Ia Talaʻi le Malo
1 I le Eperu 10:23, ua uunaia ai i tatou ina ia “taofi mau ia i le faamoemoe ua tatou taʻutino atu.” Ma o lo tatou faamoemoe o loo fitoitonu i le Malo o le Atua. Na poloai faapitoa lava Iesu e faapea, e tatau ona talaʻiina le tala lelei o le Malo i nuu uma lava. (Mare. 13:10) E manaomia ona teu lenei mea i o tatou mafaufau a o auai i la tatou faiva.
2 Pe a tatou faafeiloai atu i tagata, tatou te taumafai lava e amata se talanoaga e uiga i se mea o latou naunau po o manatu mamafa i ai. E masani lava ona tatou taʻua mea e latou te iloa lelei, e pei o solitulafono i tuaoi, o faafitauli o tagata talavou, o popolega e uiga i mea e ola ai, po o tulaga faigata i mataupufai a le lalolagi. Talu ai o loo taulai atu manatu o le toatele o tagata i nei ‘popolega o le olaga,’ pe a tatou faaalia le manatu mamafa ma malamalama, e masani lava ona faailoa mai e tagata mea o i o latou mafaufau. (Luka 21:34) E ono mafai e lenei mea ona tatala ai le ala mo i tatou e tufa atu ai lo tatou faamoemoe.
3 Ae peitai, afai tatou te lē faaeteete, e mafai ona see atu le talanoaga i mea e lē mautinoa ma oo ai i se tulaga ua tatou lē taulau ai i le faataunuuina o le fuafuaga o la tatou asiasiga—o le talaʻia o le feau o le Malo. E ui lava ina tatou faauaʻi manatu i tulaga leaga o loo aumaia ai le tele o mafatiaga, ae o lo tatou sini o le tataʻi lea o manatu i le Malo, lea o le a iu ina foiaina faafitauli uma o tagata. Ua ia i tatou se faamoemoe e matuā matagofie moni lava e tatau ona matuā mananao tagata e faalogo i ai. O lea, e ui lava atonu na tatou talanoa muamua i nisi o vala o nei “aso faigata,” ae tatau lava ona tatou vave tataʻi le manatu i la tatou feau autū, le “tala lelei e faavavau.” I lenei auala, o le a tatou faataulauina atoatoa ai la tatou faiva.—2 Timo. 3:1; 4:5; Faaa. 14:6.