O le Talaʻiga e Faaauau ai Ona Tatou Malolosi Faaleagaga

1. O ā aogā tatou te maua mai i le galuega talaʻi?

¹ O le fai o so tatou sao maelega i le galuega talaʻi, e faamalosia ai la tatou faiā ma Ieova ma faateleina ai lo tatou fiafia. O le pogai autū lava o lo tatou auai i le talaʻiga o le faafiafiaina o le finagalo o Ieova. Peitaʻi, e ala i le usitaia o le faatonuga ina ia “talaʻi atu le upu,” tatou te maua ai faamanuiaga mai iā Ieova, ma aogā foʻi iā i tatou i le tele o auala. (2 Timo. 4:2; Isa. 48:17, 18) E faapefea la ona faamalosia i tatou e le talaʻiga ma tatou maua ai le fiafia?

2. E faapefea ona faamalosia i tatou i le talaʻiga?

² Ua Faamalosia ma Faamanuiaina i Tatou: E faamalosia i tatou i le talaʻiga e taulaʻi atu i faamanuiaga o le Malo nai lo faafitauli o loo iai i le taimi nei. (2 Kori. 4:18) Pe a faamatala atu aʻoaʻoga a le Tusi Paia i isi, e faamalosia ai lo tatou faatuatua i folafolaga a Ieova, ma atiaʻe ai lo tatou talisapaia o le upu moni. (Isa. 65:13, 14) A o tatou fesoasoani i isi ia tuputupu aʻe la latou faiā ma Ieova ma ‘lē avea ai o ni tagata o le lalolagi,’ ua tatou faamalosia ai lo tatou lava maumauaʻi ia vavae ese mai le lalolagi.—Ioa. 17:14, 16; Roma 12:2.

3. E faapefea ona fesoasoani la tatou talaʻiga iā i tatou e atiaʻe uiga faa-Kerisiano?

³ E fesoasoani le auai i le talaʻiga iā i tatou e atiaʻe uiga faa-Kerisiano. Mo se faaaʻoaʻoga, o le taumafai malosi ia ‘avea ma mea uma i tagata o ituaiga uma’ e fesoasoani iā i tatou ia atiaʻe le lotomaulalo. (1 Kori. 9:19-23) A o tatou talanoa atu iā i latou ua ‘pei o mamoe ua faamanuʻalia ma faileagaina, ua leai so latou leoleo mamoe,’ e faaosofia ai lo tatou tigāalofa ma taumafai e malamalama i tulaga o tagata. (Mata. 9:36) Pe a tatou finafinau e ui i le tetee ma le lē manatu mamafa mai, ua faamalosia ai lo tatou onosai. E faateleina lo tatou olioli, pe a faaaogā lo tatou ola e fesoasoani ai i isi.—Galu. 20:35.

4. O le ā sou lagona o iai e faatatau i lau faiva?

⁴ Maʻeu se faamanuiaga o le iai o se faiva lea e mafai ona viia ai Lē e tatau ona tatou tapuaʻi i ai! E faamalosia i tatou i le faiva. E maua ai le anoanoaʻi o faamanuiaga e i latou ua auai atoatoa i le “molimau atoatoa i le tala lelei.”—Galu. 20:24.