O le Talaʻiga e Faaauau ai Ona Tatou Malolosi Faaleagaga

1. O ā aogā e tatou te maua mai i le galuega talaʻi?

¹ O le faia o so tatou sao maelega i le galuega talaʻi, e faamalosia ai la tatou faiā ma Ieova, ma faateleina ai lo tatou fiafia. O le pogai autū lava o lo tatou auai i le talaʻiga, o le faafiafiaina o le finagalo o Ieova. O le usitaʻia o le faatonuga ina ia “talaʻi atu le upu,” e tatou te maua ai faamanuiaga mai iā Ieova, ma e aogā foʻi iā i tatou i le tele o auala. (2 Timo. 4:2; Isa. 48:17, 18) E faapefea la ona faamalosia i tatou e le talaʻiga ma tatou maua ai le fiafia?

2. E faapefea i le galuega talaʻi ona faamalosia ai i tatou?

² Ua Faamalosia ma Faamanuiaina i Tatou: O le auai i le talaʻiga, e faamalosia ai i tatou e taulaʻi atu i faamanuiaga o le Malo nai lo o faafitauli o loo iai i le taimi lenei. (2 Kori. 4:18) Pe a faamatala atu aʻoaʻoga a le Tusi Paia i isi, e faamalosia ai lo tatou faatuatua i folafolaga a Ieova, ma atiaʻe ai lo tatou talisapaia o le upu moni. (Isa. 65:13, 14) A o tatou fesoasoani i isi ia tuputupu aʻe la latou faiā ma Ieova ma ʻlē avea ai o ni tagata o le lalolagi,’ ua faamalosia ai foʻi lo tatou maumauaʻi ia vavae ese mai le lalolagi.—Ioa. 17:14, 16; Roma 12:2.

3. E faapefea ona fesoasoani le talaʻiga iā i tatou e atiaʻe ai uiga faa-Kerisiano?

³ E tatou te atiaʻe uiga faa-Kerisiano e ala i le auai i le talaʻiga. O se faaaʻoaʻoga, o le taumafai malosi ia ʻavea ma mea uma i tagata o ituaiga uma,’ e fesoasoani iā i tatou e atiaʻe ai le lotomaulalo. (1 Kori. 9:19-23) O le talanoa atu iā i latou ua ʻpei o mamoe ua faamanuʻalia ma faileagaina, ua leai so latou leoleo mamoe,’ e faaosofia ai lo tatou tigā alofa ma taumafai e malamalama i o latou tulaga. (Mata. 9:36) Pe a tatou finafinau e ui i le tetee ma le lē ano mai o tagata, o le a faamalosia ai lo tatou onosaʻi. E faateleina lo tatou olioli, pe a faaaogā lo tatou ola e fesoasoani ai i isi.—Galu. 20:35.

4. O le ā sou lagona e faatatau i lau faiva?

⁴ O se faamanuiaga le iai o se faiva lea e mafai ona viia ai Lē e tatau ona tatou tapuaʻi i ai! E faamalosia i tatou e le galuega talaʻi. E maua e i latou e auai atoatoa i le “molimau māeʻaeʻa i le tala lelei,” le anoanoaʻi o faamanuiaga.—Galu. 20:24.