Polokalame Fou o le Fonotaga Matagaluega

I nei “aso faigatā,” e tatou te manaʻomia ai le poto mai le Atua ina ia maua ma faatumauina ai le faamaoniga a Ieova. (2 Timo. 3:1) O le polokalame o le fonotaga matagaluega o le tausaga faaleauaunaga e 2005 o le a tatou mauaina ai fautuaga aogā ma faalaeiauga a o amata talanoaina le matua “Ia Taʻitaʻia e ‘le Poto Mai Lugā.’”—Iako. 3:17.

O le lauga faasolo muamua, “Ia Faaalia ‘le Poto Mai Lugā’ i o Tatou Olaga,” o le a fesoasoani e tatou te iloa ai, po o le ā o loo aofia ai i le mamā, filemu, agamalu, ma le ganagofie. A uma lenā ona taulaʻi atu lea o le lauga a le ovasia o le matagaluega i isi vala e tolu o le poto mai le Atua. E faaiʻu e le ovasia o le itumalo le aso muamua i le faaalia pe faapefea ona aʻotauina faifeʻau Kerisiano e tautala atu i le poto o le Atua e ui e manatu i ai isi e “leʻi aʻoaʻoina ma valelea.”—Galu. 4:13.

I le aso lona lua, o se lauga faasolo e faamatuaina “Ia Tausisi i Mea e Atiina Aʻe Ai” o le a fesoasoani iā i tatou ia iloa ma ʻalofia mea e faavaivaia ai i tatou faaleagaga. O le a faaalia ai foʻi le auala e tatou te atiina aʻe ai isi, i sauniga a le faapotopotoga, i le faiva i le fanua, ma totonu o le aiga. O le lauga i le lautele, “Auala e Aogā ai iā i Tatou le Poto Mai le Atua,” o le a faaloloto atili ai lo tatou lotofaafetai i aogā o loo tatou maua, a o faatatauina mataupu silisili a le Atua i o tatou olaga. O le lauga faaiʻu, “Gaoioi e Tusa o le Poto Mai le Atua e Leoleoina ai i Tatou,” o le a faamalosia ai la tatou filifiliga e liliu atu iā Ieova mo le poto i nei aso e gata ai.

O le vala tāua o fonotaga uma lava, o le papatisoina lea o soo fou. O le a iai foʻi i le polokalame ia le Aʻoga o le Faiva Faatiokarate ma le Suʻesuʻega o le Olomatamata o lenā vaiaso. E finagalo Ieova ia tatou mauaina uma lava aogā mai le poto ua ia saunia mai. O le a faaʻoaina i tatou faaleagaga i fautuaga ma faalaeiauga i la tatou fonotaga matagaluega o loo lumanaʻi nei.—Faata. 3:13-18.