Vaega 5—Faia o Suʻesuʻega Faale-Tusi Paia e Agaʻigaʻi i Luma
Ia Fuafua le Telē o le Mataupu e Talanoaina
1 A o aʻoaʻo atu Iesu, sa ia malamalama i mea e gafatia e ona soo ma fetalai iā i latou “e faatatau i mea ua mafai ona latou lagona.” (Mare. 4:33; Ioa. 16:12) E ao foʻi i faiaʻoga o le Afioga a le Atua i aso nei, ona fuafua le telē o le mataupu e mafai ona fai i le suʻesuʻega faale-Tusi Paia. O le telē o le mataupu e talanoaina, e fua i le tomai ma le tulaga o le faiaʻoga ma le tagata aʻoga.
2 Ia Faamalosia le Faatuatua: O isi tagata aʻoga e ono manaʻomia ni lesona se lua pe tolu e malamalama ai i se mataupu lea e tasi le lesona e fai ae malamalama i ai isi tagata aʻoga. E sili atu ona tāua le fesoasoani i le tagata aʻoga ia malamalama lelei i le mataupu, na i lo le telē o le mataupu e suʻesuʻe i se taimi puupuu. E tatau ona mautū le faavae o le faatuatuaga o le tagata aʻoga fou i le Afioga a le Atua.—Faata. 4:7; Roma 12:2.
3 A o fai le suʻesuʻega i vaiaso taʻitasi, ia faamautinoa ua malamalama lelei le tagata aʻoga ma talia mea ua ia aʻoaʻoina mai le Afioga a le Atua. Ia ʻalofia le faatopelau ona fai, lea e lē maua ai e le tagata aʻoga aogā mai upu moni ua aʻoaʻoina. Ia lava le taimi e taulaʻi atu ai i manatu tāua ma ia iloiloina mau autū ia e faavae aʻe ai mea ua aʻoaʻoina.—2 Timo. 3:16, 17.
4 Aua Neʻi See Ese Mai le Suʻesuʻega: A o tatou taumafai e ʻalofia le faatopelau o le suʻesuʻega, e tatou te mananaʻo foʻi e ʻalofia le see ese mai le suʻesuʻega. Afai e manaʻo le tagata aʻoga e talanoa umi i se mea e patino lava iā te ia, e ono manaʻomia ona talanoaina lea mea pe a uma le suʻesuʻega.—Fai. 3:1.
5 O le isi itu, o lo tatou naunau i le upu moni e faigatā ai iā i tatou ona faaitiiti la tatou talanoa i le taimi o le suʻesuʻega. (Sala. 145:6, 7) O se manatu faaopoopo po o se mea na tupu, e mafai ona aogā i le suʻesuʻega, ae e tatou te lē mananaʻo e tele se taimi e talanoa i na mea, ma faalavelavea ai le tagata aʻoga mai le iloa o aʻoaʻoga faavae a le Tusi Paia.
6 O le talanoaina o se vaega e talafeagai lona umī i lesona taʻitasi, e tatou te fesoasoani ai i tagata aʻoga o le Tusi Paia e ‘savavali ai i le malamalama o Ieova.’—Isa. 2:5.