Faasilasilaga

◼ Lomiga mo le ofo ia Ianuari: Autasia i le Tapuaiga i le Atua Moni e Toatasi, Faia o Lou Olaga Faaleaiga ia Fiafia, po o so o se tusi Samoa tuai e 192 ona itulau o loo iai pea i faapotopotoga. O faapotopotoga e lē o iai ni tusi faapena, e mafai ona latou ofo le tusi, E Mafai ona E Ola e Faavavau i Parataiso i Le Lalolagi. Fepuari: Faaaliga—Ua Latalata Lona Tumutumuga Matagofie! Mati: Le Poto e Taʻitaʻia ai i le Ola e Faavavau. Ia uaʻi atu i le amataina o suesuega faale-Tusi Paia i aiga. Aperila: O kopi o Le Olomatamata ma le Ala Mai!

◼ O tagata talaʻi papatisoina uma lava e iai i le Sauniga o le Auaunaga i le vaiaso o Ianuari 5, o le a tuuina atu i ai le Advance Medical Directive/Release ma le Identity Card (ID) mo a latou fanau.

◼ E amata atu ia Mati, o le lauga lautele fou mo ovasia matagaluega, e faapea lona matua: “Pe E te Manatu i le Ola e Pei Ona Finagalo i ai le Atua?”

◼ E tatau i faapotopotoga ona faia ni fuafuaga talafeagai mo le faamanatuina o le Faamanatuga i lenei tausaga i le Aso Toonai, Aperila 11, pe a goto le la. E ui lava e mafai ona vave amata le lauga, ae o le pasi faasolo atu o le areto ma le uaina e tatau ona amata pe a goto le la. Siaki i lo outou ofisa o le vaaitau ina ia iloa ai po o le ā le taimi e goto ai le la i lo outou vaipanoa. E ui lava e mananao faapotopotoga taitasi e faia la latou lava Faamanatuga, ae atonu o le a lē mafai ona faia faapena. I nofoaga e masani ona faaaogā ai le Maota o le Malo e tasi e ni faapotopotoga se lua pe e sili atu, atonu e mafai e se faapotopotoga po o ni faapotopotoga ona faaaogā se isi fale mo lena po. E lē tatau ona tuai nauā le amataina o le Faamanatuga, ina ia lē taligā ai e tagata fiafia fou e auai. E lē tatau foi ona tumu le faasologa ua lē mafai ai ona maua se taimi i le amataga po o le faaiuga o le sauniga e faafeiloai ai ē asiasi mai, ma faia ni fuafuaga e faaauau ai ona tuuina atu le fesoasoani faaleagaga mo ē naunau fiafia, pe olioli foi i ni feofoofoaiga masani o faalaeiauga. Pe a uma ona iloiloina maeʻaeʻa vala uma, e tatau la i toeaina ona filifili po o ā fuafuaga e sili ona lelei e fesoasoani atu ai ia i latou o ē o auai i le Faamanatuga ina ia maua atoatoa ai aogā mai lena sauniga.

◼ O le lauga lautele faapitoa mo le vaitaimi o le Faamanatuga o le 1998, o le a faia i le Aso Sa, Mati 29. O le a saunia atu se auivi. O faapotopotoga o loo asia e le ovasia matagaluega, faia se fonotaga matagaluega, po o se aso faapitoa o fonotaga i le faaiuga o lena vaiaso, o le a faia le lauga faapitoa i le vaiaso e sosoo ai. E leai se faapotopotoga e tatau ona faia le lauga faapitoa a o lei oo ia Mati 29, 1998.

◼ E tatau ona silafia e le autoeaina e faapea, o fesuiaiga ia o loo mulimuli mai, e manaomia pe afai e auai le faapotopotoga i se aso faapitoa o fonotaga i lo latou lava atunuu: Pe a fuafua e auai i se aso faapitoa o fonotaga, e tatau lava ona faia sauniga masani uma a le faapotopotoga i le vaiaso seʻi vaganā ai le Lauga Lautele ma le Suesuega o Le Olomatamata e lē faia ai. Ae a faia se fonotaga matagaluega, o le a lē faia foi le Aʻoga o le Faiva Faatiokarate ma le Sauniga o le Auaunaga, e na o le Suesuega Tautusi a le Faapotopotoga o le a faia ai i lena vaiaso.

◼ E amata atu i le vaiaso o Me 4, 1998, ma faaauau ai e oo atu i le vaiaso o Novema 22, 1999, o le a talanoaina ai i le Suesuega Tautusi a le Faapotopotoga le tusi, Faaaliga—Ua Latalata Lona Tumutumuga Matagofie!