Fesoasoani i Isi Ina ia Avea ma Soo o le Tagata Silisili
1 I le 1 Korinito 3:6, na tusi ai Paulo e faapea: “Na ou totōina, na faasūsūina e Apolo; a e peitai o le Atua ua faatupuina.” Sa faaaogaina e Paulo lenei faauigaga e fesoasoani ai i ona uso ina ia latou iloa le manaomia ona galulue autasi i le taitaiga o le tulaga ulu o Keriso. O le auala lava foi lenei na ia fesoasoani atu ai ia i latou ina ia talisapaia la latou vaega tāua i le galuega tāua o le totōina ma le faasūsūina.
2 O lena galuega faasaoola, e tatau ona faaiuina i nei lava aso. I le avea o ni Kerisiano tuuina atu, ua faia ai so tatou sao i le tiute tauave tāua o le fesoasoani atu lea i isi ina ia avea ma soo o Iesu. (Galu. 13:48) I le mafaufau atu i lena tofiga, ua tatou taulai atu ai i le faagalosoga o le masina o Tesema, lea e ofoina ai le tusi o Le Tagata Silisili o Ē Uma na Soifua Mai. Ona tatou mananao foi lea e toe tuliloaina le naunau fiafia lea sa mafai ona tatou faagaeeina e ala i le faaaogaina o le tusi. O nisi nei o faufautuaga atonu e te manao e faaaogā.
3 Pe a talanoa atu i se tagata matua, atonu o le a e faaupu atu i au lava upu faamatalaga nei:
◼ “E toatele o loo tau mānatu pe na faapeī lea tagata o Iesu a o ia soifua o le tagata i lenei lalolagi. O ā ni auala e te manatu na ese ai o ia mai isi tagata? [Faatali mo se tali.] O lenei tusi matagofie o Le Tagata Silisili o Ē Uma na Soifua Mai, ua faamatala mai ai mea mataina uma na tutupu i lona soifuaga ma lana faiva, ma o loo aumaia ai foi se malamalamaga manino i le ituaiga o tagata na iai o ia. Ina ua uma ona faitau i ai nisi, na latou lagona e peiseai sa latou maua se avanoa e auaufaatasi moni ai lava ma ia, ma tiga faatasi ma ia i ona puapuaga, ma muai molimauina lana faiva.” Ia faasino atu i le uluai ata i le tusi, lea o loo faamatilatila mai ai le matua. Ona suʻe lea i upu tomua, ma faitau le palakalafa lona lua i lalo o le tamai ulutala “Aogā o le Aʻoaʻoina e Uiga i a te Ia.” Afai e tali lelei mai, ia ofo loa le tusi.
4 Afai e te toe foi atu e asiasi i se tagata matua na talia le tusi, e mafai ona e faapea atu:
◼ “I le ta talanoaga talu ai, sa ta talanoa ai pe na faapeī Iesu Keriso a o avea ma tagata. Sa ou fiafia foi e tuu ia te oe le tusi o Le Tagata Silisili o Ē Uma na Soifua Mai. O le ā na sili ona e maofa ai e faatatau i aʻoaʻoga a Iesu ma ona uiga totino?” Faataga mo se tali mai. Suʻe i le mataupu e 113, ma talanoa i le faaaoaoga sili ona mataina a Iesu o le loto maulalo. Faitau le Filipi 2:8 e faaalia ai le manatu o le aposetolo o Paulo e faatatau i uiga loto maulalo o Iesu. E mafai loa ona e faamatala atu le auala e mafai ai ona aʻoaʻoina atili nisi mea e ala i se suesuega e lē aunoa o le Tusi Paia.
5 Pe a talanoa atu i se tagata mapo lotu, e mafai ona e fai atu se faamatalaga e pei o lenei:
◼ “O le vaitaimi foi lenei e mafaufau ai tagata ia Iesu. Ae peitai, ona o le tele naʻuā o mea leaga o loo tutupu i le lalolagi aoao, atonu ua tau mānatu ai nisi pe o manatu mamafa moni mai ea Iesu ia i tatou. O le ā sou manatu i lea mea?” Faatali mo se tali. Ia suʻe i le mataupu e 24 o le tusi o Le Tagata Silisili, ma talanoa puupuu le mafuaaga na afio mai ai Iesu i le lalolagi. Ona faitau lea o le Ioane 15:13, e faamamafa ai le alofa naunautai o Iesu mo isi. Ia manatua e ave ni mekasini fou, se polosiua, po o se sāvali talafeagai o loo maua ina ia ofo atu pe a lē talia le tusi.
6 Pe a toe asia se tagata mapo lotu, atonu e te manao e faaaogā le taulimaga lenei:
◼ “Sa ta talanoaina mea na faia e Iesu a o iai i le lalolagi lea e faaalia ai lona manatu mamafa moni mai ia i tatou. Faamata e te manatu o le ā le mea sili o le a ia faia ina ia maua ai se mapusaga e i latou o loo matuā mafatia?” Faataga mo se tali mai. Ia suʻe i le mataupu e 133, ma toe autalu faamatalaga i le palakalafa lona lima. Ia suʻe i le ata i le itulau o loo sosoo mai, ma faamatala foliga o mea o le a iai pe a faia le finagalo o le Atua i le lalolagi e pei ona faia ai i le lagi. Ia faasino atu i aogā e mafai ona maua pe a aʻoaʻoina atili nisi mea.
7 Pe a talanoa atu i se talavou po o se matua, e mafai ona e faapea atu:
◼ “O le toatele lava o talavou o loo vaavaai atu i ni tagata ua fai ma faaaʻoaʻoga e faataitai i ai, peitai ua ese le faigata ona mauaina ni tagata lelei. Na faataatia e Iesu Keriso le faaaoaoga ua atoatoa ona lelei mo tagata taitoatasi. [Faitau 1 Peteru 2:21.] O lona soifuaga atoa sa faataulai atu i le tapuaiga i lona Tamā faalelagi. O le ā sou manatu, e faapeī tulaga o mea pe a taumafai tagata e faataitai ia te ia?” Ia faataga mo se tali. Ia faasino atu i le palakalafa lona tolu i le itulau lena e sosoo i le itulau mulimuli o le tusi, lea o loo faamatala mai ai ona uiga faapitoa. Ia faamatala le auala e mafai ai e le tusi o Le Tagata Silisili ona fesoasoani ia i tatou uma e avea ai o ni Kerisiano e sili atu ona lelei.
8 Pe afai sa lē tele se naunau e ono talafeagai ai le ofoina o le tusi i le uluai taimi, atonu la e mafai ona amata lau toe asiga i le auala lenei:
◼ “Ou te iloa ta te tau fai ioe uma e toatele tagata i aso nei o loo faataitai atu o latou olaga i se tasi o loo latou manatu e fia faaaʻoaʻo i ai. O Iesu Keriso o lē e silisili ona lelei lea e mafai ona faaaʻoaʻo atu i ai so o se tasi. Ou te fia tufa atu ia te oe se lesona e tāua tele sa ou maua mai le suesueina o le faaaʻoaʻoga na faataatia e Iesu. [Suʻe i le mataupu 40 i le tusi o Le Tagata Silisili, ma tataʻi manatu i le lesona agalelei a Iesu i le loto agamalu.] O lenei mea na matuā faamanatu mai ai ia te au le tele o loʻu manaomia ona faataitaia atu lenei uiga i isi.” Faitau le Mataio 5:7. Pe afai ua foliga mai nei ua tele se naunau fiafia, ona ofo lea o le tusi po o le polosiua Po o Silasila Alofa mai ea le Atua ia i Tatou?
9 O se isi lenei faafeiloaiga atu mo tagata mapo lotu:
◼ “Pe a taʻua e se tasi Iesu Keriso, o le toatele lava o tagata e manatu ia te ia a lē o se pepe pe o se tagata o loo puapuagatia ma ua lata ina oti. O o latou mafaufauga ia Iesu ua na o lona fanau mai ma lona maliu o loo aofia ai. O mea ofoofogia na ia fetalai i ai ma faia i le taimi o lona soifuaga e masani lava ona lē amanaiaina. O mea na ia faataunuuina ua aafia ai so o se tagata lava na ola mai i lenei lalolagi. O le pogai lena e matuā tāua ai ona faatele ni mea e mafai ona tatou aʻoaʻoina e faatatau i mea ofoofogia na ia faia mo lo tatou lelei.” Faitau le Ioane 17:3. Suʻe i le itulau muamua o le faatomuaga o le tusi o Le Tagata Silisili, ma faitau le palakalafa lona fa. Ia faamatala le auala e mafai ona maua ai se tusi ma faaaogā mo suesuega totino.
10 Pe a toe e asia lena tagata, e mafai ona e ofo tuusaʻo atu lava i ai se suesuega faale-Tusi Paia e pei o lenei:
◼ “O le taimi mulimuli na ou iai iinei, sa ta talanoa ai i le tāua o le mauaina o le poto e uiga ia Iesu. Ua faapea mai le Ioane 17:3, o le ‘uiga o le ola e faavavau’ o le aveina lea i loto o lena poto. E mafai la faapefea ona tatou faia lena mea?” Faatali mo se tali. Toe faaauau atu e ala i le faamatala i ai o la tatou fuafuaga mo suesuega faale-Tusi Paia ma le auala e mafai ona maua mai ai aogā.
11 Ia faamautinoa o loo faia se faamaumauga o ē na naunau fiafia ma lomiga na tuu ai ina ia mafai ona e toe tuliloaina e ala i le faia o toe asiga. Pe afai ua faaalia mai le naunau fiafia o le tagata i talanoaga sa faia e faatatau ia Iesu, ia taumafai loa e amata se suesuega faale-Tusi Paia e faaaogā ai le tusi o Le Poto. A o maua pea le taimi, seʻi o tatou saili atu ma le maelega i tagata o loo iai le loto naunau moni ma fesoasoani ia i latou ina ia avea ma soo o lo tatou Faaola, o Iesu Keriso.—Mata. 16:24.