ona tatou faatagaina lo tatou faatuatua e tumau i se mea e tasi. E manaomia ona tatou taumafai malosi ina ia faamalosia lo tatou faatuatua. O le faia e lē aunoa o suesuega, tatalo, ma le auai i sauniga, o le a fesoasoani ia i tatou e faamalosia ai lo tatou faatuatua, ina ia mafai ai e ala i le fesoasoani a Ieova, ona tetee atu i so o se tofotofoga. (Efe. 6:16) Po o e faia se faasologa lelei mo le faitauina o le Tusi Paia i aso taitasi, ma sauniuni mo sauniga? Pe e masani ona e manatunatu loloto i mea ua e aʻoaʻoina, ma pe e te faalatalata atu ia Ieova i le tatalo? Po o lau masani ea le auai i sauniga uma lava ma faia ai se sao pe a maua se avanoa?—Epe. 10:23-25.

⁵ O le faatuatua malosi, e faamaonia i galuega lelei. (Iako. 2:26) O le tasi o auala e sili ona lelei e faaalia ai lo tatou faatuatua, o le faalauiloa atu lea o lo tatou faamoemoe i isi. Pe e te sailia ni avanoa e tufa atu ai le tala lelei? Pe e mafai ona fetuutuunai ou tulaga ina ia mafai ai ona e faateleina se sao i le faiva? Pe e te faatatauina fautuaga o loo tatou maua ina ia faaleleia ai le uigā ma le aogā o la tatou faiva? Pe e te faataatitia ni sini totino faaleagaga ma taumafai malosi ina ia e ausia?

⁶ Na lapatai mai Iesu e faatatau i le soona faaaafia i mea o le olaga i aso faisoo ma faatagaina ai le tuinanau i mea faitino ma le manatu faapito e faanenefu ai la tatou vaai faaleagaga. (Luka 21:34-36) E tatau ona tatou vaavaai totoʻa pea i le auala o tatou savavali ai ina ia alofia ai mea e faavaatuʻia ai lo tatou faatuatua. (Efe. 5:15; 1 Timo. 1:19) Ua ia i tatou uma lava le faamoemoe e faapea, i se taimi mulimuli, o le a mafai ai ona tatou folafola atu e faapea ua tatou ‘tau le taua lelei, ua iu le tausinioga, ma ua tausia le faatuatua.’—2 Timo. 4:7.