O le Faamaoniga o se Faatuatua Malosi!
1. O ā mea tutupu e faateʻia ai na valoia e Iesu?
1 Sa faalogologo ma le totoʻa le ʻauaposetolo a o talanoa atu Iesu e faatatau i lona faatasi mai ma le iʻuga o faiga o mea. O le a tutupu i le fanau a tagata ni mea e faateʻia ai—o taua, o oge, mafuiʻe, ma faamaʻi. Na sosoo ai ma le faapea atu o Iesu, o le a itagia ma faapuapuagatia ona soo, ma oo lava ina fasiotia. O le a tulaʻi mai perofeta pepelo ma faasesēina le toʻatele. E maalili foʻi le alofa o le toʻatele.
2. Aiseā e mataʻina ai le mafai ona talaʻia o le tala lelei i le lalolagi atoa?
2 E ui i mea tutupu e pei ona taʻua, e lē taumatea sa faateʻia le ʻauaposetolo ina ua fetalai atu Iesu o le a talaʻia le tala lelei o le Malo o le Atua i le lalolagi atoa. (Mata. 24:3-14) Ua tatou vaai i le faataunuuga mataʻina o lenā valoaga e faagaeetia ai. E ui lava o loo tatou ola i taimi faigatā, ae o loo faalauiloa atu ma le maelega e Molimau a Ieova le tala lelei. A o agaʻi ina maalili le alofa o le lalolagi, ua atili ai ona aasa lo latou alofa. E ui lava ina itagia e “atunuu uma,” ae o loo tatou talaʻi atu e toetoe lava o atunuu uma.
3. O le ā se vala e faalaeiauina ai o loo e mātauina i le lipoti o le auaunaga i le lalolagi?
3 Maʻeu le faalaeiauina ai i le autaluina o galuega sa fai e Molimau a Ieova i le tausaga faaleauaunaga ua teʻa e pei ona faaalia i le siata i le itulau e 3 e oo i le 6! Mo le 16 tausaga e aunoa ma le motusia, e sili atu i le piliona itula sa faaalu i le galuega talaʻi ma le faia o soo. O se faamaoniga lenei o le iai o se faatuatua malosi i Molimau a Ieova! Sa iai se faatelega e 5.8 pasene i le aofaʻi o paeonia, e 3.1 pasene le faatelega i le ʻautalaʻi, ae 4.4 pasene le faatelega i suʻesuʻega faale-Tusi Paia. E 20.1 pasene le faatelega o ē na papatiso nai lo le tausaga faaleauaunaga ua teʻa. O se mea e faagaeetia ai le mātauina ua toeitiiti lava fitu miliona tagata o loo auauna faamaoni iā Ieova—E leʻi iai muamua lava se aofaʻiga faapea i le talafaasolopito! A o e iloiloina le siata, o le ā se mea o e mātauina e matuā faalaeiauina ai lava oe?
4. O ā faafitauli sa foʻia e se tasi tamāloa a o galue ina ia papatisoina o ia?
4 E ui lava e mataʻina le lipoti i le mātau atu i ai, aua neʻi galo iā i tatou o loo taʻu mai ai iā i tatou tagata o ē ua faamaonia lo latou faatuatua. Seʻi mātau mai se faaaʻoaʻoga lenei. O Guillermo na soifua aʻe i Polivia. Na fanau i le tausaga e 1935, na amata ona galue i se faatoʻaga coca ina ua iva ona tausaga. Mai lava i lona laʻitiiti, e fai ma ana masani le lamu o lau o le coca ina ia faateʻa ai mafatiaga i le faia o galuega mamafa. Mulimuli ane ua ia faaaogā ma le lē pulea le ʻava malosi ma ulaula tapaa. A o amata ona ia aʻoaʻoina e faatatau i mea e faafinagaloina e Ieova mai iā te ia, na taofia e Guillermo lona ulaula ma ua lē toe faaaogāina foʻi ma le lē pulea le ʻava malosi. O le luʻitau telē lava o le taofia lea o le mea sa masani ona ia faia i lona olaga atoa o le lamuina lea o lau o coca. Sa ia tatalo faatauanau e lē aunoa ma foʻia ai lenei masaniga. Ua ia fulitua nei i lona olaga muamua sa iai, ma ua papatisoina o ia. Fai mai lana faamatalaga, “I le taimi nei, ua faamamāina loʻu olaga ma ua ou matuā fiafia lava.”
5. O le ā lou faanaunauga o i ai?
5 E naunau moni mai lava Ieova i tagata. O lona faanaunauga ia oo uma tagata i le salamō. (2 Pete. 3:9) O lo tatou faanaunauga foʻi lenā. Tau ina ia uunaʻia i tatou e ō tatou loto e fai mea uma e mafai ona tatou fai e faaauau ai ona fesoasoani i tagata lotofiafia ina ia latou iloa ma alolofa iā Ieova e pei ona tatou fai.