Taumafaiga Filigā e Faalauiloa i le Lalolagi le Tauaofiaga Itumalo, “Ia Mulimuli iā Iesu Keriso”
O le a Toe Tufaina Atu e Tagata Talaʻi se Tusi Valaaulia Faapitoa
1 I le tausaga ua teʻa, na iai se aafiaga lelei i tagata fiafia, o le tauiviga lea na faia i le lalolagi aoao e faalauiloa le Tauaofiaga Itumalo, “Ua i Faitotoʻa le Faaolataga!” Na vaaitino mo le uluaʻi taimi ē na talia le valaaulia faapitoa i se faigaʻai tele faaleagaga a Molimau a Ieova. (Isa. 65:13) Na latou olioli i le aufaatasiga māfana, ma autasi ma le ʻauuso Kerisiano. (Sala. 133:1) Ina ia fesoasoani i le tele o tagata e mafai ai e auai i le Tauaofiaga Itumalo “Ia Mulimuli iā Iesu Keriso,” o le a tatou toe tufaina atu i le lalolagi se tusi valaaulia faapitoa.
2 Iʻuga i le Tausaga ua Teʻa: Pe a fua atu i lipoti mai vaega uma o le lalolagi, na ausia ni iʻuga e sili ona lelei i le faalauiloaina atu o le Tauaofiaga Itumalo, “Ua i Faitotoʻa le Faaolataga!” I le tele o atunuu, na tatou maua ni tali lelei mai tagata. O se faaaʻoaʻoga, na lomia i se nusipepa i se aai, se mataupu i le tauiviga e faapea: “Ina ia oo atu i tagata uma, na faia e Molimau nisi taumafaiga faapitoa i tuaoi, e ala i lo latou galulue mo le tele o itula, savavali i mea e mamao atu, ma faapuupuu le tautala.” O le tufaina atu o lenei tusi valaaulia, na uunaʻia ai le fiafia o se nusipepa i se isi aai e auʻiliʻili mai i a latou tala fou le tauiviga. A itiiti mai e tolu ni nusipepa na lipotia ma le fiafia la tatou tauiviga na fai a o leʻi oo i le tauaofiaga. Na tusia e se fai tala fou i se nusipepa o le Aso Sa, nisi mataupu tetelē lea e aofia ai le silia i le lua itulau. Na faamatala ai o tatou talitonuga, lo tatou ʻauuso, le tufaina atu o le valaaulia, ma le tauaofiaga. Ina ua ofo atu e se tagata talaʻi le valaaulia i se aiga, na oso mai lē ona le fale e faapea: “Ioe. Faatoʻā uma nei lava ona ou faitau ai i le pepa!” Na faapea mai se isi tagata: “Faatoʻā uma lava ona ou faitau i le nusipepa e uiga iā te outou, ae o lea ua tou ō mai! Po o laʻu tusi valaaulia lenā?” Na ia faapea mai atili, “O se mea lelei tele lea ua faia e Molimau a Ieova.”
3 Na vaaia le toʻatele o tagata fiafia na ō atu i nofoaga na faia ai le tauaofiaga ma uʻu atu a latou tusi valaaulia. Na faimalaga mai nisi tagata fiafia mai aai mamao e auai i le tauaofiaga. O a tatou taumafaiga filigā e valaaulia isi, na saosaolaumea i le faatelega o le aofia, e pei o se isi atunuu lea e 27 pasene na sili ai le aofaʻi o ē na auai i le tauaofiaga i le tausaga na teʻa nei, na i lo le tausaga na muamua atu.
4 Galueaʻiina o Oganuu: E mafai ona amata tufa atu tusi valaaulia i le tolu vaiaso a o leʻi faia la outou tauaofiaga. E ao ona faia taumafaiga uma e galueaʻiina le oganuu atoa a le faapotopotoga. O faapotopotoga e telē la latou oganuu, e mafai e tagata talaʻi ona tuu ma le faautauta le valaaulia i fale e lē o maua ai nisi, i le vaiaso mulimuli a o leʻi faia le tauaofiaga. E ao ona taumafai faapotopotoga e tufa atu tusi valaaulia uma ma ia galueaʻiina le tele o oganuu e mafai ai. O ni tusi e totoe e mafai ona faaaogā e paeonia o le faapotopotoga.
5 Le Tala e Fai Atu: E te ono faapea atu: “O loo matou faia se taumafaiga i le lalolagi aoao e tufa atu lenei valaaulia o se aso tāua o loo lumanaʻi nei. O lau tusi valaaulia lea. O le a e maua isi faamatalaga i le tusi.” O le faapuupuu o le taulimaga o le a tele ai tusi e tufa atu. A iai ni fesili a lē ona le fale, ia faaavanoa le taimi e tali ai. Afai e fiafia, ia fai se faamaumauga ma toe foʻi e asi i le vave e mafai ai.
6 Maʻeu le tāua o lo tatou taumafai e mulimuli iā Keriso! (Ioa. 3:36) O le a fesoasoani la tatou tauaofiaga itumalo o le a faia nei i ē uma e auai ina ia faia faapea. E tatou te mautinoa o le a toe avatu foʻi se isi molimau tele, pe a faia lenei taumafaiga filigā e faalauiloa le Tauaofiaga Itumalo, “Ia Mulimuli iā Iesu Keriso.” O lea la, ia filigā e valaaulia le tele o tagata e mafai ai e auai. Tau ina ia faamanuia Ieova i au taumafaiga, a o e faia se sao i lenei tauiviga e faia i le lalolagi aoao.