Ia Faaaogā Tatau Lou Taimi

¹ E tutusa lava taimi o tagata uma e faaalu i vaiaso taitasi. E tāua faapitoa le taimi lea e tuutoina i le faasalalauina atu o le tala lelei, auā o le taimi lea o loo faaalu i se galuega faasaoola. (Roma 1:16) E faaalia lo tatou talisapaia o lenei mea e ala i lo tatou sauniuni lelei mo le auaunaga ua fuafuaina, i le taunuu i faatasiga mo le auaunaga i le taimi tonu, ma vave ona ō ese mo le oganuu. E sili atu lo tatou ō e talaʻi na i lo o le faatalitali. Talu ai ua uma ona aʻoaʻoina i tatou e Ieova e faapea ‘e iai le taimi atofaina mo mea uma,’ e manaomia ai ona tatou matuā faaaogā tatau le taimi lea ua tatou faataatia ese mo le faiva.—Fai. 3:1.

² Faasoa ma le Atamai Lou Taimi: E tele faamanuiaga tatou te maua pe a tatou pipii mau i se faasologa ua faaavanoaina e auai ai e lē aunoa i le faiva i le fanua. O le tulaga masani lava, o iuga lelei ia tatou te maua i le faiva e tatau ona talafeagai ma le aofaiga o le taimi lea tatou te faaalu i le auaunaga. I le faia o sina fetuunaiga laitiiti lava i la tatou faasologa masani, pe faamata e mafai ai ona tatou faaalu se isi taimi e sili atu i le auaunaga i le fanua? Mo se faaaoaoga, pe a uma le galuega mekasini i le Aso Toonai, pe mafai ona tatou faaopoopo se taimi e faia ai ni nai toe asiga? Pe afai ua uma ona faaalu se taimi i le faiva i le fanua i le Aso Sa, pe mafai foi ona tatou faaalu se taimi e faia ai toe asiga ma suesuega faale-Tusi Paia? Pe mafai ona faaopoopo i la tatou galuega talaʻi mai lea fale i lea fale se taimi e molimau atu ai i ala tetele? I nei auala po o nisi foi auala, atonu o le a mafai ai ona faaleleia la tatou auaunaga.

³ Pe a tatou ō atu i le faiva, e mafai ona tatou faamaimau le taimi tāua pe afai tatou te lē faaeteete. O le mea moni, pe afai e matuā leaga tulaga o le tau, o le faia o sina malologa puupuu o le a faafouina ai i tatou ma fesoasoani ia i tatou e faaauau ai pea. Ae peitai, ia paleni, talu ai atonu e lē manaomia ona faia na malologa i taimi uma.

⁴ I tausaga talu ai nei, sa faateleina ai le faigata ona maua atu tagata i aiga. Ina ia faafesagaia lea tulaga, ua faia ai e le toatele o tagata talaʻi la latou molimau atu mai lea fale i lea fale i taimi eseese o le aso. Aisea e lē faataitai ai ona molimau atu i le afiafi po o le afiafipo?

⁵ E sili ona lelei pe a aua tatou te talatalanoa a o auai i le galuega i ala tetele. Na i lo lea, ia tutū vavamamao le tasi mai le isi ma faafeiloai atu tagata ina ia amataina ai ni talanoaga ma i latou. O le a matuā aogā lelei lena taimi ma o le a maua mai ai se fiafiaga sili i le galuega.

⁶ Puʻe Avanoa e Molimau Atu Ai: Ina ua fai mai se tasi tagata e ona le fale o ia e lē fiafia, na fesili atu se Molimau pe e iai se isi tagata i le fale e mafai ona ia talanoa atu i ai. O lenei mea na iu i le faia ai o se talanoaga ma le tamaloa o le aiga, o lē na maʻi mo le tele o tausaga, sa faataotolia i le moega mo le tele o taimi. O le faamoemoe o loo aumaia i le Afioga a le Atua na toe faafou ai lona fiafia i le olaga. Sa lei pine ae malosi ma auai i sauniga i le Maota o le Malo, ma tufaina atu lona faamoemoe fou i isi!

⁷ Sa faatatauina e se tuafafine talavou le fautuaga ina ia faia se sao i le auaunaga i le fanua a o lei oo i le itula e amata ai le Suesuega Tautusi a le Faapotopotoga. I lana fale muamua, na la feiloai ai ma se teine e 13 tausaga o lē na faalogologo ma le naunau ma talia le lomiga. I le aso na sosoo ai i le aʻoga, na vaai ai le tuafafine talavou i le teine lava lea. E lei pine mulimuli ane, na ofo atu ai e le tuafafine e faia sa la suesuega faale-Tusi Paia, ma na talia e le teine.

⁸ Fai ia Uigā le Taimi: O le faia e lē aunoa o se sao i le auaunaga i le fanua ua fesoasoani ia i tatou e atiina ae o tatou tomai i le taulimaina o le tala lelei. Pe mafai ona e faaleleia lou tomai e amataina ai se talanoaga i le fale e ala i le faaaogaina o se upu tomua e sili ona uigā? Pe mafai ona avea oe ma faiaʻoga e sili atu ona tomai pe a faia se suesuega faale-Tusi Paia i le aiga? O le faia faapea, o le a mafai moni ai ona aogā lou taimi i le auaunaga ma atili ai ona fua tele mai lau faiva.—1 Timo. 4:16.

⁹ Talu ai ua “itiiti ona aso ua totoe,” ua tatau ai la ona faapisi o tatou olaga i galuega faa-Kerisiano. (1 Kori. 7:29) O le faasoasoaina o le taimi mo le galuega talaʻi e tatau ona faamuamua i la tatou lisi o mea e sili ona tāua. Seʻi o tatou faia se sao malosi, ma le maelega i le faiva. O le taimi o se alamanuia aogā ua tuuina mai e Ieova ia i tatou. Ia faaaogā pea ma le atamai ma ia faaaogā tatau.

[Pusa i le itulau 4]

Manatunatu i Fautuaga Nei:

◼ Ia taunuu i faatasiga mo le auaunaga i le taimi tonu.

◼ Pe a talafeagai, ia tausisia pea le faatoalaitiiti o vaega mo le molimau atu.

◼ Alofia le faatuai ona ō atu i le oganuu.

◼ Ia galue le oganuu i le taimi e toatele ai tagata i fale.

◼ Afai e saogalemu, e mafai ona e galue toatasi i nisi taimi.

◼ Fai toe asiga na e latalata i le oganuu o loo galueaina i le talaʻiga mai lea fale i lea fale.

◼ Ia faaauau pea i le auaunaga pe afai e umi se taimi o iai nisi o le vaega i se fale.

◼ Pe afai e mafai, e tusa ai ma tulaga, ia galue faaumiumi atu i se itula.