Ia “Fua Tele Mai” Pea
1 Sa faatusatusa e Iesu o ia i le vine moni, o lona Tamā o Lē galue vine, a o ona soo ua faauuina i le agaga, o lālā vine o loo fua mai. A o ia faamatala le galuega a Lē galue vine, sa faamamafa ai e Iesu le tāua o le pipii mau i le vine. (Ioa. 15:1-4) O le lesona i inei, so o se tasi e iai sa la faiā māfana ma Ieova, e tatau ona avea o ia ma lālā e fua tele o le “vine moni,” o Iesu Keriso lea. Ia tatou faaauau pea ona fua tele mai i “fua o le Agaga,” faapea foʻi i fua o le Malo.—Kala. 5:22, 23; Mata. 24:14; 28:19, 20.
2 Fua o le Agaga: E mātaulia lelei lava lo tatou agaʻigaʻi i luma faaleagaga, i le tele o loo tatou faaalia ai fua o le agaga. Po o e taumafai malosi e ati aʻe fua o le agaga o le Atua, e ala i lou suʻesuʻe e lē aunoa ma mafaufau loloto i le Afioga a le Atua? (Fili. 1:9-11) Aua e te faatalatū e tatalo mo le fesoasoani a le agaga paia, lea e mafai ona fuaina mai ai uiga e faamamaluina ai Ieova ma atili ai ona e agaʻigaʻi i luma faaleagaga.—Luka 11:13; Ioa. 13:35.
3 O le atiina aʻe foʻi o fua o le agaga e atili ai ona avea i tatou ma faifeʻau maelega i la tatou faiva. Mo se faaaʻoaʻoga, pe a iā i tatou le alofa ma le faatuatua, po o le ā lava le pisi o la tatou faasologa, e faaavanoa lava se taimi tatou te auai ai e lē aunoa i le talaʻiga. O uiga e pei o le filemu, onosai, agalelei, agamalu, ma le pulea o i tatou lava, e mafai ai ona tatou gaoioi ma le atamai pe a fetaiaʻi ma tagata e tetee mai. O le olioli e mafai ai ona tatou maua le loto malie i le faiva, e tusa lava pe lē tali lelei mai tagata.
4 Fua o le Malo: Tatou te mananaʻo foʻi e fuaina atu fua o le Malo. E aofia ai le ofoina atu o “le taulaga o viiga i le Atua, o le fua lea o tatou laugutu, o loo faafetai atu i lona suafa.” (Epe. 13:15) Tatou te faia e ala i lo tatou maelega ma maumauaʻi e folafola atu le tala lelei. Po o e taumafai ea e fuaina atu nisi fua o le Malo e ala i le faaleleia atili o lau faiva?
5 Na faaalia e Iesu o le a eseese lava le tele o fua e fuaina mai e ona soo faamaoni. (Mata. 13:23) O lona uiga la, e lē tatau ona tatou faia se faatusatusaga o i tatou ma isi, ae ia tatou avatu iā Ieova le mea e sili ona lelei. (Kala. 6:4) Pe a tatou faia se iloiloga faamaoni o o tatou lava tulaga, e fua i manatu o le Afioga a le Atua, o le a mafai ai ona faaauau pea ona tatou faamamaluina Ieova e ala i le “fua tele mai.”—Ioa. 15:8.