Pusa Fesili

◼ Pe e talafeagai ona fuafua e fai ni faatau (garage sale) e faatau atu ai ni mea totino, po o isi gaoioiga e suʻe ai ni tupe e fesoasoani i le faapotopotoga?

E masani ona lagolago e faalapotopotoga a lotu gaoioiga e suʻe ai tupe, e pei o ʻaiga, o mea e faatau atu, po o ni fiafia e fai. E ui e ono manatu nisi tagata e aogā lenei faiga, ae o na gaoioiga o ni suʻega tupe. E lē o le auala lenā e maua ai e Molimau a Ieova ni fesoasoani tau tupe.

Ua taʻua i le lomiga lona lua o le Watch Tower o Aokuso 1879, e uiga i lo tatou teena o le faataʻitaʻi i lotu ma le faia o suʻega tupe: “E tatou te talitonu o loo lagolagoina e IEOVA le ‘Zion’s Watch Tower,’ ma o le pogai lea e lē taitai ai o tatou ʻaisi pe talosagaina se fesoasoani a isi. Pe a taofia le saunia mai o tupe e Lē na fetalai: ‘O aʻu e ana auro ma siliva uma i mauga,’ ona tatou manatu loa lea ua ao ona taofia le lomia o lomiga.”

E tatou te usiusitai pea i le taʻiala o le Tusi Paia: “Ia taʻitoʻatasi ma foaʻi e pei ona filifili i lona loto; aua ma le tigā, aua foʻi ma le faatauanauina; auā e alofa le Atua i lē ua foaʻi ma le loto malie.” (2 Kori. 9:7) O loo iai pusa mo meaalofa i le Maota mo Sauniga e faia ai foaʻi tauofo a tagata pe a mananaʻo i ai. (2 Tu. 12:9) E lē faia ni meaalofa i se tulaga e suʻe ai ni tupe, pe faia foʻi ma le manatu e toe maua mai ai nisi mea.