Ia Sauniuni Māeʻaeʻa mo le Faamanatuga

O se fiafiaga ma o se faaeaga faamamaluina mo soo o Keriso le sauniuni māeʻaeʻa mo le pō lea o le a tatou faamanatuina ai le maliu o Iesu Keriso! (Luka 22:19) O ā ni laasaga tāua e ao ona fai e sauniuni ai mo le Faamanatuga?

◼ Taimi ma le Nofoaga: E tatau ona malamalama tagata uma i le taimi, ma le nofoaga tonu e fai ai le Faamanatuga. Afai e sili atu i le tasi le faapotopotoga e faaaogāina le Maota mo Sauniga e fai ai le latou Faamanatuga, e tāua ona taunuu i le taimi tonu ma tuumuli vave ese atu i se tulaga sologa lelei, ona e utiuti lava le taimi i va o sauniga. E lelei ona fai ni taumafaiga ia ʻalofia le faapotopoto lē talafeagai, i le mea e ulu mai ai i le maota, i le polotito, o ala savali mo le lautele i autafa, ma le mea e paka ai taavale.

◼ Tusi Valaaulia: Po ua tofu tagata talaʻi ma sapalai o valaaulia, ma pe ua latou malamalama i faamatalaga o iai? Po ua outou faataʻitaʻia le auala e faatomua atu ai nei tusi valaau? O ai o le a e valaauliaina? E ao ona fai taumafaiga ina ia tufa uma tusi valaau o iai.

◼ Auala e Femalagaaʻi Ai: E iai nisi o tagata fiafia faapena foʻi ma nisi o uso ma tuafāfine, e ono manaʻomia se auala po o se isi lava fesoasoani. O ā ni faatulagaga ua fai, ina ia saunia ai le fesoasoani o loo latou manaʻomia?

◼ Areto ma le Uaina: Ia faamautinoa e lē tufaina le areto ma le uaina seʻia mavae le goto o le lā. Ia fai ni fuafuaga e faaoo atu le areto ma le uaina i se tasi o le ʻaufaauuina e lē mafai ona auai i le Faamanatuga ona o le soifua matua, pe ua faataotolia foʻi i se gasegase. Ia faamautinoa ua iai le areto ma le uaina tonu lava e manaʻomia—Tagaʻi i le Olomatamata o Fepuari 15, 2003, itulau e 14-15 palakalafa 14, 17.

◼ Maota mo Sauniga: Ia lava se taimi e matuā faamamā lelei muamua ai le maota. O ipu mafolafola, ipu malamalama mo le uaina, se laulau ma se ufi laulau talafeagai, ia muaʻi saunia lelei ma faatulaga i le maota a o leʻi amataina le Faamanatuga. Afai e faaaogā se isi nofoaga mo le Faamanatuga, ia faamautinoa ua lelei masini faaleotele leo, ina ia mafai e le aofia atoa ona lagona le failauga. E tatau ona muaʻi filifilia le ʻautautua ma i latou e tufaina le areto ma le uaina ma faatonu lelei e uiga i o latou tiute, le faagasologa saʻo o mea e fai, ma ia laʻei e talafeagai ma le mamalu o le sauniga.

I lenei sauniga sili ona tāua, le Faamanatuga o le maliu o Iesu Keriso, e manaʻomia ona tatou sauniuni māeʻaeʻa lelei e lē gata iā i tatou taʻitoʻatasi, ae faapea foʻi o se faapotopotoga. E mautinoa le iai o faamanuiaga a Ieova, iā i latou uma e faaalia le loto talisapaia o mea uma ua saunia mai e Ieova mo le fanau a tagata, e ala i le taulaga a lona Alo pele, o Iesu Keriso.