La Tatou Faiva—O se Faailoaga o lo Tatou Alofa i le Atua
1. O le ā na uunaʻia e le alofa i le Atua Iesu e fai?
1 Na uunaʻia e le alofa Iesu e faataunuu lana faiva. Sa avea vala uma o le faiva a Iesu o ni faamaoniga matilatila o lona alofa mo Ieova. Na fetalai Iesu: “Ina ia iloa e le lalolagi ou te alofa i le Tamā, ma ua tuuina mai e le Tamā iā te aʻu poloaʻiga ina ia ou faia, o lea ua ou faia ai.” (Ioa. 14:31) I le avea ai ma soo o Iesu o loo mulimuli i ona tulaga aao, ua iā i tatou foʻi le faaeaga e faailoa atu lo tatou alofa loloto i le Atua e ala i la tatou faiva.—Mata. 22:37; Efe. 5:1, 2.
2. E faapefea i lo tatou alolofa iā Ieova ona aafia ai la tatou faiva?
2 “Ia Faapaiaina Lou Suafa”: Pe a tatou faaaogā ma le maelega avanoa uma e talanoa ai i isi e faatatau iā Ieova ma lona Malo, ua tatou faaalia ai lo tatou alolofa i le Atua, ma i le faia faapea, ua tatou saosaolaumea ai i le faapaiaina o lona suafa. (Sala. 83:18; Eseki. 36:23; Mata. 6:9) E pei lava ona sa iai i le faiva a Iesu, o loo faaauau ona tatou faailoa atu e ala i la tatou faiva lo tatou faanaunauga moni ina ia faapaia le suafa o Ieova ma ia faia lona finagalo.—Mata. 26:39.
3. O le ā le auala ua fesoasoani ai iā i tatou lo tatou alofa iā Ieova e faaauau pea e ui i toʻatugā?
3 E Uunaʻia i Tatou e le Alofa e Fesagaʻia Toʻatugā: Ua aveesea e le alofa iā Ieova so o se pa pupuni lava o iai. (1 Kori. 13:4, 7) E anoanoaʻi tulaga i le soifuaga na fesagaʻia e Iesu sa ono faalavelavea ai le faataunuuina o lana faiva. Ae ui i lea, pe a ia fesagaʻia toʻatugā, o le loloto o lona alofa ma le faanaunauga e fai le finagalo o Ieova, sa fesoasoani iā te ia e faaauau ai pea e ui i faafitauli. (Mare. 3:21; 1 Pete. 2:18-23) O loo tatou feagai foʻi ma le tele o faigatā, ae e fesoasoani lo tatou alofa i le Atua e faaauau ai pea. O lo tatou tausisi pea i le faaaʻoaʻoga na faataatia e Iesu, e tatou te maua ai le mautinoa ma maumauaʻi ai e fai mea uma tatou te mafaia i la tatou faiva. E ui lava e tatou te aafia i teteega mai i aiga, aafiaga o le soifua mālōlōina, āfu le soifua, ia po o le lē ano mai o tagata e pei ona masani ai, e lē taofia ai i tatou mai le faaalia o lo tatou alolofa iā Ieova e ala i le faaauau pea i mea sili tatou te mafai i la tatou faiva.
4. O le ā le faaeaga ua tatou maua ona o lo tatou alolofa iā Ieova?
4 E malosi tele le alofa, ma ua faamanuiaina i tatou i le iai o le tomai e faailoa atu ai lo tatou alofa ma le loto atoa i le Atua e ala i la tatou faiva. (1 Kori. 13:13) A o tatou tu lata atu i le taimi o le a faapaiaina ai e faavavau le suafa o Ieova, tau ina ia “tuputupu pea lo outou alofa.”—Fili. 1:9; Mata. 22:36-38.