Pusa Fesili

◼ Pe e talafeagai ona patipati pe a faasilasila mai se tasi ua toe faaeaina?

I lona alofa mutimutivale ua saunia ai e Ieova se auala faale-Tusi Paia mo le toe mauaina o lona finagalo malie e se tagata faimea sesē ua salamō ma toe faaeaina ai i le faapotopotoga Kerisiano. (Sala. 51:12, 17) Pe a faia lenei mea, ua faalāʻeiʻauina i tatou e faamautinoa atu lo tatou alofa mo ia tagata ua salamō faamaoni.—2 Kori. 2:6-8.

E tusa lava po o le ā lo tatou fiafia pe a faaeaina se tauaiga po o se uō, e tatau lava ona toʻafilēmū ma le faaaloalo i le taimi e faasilasila mai ai le toe faaeaina o se tasi i le faapotopotoga. Ua faamatalaina i le Olomatamata o Oketopa 1, 1998, itūlau 17 le matāʻupu i le auala lenei: “Peitaʻi, e ao ona tatou manatua, o le toatele o tagata o le faapotopotoga latou te lē o iloa tulaga patino na ala ai ona faateʻa le tagata po o tulaga foi ua toe faaeaina ai. E lē gata i lea, atonu o iai nisi i le faapotopotoga sa aafia totino pe na tigā ai o latou faalogona—atonu mo se taimi umi lava—ona o le mea sese na faia e le tagata lea ua salamō. O lea la, i lo tatou nofouta i lea tulaga, o le a talafeagai ai, pe a faia le faasilasilaga, ona taofi lo tatou faia atu faalauaitele o ni faailoaga o le talia aloaia, seʻi vaganā ua faia lena tulaga i se faiga totino ma le tagata lava ia.”

E ui i lo tatou matuā fiafia e vaai atu i se tasi ua toe foʻi mai i le upu moni, ae o le a lē talafeagai ona patipati i le taimi o lona toe faaeaina mai.