Pe sa Avea Muamua Oe ma Paeonia Sauatoa?

1. O le ā le faaeaga ua olioli ai le toʻatele, ae o le ā ua talafeagai mo nisi?

¹ Ua tele tausaga o olioli le faitau afe o tagata i le faaeaga, o le “aʻoaʻo . . . ma folafola atu le tala lelei,” i le avea ma faifeʻau faataimi atoa. (Galu. 5:42) Peitaʻi, o nisi ua lē toe paeonia ona o māfuaaga eseese. Pe afai sa avea muamua oe ma paeonia sauatoa, po o e iloilo ou tulaga i le taimi nei, ina ia iloa ai pe mafai ona e toe paeonia?

2. Aiseā e tatau ai i ē na paeonia muamua, ona toe iloilo o latou tulaga i le taimi nei?

² Suia Tulaga o Mea: Atonu e lē o toe iai le tulaga lea na māfua ai ona tuu lau paeonia. O se faaaʻoaʻoga, afai na e lē toe paeonia ona e leʻi mafai ona e ausia itula manaʻomia e 90 i le masina, pe mafai ona e toe paeonia ona o lea ua faaitiitia itula i le 70? Po ua faaitiitia lou taimi faigaluega ma au tiute tauave i le aiga, talu ona e lē toe paeonia? O se tasi tuafafine na tuu lana paeonia ona o lona soifua mālōlōina, na mafai ona toe paeonia i le 89 o ona tausaga. Na atoa le tausaga e lē o toe alu i le falemaʻi, ma manatu ai loa ua lava lona malosi e toe paeonia ai!

3. E faapefea ona felagolagomaʻi sui o le aiga, ina ia fesoasoani i se tasi o le aiga ia paeonia?

³ Atonu e te leʻi paeonia muamua, ae e iai se tasi o lou aiga ua lē toe paeonia ona o le tausia o se tasi o le aiga, e pei o se tuaa ua matua. (1 Timo. 5:4, 8) Afai o lea, pe mafai e oe po o isi o le aiga ona faia nisi mea ina ia fesoasoani ai? Aiseā e lē talanoa faatasi ai na mataupu? (Faata. 15:22) Pe a felagolagomaʻi tagata o le aiga ina ia mafai ona paeonia se tasi o i latou, e mafai ona lagona e tagata uma o loo faia so latou sao.

4. Ae faapefea pe afai e lē o mafai ona e toe paeonia i lenei taimi?

⁴ Aua e te lotovaivai pe afai e lē o mafai ona e toe paeonia, ona o ou tulaga i le taimi nei. O lou lotomalie e faia faapea, e faafiafiaina ai Ieova. (2 Kori. 8:12) Faaaogā i lau faiva i le taimi nei tomai na e maua i le avea o se paeonia. Ia tatalo e tusa ai ma lou faanaunauga, ma ia mataalia mo avanoa e fetuunaʻi ai ou tulaga. (1 Ioa. 5:14) Ma atonu mulimuli ane, o le a tatala e Ieova mo oe “se faitotoʻa lautele e fai ai le galuega,” ona e toe olioli ai lea i le avea ma paeonia sauatoa!—1 Kori. 16:9.