Polokalame Fou o le Aso Faapitoa o Fonotaga
“Ia Avea ma Tagata Matutua i Tomai o le Malamalama” o le matua lena o le polokalame o le aso faapitoa o fonotaga e amata ia Setema 2000. (1 Kori. 14:20, NW) Aiseā e matuā tāua ai mo i tatou ona auai? Ua tatou ola i se lalolagi ua faatumuina i mea leaga ma amioga leaga. Ina ia mafai ona teena lenei mea, e tatau ona tatou atiina aʻe le malosi o lo tatou tomai e malamalama ai ina ia mafai ai ona tatou faatoʻilaloina le leaga i le lelei. O le mea lena o le a fesoasoani ai le polokalame o le aso faapitoa o fonotaga ia i tatou e faia.
I le amataga o le polokalame, o le a talanoaina ai e le ovasia matagaluega “O Fesoasoani Ina ia Avea ma Tagata Matutua i le Malamalamaga o le Tusi Paia.” O le a ia faailoa mai ia i tatou le auala e mausalī ai i le faatuatua. O le a faamatilatila ai e le failauga asiasi mai le matuā tāua o le faaaogāina moni, po o le faatatauina o mataupu silisili o le Tusi Paia e ati aʻe ai le naunau fia malamalama, a o ia talanoaina le mataupu o lona matua e faapea “Ia Leoleomalu le Itu Faaleagaga i le Toleniina o Ou Tomai Faalemafaufau.”
E tatau foʻi i tagata talavou ona atiina aʻe ia tomai e malamalama ai. O le a talanoaina lenei manatu i vaega nei, “Le Pogai e Ao ai Ona Tamameamea i le Amioleaga” ma le “O Talavou o Ē ua Maua le Malamalama i le Taimi Nei.” Faalogo atu i talavou a o faamatala mai mea o loo latou faia ina ia faamalosiauina faaleagaga ai i latou lava ia mafai ai ona latou pulea so o se fia iloa e oo ia i latou e uiga i gaoioiga leaga a le lalolagi ma alofia ai faalavelave.
E mafai faapefea ona tatou maua le fiafiaga aupito sili i le olaga? O le a faamalamalamaina mai e le failauga asiasi lenei mataupu i le lauga faaiʻu, “Ia Maua Aogā Mai le Faatatauina ma le Malamalama o Mataupu Silisili o le Tusi Paia.” O le a ia aumaia ni faaaʻoaʻoga e faailoa mai ai o le faatatauina o le Afioga a le Atua e fesoasoani ia i tatou i le taulimaina o faafitauli, faia o filifiliga, ma maua moni aogā mai mea o loo aʻoaʻoina ai i tatou e Ieova.
O i latou e mananaʻo e faailogaina lo latou tuuina atu i le Atua i le papatisoga i le fonotaga e tatau ona faafesootaʻi vave loa le ovasia taʻimua. Faailoga le aso lena i lau kalena pe a faasilasila mai le aso faapitoa o fonotaga, ma ia faia ni fuafuaga maʻoti ina ia maua aogā mai lenei polokalame e faatamaoaiga ai faaleagaga. Aua lava neʻi misia se vaega o le polokalame o le aso faapitoa o fonotaga! O le a faamalosia ai oe ina ia tumau i lenei faiga o mea amio leaga ma tumau ai i le faamaoni ia Ieova.