Autasi ma le Olioli Faatasi ma Ieova ma Lona Alo
O le Sauniga Aupito Sili Ona Tāua e Faamanatuina iā Mati 28
1 E ala i le faamanatuina o le Talisuaga Afiafi a le Alii pe a mavae le goto o le lā iā Mati 28, 2002, ua tatou faaalia ai lo tatou autasi ma le olioli e faatasi ma Ieova ma Iesu Keriso. I lenā sauniga sili ona faapitoa, o le a olioli ai le vaega totoe faauuina i lo latou “mafuta faatasi” ai ma isi suli o le Malo, faatasi ai ma le Tamā, ma lona Alo. (1 Ioa. 1:3; Efe. 1:11, 12) O le a toe tomanatu ai le faitau miliona o “isi mamoe” i lo latou faaeaga matagofie o le autasia lea ma Ieova ma lona Alo, i lo latou tasi i le loto ma le mafaufau i le faataunuuina o le galuega a le Atua!—Ioa. 10:16.
2 Galulue Faatasi i se Faiā Vavalalata: E autasi pea Ieova ma Iesu ma le olioli. Na iā i laʻua se faiā vavalalata mo le tele o tausaga a o leʻi foafoaina le tagata. (Mika 5:2) O lea na tuputupu aʻe ai i lo la va se sootaga loloto o le alofa faapelepele. I le faaalitinoina mai o le atamai, na mafai ai ona faapea mai le Alo ulumatua e uiga i lona soifuaga a o leʻi avea ma tagata: “Na fai foi aʻu mona fiafia [o Ieova] i lea aso ma lea aso; sa ou olioli i ona luma i aso uma lava.” (Faata. 8:30) Na iai se aafiaga loloto i le Alo o le Atua ona o le lē mafaitaulia o tausaga na mafuta faatasi ai ma le Puna o le alofa!—1 Ioa. 4:8.
3 I le iai i lona finagalo o le manaʻoga ina ia laveaʻiina le fanau a tagata, na filifilia ai e Ieova lona lava Alo pele e toʻatasi, o lē e sili ona fiafia i tagata, e saunia le taulaga togiola, lea ua ofoina mai ai lo tatou faamoemoe. (Faata. 8:31) E pei lava ona autasi Ieova ma lona Alo i le faataunuuina o le fuafuaga e tasi, ua tatou tumau ai i le autasi ma i laʻua faapea ma isi i le fusi o le alofa loloto, ma olioli ai i le faia o le finagalo o le Atua.
4 Faaalia lo Tatou Talisapaia Mai le Loto: E ala i le auai i le Faamanatuga ma faalogologo ma le lē gāsē ma le faaaloalo, e mafai ai ona tatou faataʻitaʻia lo tatou talisapaia moni o le alofa o Ieova ma le taulaga a lona Alo mo i tatou. O le a faamatilatilaina ai le faaaʻoaʻoga alofa a Iesu, o lona faamaoni e oo i lona maliu e saunia ai le togiola, ma lana pulega o se Tupu o le Malo ua faavaeina o le Atua, faapea foʻi faamanuiaga o le a aumaia e le Malo i tagata. O le a faamanatu mai ai foʻi iā i tatou le manaʻoga o le faaauau pea ona faailoa atu lo tatou faatuatua, ma maelega e galulue e ōgatasi ma le finagalo o Ieova o se “ʻaufaigaluega o le upu moni.”—3 Ioa. 8, NW; Iako. 2:17.
5 Fesoasoani i Isi Ina ia Auai Faatasi ma i Tatou: E tatau i le ʻautoeaina ona faia ni taumafaiga faapitoa e faalaeiau ai Molimau uma ua lē o toe talaʻi o loo i le oganuu, ina ia auai i le Faamanatuga o le maliu o Keriso. (Mata. 18:12, 13) Ia faia se lisi o i latou e asia ina ia lē misia se tasi ma valaaulia faapitoa uma i latou.
6 Pe e te silafiaina nisi atonu e mafai ona auai mai i le Faamanatuga? Ia tausolomua i le faatupuina aʻe o lo latou talisapaia mo lenei sauniga faapitoa. Ia valaaulia ma le māfana i latou, ma ia faatupuina iā i latou se lagona o loo manaʻomia i latou. Seʻi o tatou faia le mea sili tatou te mafai i le valaauliaina lea o a tatou tagata suʻesuʻe uma o le Tusi Paia ma isi tagata fiafia, faapea foʻi tauaiga ma ē tatou te masani, i lenei sauniga sili ona tāua o le tausaga. E tumau pea ona aogā le togiola i ē uma o loo aʻoaʻoina “le silisili ese o le poto i la Keriso Iesu.” (Fili. 3:8) O i latou o ē faaalia le faatuatua i le taulaga a Keriso e mafai ona maua le faamoemoe mausalī o le ola e faavavau.—Ioa. 3:16.
7 Ia aua neʻi manatu māmā i aogā e mafai ona mauaina e ē lotofaamaoni, mai le Faamanatuga. I tausaga e lua ua mavae i le atunuu o Papua Niu Kini, na malaga atu ai ni tagata fiafia se toʻa 11 i se tamaʻi vaa mo le 17 itula a o sou lava le vasa, ina ia auai i le Faamanatuga. Aiseā? Na latou faapea mai: “Na matou mananaʻo e faamanatuina le Faamanatuga a Keriso faatasi ma tagata tapuaʻi o Ieova; ma ua tatau ai lava le matou malaga.” Seʻi mafaufau i le maelega na faaalia e na tagata lotofiafia ma lo latou talisapaia o le autasi ma le olioli faatasi ma Ieova, o lona Alo, ma le ʻauuso faa-Kerisiano!
8 Ia ofoina atu se suʻesuʻega faale-Tusi Paia i ē uma e lotofiafia. Ia faalaeiauina i latou ina ia auai atu i sauniga e lē aunoa a le faapotopotoga ma faailoa atu i isi upu moni o loo latou aʻoaʻoina. Ia fesoasoani iā i latou ina ia “savavali i le malamalama” ma ‘faia le upu moni’ e ala i le faatatauina o mataupu silisili o le Tusi Paia i o latou olaga. (1 Ioa. 1:6, 7) Ia fesoasoani iā i latou ina ia atiina aʻe se faiā vavalalata ma Ieova ma ia faaauau ona faatupuina aʻe le talisapaia o le faaeaga o le autasi i le faia o lona finagalo.
9 Maʻeu se faaeaga matagofie o le autasi ma le olioli i le “agaga e tasi, ma le manatu e tasi, o loo finau faatasi mo le faatuatuaga ua i le tala lelei”! (Fili. 1:27, 28, NW) Seʻi o tatou tulimataʻi atu lo tatou faatasitasi ma le fiafia i le Faamanatuga iā Mati 28, e faafetai atu ai iā Ieova ma lona Alo!—Luka 22:19.