Ovasia o Loo Taimua—Le Failautusi
1 Ua faia e le failautusi a le faapotopotoga se vaega tāua i le faamautinoaina ua “faia mea uma lava ma le matagofie ma le sauni lelei.” (1 Kori. 14:40) Ona o se sui o le Komiti o le Auaunaga a le Faapotopotoga, o le failautusi na te tausia fesootaiga uma a le faapotopotoga ma faamaumauga tāua. E ui lava atonu e lē o iloa e tagata uma ona tiute e pei o tiute o isi toeaina, ae e manaomia tele lana auaunaga ma e talisapaia.
2 Pe a maua tusi mai le Sosaiete po o isi, e tatau loa ona tagai i ai le failautusi ma faamautinoa ua faia se tali pe a manaomia. O ia foi e faamautinoaina ua faaoo atu i toeaina uma tusi e maua mai ma teu i ni faila e toe suʻe atu i ai. E na te siakiina foi pepa o ota o mekasini ma tusi ma aauina atu i le Sosaiete. O ia na te vaaia tuusao i latou o ē o taulimaina tupe ma tusiga faapea ma mataupu uma e faatatau i tauaofiaga.
3 Talu ai o le failautusi na te auina atu i le Sosaiete le lipoti faalemasina o le auaunaga i le fanua a le faapotopotoga i le aso ono o le masina, e tāua tele la mo i tatou uma ona tuuina vave atu la tatou lipoti o le galuega i le fanua i le faaiuga o masina taitasi. Ona ia tusia lea o lipoti o le auaunaga i pepa Congregation’s Publisher Record. E mafai e so o se tagata talaʻi ona talosaga e fia vaai i lana pepa faamaumau o lana galuega.
4 Pe a sau i totonu se tagata talaʻi pe alu ese foi mai le faapotopotoga, o le failautusi na te talosagaina mai toeaina o le isi faapotopotoga pe na te aauina atu foi se tusi i toeaina o le isi faapotopotoga e faailoa atu ai faatasi ma le pepa, Congregation’s Publisher Record, a lena tagata.—Our Ministry, itu. 104-105.
5 O le failautusi na te iloiloina galuega a paeonia, ma faailoa atu i toeaina, ae maise lava le ovasia o le auaunaga e uiga i ni faafitauli atonu o fesagai ma paeonia. E na te faailoa atu i le au faisuesuega o Suesuega Tautusi a le Faapotopotoga ni tagata talaʻi o ē ua seāseā ō i le auaunaga i le fanua. E taimua uma le failautusi ma le ovasia o le auaunaga i le faia o ni taumafaiga mo le vaaia o ē ua seāseā talaʻi.—La Tatou Faiva o le Malo, Novema 1987, itu. 1.
6 I le talisapaia lelei o tiute o le failautusi, seʻi o tatou faia le mea tatou te mafaia e fesoasoani ai ina ia faafaigofie ona faataunuu lana matafaioi o le avea o se auauna tausi mea.—1 Kori. 4:2.