E Faaalia le Ava i le Atua i Laʻei e Onomea
1. E faapefea ona tatou faaalia le talisapaia mo la tatou tauaofiaga itumalo o loo lumanaʻi nei?
1 Ua lē o toe umi ona tatou mauaina loa lea o le faaeaga o le avea ma malo a Ieova i le Tauaofiaga Itumalo 2003 “Ia Avatu i le Atua le Viiga.” Maʻeu lo tatou lotofaafetai iā Ieova mo lona valaauliaina o i tatou i taumafataga susua faaleagaga faapena! E faaalia lo tatou ava mo ia ma lo tatou talisapaia o ana sauniuniga faaleagaga, i o tatou laʻei ma teuga.—Sala. 116:12, 17.
2. Aiseā e tāua ai ona tū mamā ma lelei a tatou teuga?
2 Ia Mamā ma Maopoopo: E ao ona atagia i o tatou foliga vaaia ia faatulagaga a lo tatou Atua, o lē e mamā ma maopoopo. (1 Kori. 14:33; 2 Kori. 7:1) E ao ona mamā vaega uma o o tatou tino ma a tatou teuga. Ua taatele i aso nei le faatalalē i teuga. Peitaʻi, e leai se māfuaaga mo se Kerisiano e lē fai faalelei ai laʻei ona e faia faapea e se tagata taʻutaʻua i ata tifaga po o taaloga. O lo tatou faataʻitaʻi i teuga ua taatele i aso nei, atonu o le a faafaigatā ai i tagata ona iloa le eseesega i tagata o loo tapuaʻi i le Atua moni ma i latou e lē o tapuaʻi iā te ia.—Mala. 3:18.
3. E mafai faapefea ona tatou faamautinoa ua alagatatau o tatou foliga vaaia ma le fautuaga o loo i le 1 Timoteo 2:9, 10?
3 Laʻei e Tatau mo Faifeʻau Kerisiano: Ina ua tusi atu le aposetolo o Paulo i le ovasia Kerisiano o Timoteo, na ia faalaeiauina “fafine, ia latou teuteu iā i latou i ofu e onomea, ma ia lē teuanoaʻi, a ia faamatuāfafine; . . . o le mea lea e tatau i fafine ua taʻua latou e i latou o ē amio Atua.” (1 Timo. 2:9, 10) E manaʻomia ona manatunatu lelei e faamautinoa ua filifilia lelei o tatou laʻei. E tatau ona lelei ma mamā ia laʻei ma ia onomea—aua le feʻilafi pe faalialia, pe faatosina foʻi.—1 Pete. 3:3.
4, 5. O ā lapataʻiga e tatau i tane ma fafine Kerisiano ona utagiaina?
4 Na lapataʻi mai foʻi Paulo e faatatau i le soona matele naʻuā i le “teteu ma le lauulu fili, po o auro, po o penina, po o ofu tau tele.” (1 Timo. 2:9) O le iai o se tulaga paleni i le faaaogāina o filifili, tautaliga ma mama, faapea ai ma vali (makeup) ma isi mea e faaaulelei ai, o se auala atamai lea mo se fafine Kerisiano e ao ona mulimuli i ai.—Faata. 11:2.
5 O le fautuaga lea sa tusi atu ai Paulo i fafine Kerisiano e mafai foʻi ona faatatau atu i uso Kerisiano. E tatau i uso ona ʻalofia teuga e atagia ai le vaaiga faalelalolagi. (1 Ioa. 2:16) O se faaaʻoaʻoga, o nisi atunuu, e taatele ai le faia o ofu e ʻōʻō naʻuā ma tetelē, ae o lenei ituaiga teuga e lē atagia atu ai se vaaiga talafeagai mo faifeʻau a le Atua.
6. Aiseā e tatau ai ona tatou tausisi i se tapulaa maualuga i o tatou laʻei ma teuga pe a faimalaga atu pe faimalaga mai i le tauaofiaga, pe a o auai foʻi i le tauaofiaga ma taimi e uma ai polokalame o aso taʻitasi?
6 I Taimi o Gaoioiga Faasamasamanoa: Pe a auai i le polokalame, o le toʻatele o uso ma tuafāfine e latou te faia se faataʻitaʻiga lelei i laʻei ma teuga. Peitaʻi, ua lipotia mai le faatalalē o isi pe a faimalaga atu pe faimalaga mai i le tauaofiaga po o le auai foʻi i faafiafiaga pe a māeʻa le polokalame o le aso. O le mea moni o o tatou foliga vaaia, a o faagasolo le polokalame po o isi taimi, e mafai ona aafia ai le auala e manatu ai isi i tagata o le Atua. Ona e tatou te laʻeiina a tatou pine o le tauaofiaga, o se mea talafeagai la mo i tatou ona laʻei i le auala e tatau mo se faifeʻau a le Atua. E masani i lenei mea ona uunaʻia ai isi e faia ia faamatalaga lelei iā i tatou ma tatala ai le avanoa e molimau atu ai.—1 Kori. 10:31-33.
7. O le ā le aafiaga o o tatou laʻei ma teuga onomea i isi?
7 E pei ona aulelei o o tatou foliga i sina ʻataʻata faaleuō, e faapena foʻi ona taʻuleleia e laʻei ma teuga onomea ia le feʻau o loo tatou folafolaina ma le faalapotopotoga o loo tatou tauaveina. O nisi o le a latou mataʻituina i tatou i le taimi o le Tauaofiaga Itumalo “Ia Avatu i le Atua le Viiga” i lenei tausaga, atonu o le a uunaʻia i latou e fesili ifo pe aiseā e ese ai i tatou, ma o le a latou faapea mai: “Tatou te ō ma outou; auā ua matou faalogo [ma iloa], o loo iā te outou le Atua.” (Saka. 8:23) O lea, tau ina ia faaalia e i tatou uma le migao mo Ieova e ala i o tatou laʻei ma teuga.
[Pusa i le itulau 6]
Ia Lelei Ou Foliga Vaaia
▪ Pe a faimalaga
▪ I le tauaofiaga
▪ I gaoioiga faasamasamanoa