Pusa Fesili

◼ O le ā e tatau ona faia pe a tupu se mala ua aafia tuusaʻo ai o tatou uso?

Pe Afai e Tupu se Mala i Lou Vaipanoa: Aua le popole. Ia toafilemu pea, ma uaʻi totoʻa i le mea e sili ona tāua—o le ola, ae lē o mea faitino. Vaai lelei mo manaoga faaletino o lou lava aiga. Ona faafesootai loa lea o toeaina e uiga i ou tulaga ma le vaipanoa o faamautū i ai.

O toeaina ma auauna o le faiva latou te faia se vaega tāua i le saunia o se fesoasoani laveai. Afai e muai tuuina mai se lapataiga e uiga i se mala, e pei ona faia i afā malolosi, e tatau i nei uso ona faamautinoa ua iai tagata uma i se nofoaga malupuipuia, ma afai e lava le taimi, e tatau ona maua ma tufatufa atu ni mea atonu e manaomia.

A uma lena, e tatau i le ʻau faisuesuega o suesuega tautusi a vaega ona faafesootai aiga taitasi ma fesili i ai e tusa ai ma o latou tulaga saogalemu. E ao i le ovasia taimua po o se isi toeaina ona faailoa atu le tulaga o aiga taitasi, e tusa lava po o tulaga lelei i latou uma. Pe afai ua manuʻa se tasi, o le a taumafai toeaina e faia se fuafuaga mo se togafitiga faafomai. E saunia foi e i latou mea faaletino e pei o meaʻai, lavalava, fale, po o mea e manaomia e le aiga. (Ioa. 13:35; Kala. 6:10) O le a avatu foi e toeaina o le faapotopotoga le lagolagosua faaleagaga ma tau i faalogona ootia i le faapotopotoga, ma o le a fuafua i le vave e mafai ai ina ia toe faia sauniga a le faapotopotoga. Pe a uma ona faia se faamaopoopoga maeʻaeʻa o mea ua faaleagaina, e tatau i se toeaina ona faafesootai atu le ovasia matagaluega e fai ma sui o le autoeaina e faailoa atu ia te ia e uiga i ni manuʻaga, ni mea ua faaleagaina o le Maota o le Malo po o ni mea ua faaleagaina o fale o uso, faapea foi ma so o se manaoga faapitoa. Ona telefoni atu lea o le ovasia matagaluega i le ofisa o le lālā e lipoti atu i ai le tulaga ua iai. O le ofisa o le lālā na te faatautaia so o se tulaga sili ona tele o fesoasoani o loo manaomia.

Afai e Tupu se Mala i se Isi Atunuu: Ia manatua uso ma tuafāfine i na vaipanoa i a outou tatalo. (2 Kori. 1:8-11) Afai e te manao e foai se fesoasoani tau tupe, e mafai ona auina atu lau foai tauofo i le Sosaiete, o iina o loo faataatia ese ai se faaputuga tupe e fesoasoani mo lenei fuafuaga. O le tuatusi: Watchtower, 25 Columbia Heights, Brooklyn, NY 11201-2483 po o le tuatusi o la outou lālā. (Galu. 2:44, 45; 1 Kori. 16:1-3; 2 Kori. 9:5-7; tagai i le Watchtower, Tesema 1, 1985, itulau 20-22.) Aua le aauina atu ni mea faitino po o ni mea i le nofoaga o loo tupu ai le mala, seʻi vaganā ua tuuina atu se talosaga faapitoa e uso o loo vaavaaia ia mea. O lenei faiga o le a faamautinoa ai se taumafaiga maopoopo e tufaina atu ai fesoasoani. (1 Kori. 14:40) Faamolemole aua le faia atu ni telefoni e lē talafeagai i le Sosaiete, auā o le a taofia ai laina o telefoni na o loo manaomia mo le faafoeina o telefoni mai le vaipanoa o loo tupu ai le mala.

Pe a uma ona faia se fuafuaga lelei, ona filifili lea o le Sosaiete pe tatau ona faia se komiti mo fesoasoani laveai. O le a faailoa atu i uso o loo gafa ma ia tiute. E tatau i tagata uma ona felagolagomai ma toeaina o loo taimua ina ia mafai ai ona lava mea e faafetaiaia ai manaoga tāua o uso uma lava.—Tagai i le tusi, Jehovah’s Witnesses—Proclaimers of God’s Kingdom, itulau 310-315.