Le Tusi Mai le Vaega Pule

I Aumea Molimau a Ieova Uma:

Maʻeu le mataʻina o nei taimi! Ma e maʻeu foʻi lo tatou fiafia! E matou te matuā fiafia e galulue “soosootauʻau” ma outou uso ma tuafāfine peleina, i le avatuina o se molimau sili e uiga iā Ieova lo tatou Tamā i le lagi.—Sefa. 3:9; Ioa. 14:12.

O le olioli i le auaunaga iā Ieova, e lē faapea ai ua leai ni o tatou faafitauli faigatā. I le tausaga faaleauaunaga ua mavae, sa pagatia ai nisi o outou i tulaga faigatā ona o mafuiʻe, lologa, afā, ma isi mala mataʻutia faalenatura. (Mata. 24:7) E toʻatele o loo tauivi i aso taʻitasi ma le tino vaivai ona o āuga o maʻi ma le tino matua. O loo tauivi i tatou uma ma tulaga faigatā ona o le faatuputeleina pea o “tigā o puapuaga.” (Mata. 24:8) O nisi o atunuu e pei o Armenia, Eritrea, ma Korea i Saute, ua faafalepuipuiina ai le toʻatele o o tatou uso ona o lo latou faatuatua.—Mata. 24:9.

O le ā ua fesoasoani iā i tatou ina ia iai pea se vaaiga saʻo, e ui i nei faigatā? Ua faamanatu mai iā i tatou e le mau mo le tausaga 2010, se tasi o vala tāua: ʻE tumau i mea uma le alofa. E lē uma le alofa.’ (1 Kori. 13:7, 8) Ioe, o lo tatou alolofa o le tasi i le isi ma le alolofa iā Ieova, ua faamalosia ai i tatou e tutumau faamaoni.

Ua ofo le toʻatele o ē ua faapea mai o Kerisiano, i le tele ua oo iai ma le faifai pea o la tatou galuega talaʻi. E ui atonu e latou te lē ioe i o tatou talitonuga ma aʻoaʻoga, ae ua mafai ona faapea mai nisi, “Ua outou faia le galuega e tatau ona matou faia!” O le ā se māfuaaga ua mafai ai e Molimau a Ieova ona talaʻi pea i aso taʻitasi? O le tali lava, o le alofa. I le pei o lo tatou Tamā i le lagi, e tatou te lē mananaʻo ia faaumatia se tasi. (2 Pete. 3:9) O le tumutumuga fou o tagata talaʻi e 7,508,050, na faamauina i le tausaga faaleauaunaga ua mavae, e iloa ai e tatou te naunau ia salamō tagata uma. O ai nisi faalapotopotoga faalelotu, o loo tauofo ma le tiotio le toʻatele o latou tagata e ō atu e talaʻi?

Ua faalaeiauina i tatou i le iloa o loo faaauau ona faataunuu le valoaga a Isaia: “O aso e gata ai, e oo ina faatumauina ai le mauga o le fale o Ieova i luga o tumutumu o atumauga, e faamaualugaina foʻi e sili i aʻega; ma e gasolo ane i ai nuu uma.” (Isa. 2:2-4) E aofia ai i le mano o mano o ē o loo gasolo atu i le fale o Ieova, le toʻa 294,368 o ē na papatisoina i le tausaga faaleauaunaga ua mavae. E tatou te talia fiafia nei uso ma tuafāfine pele i la tatou faalapotopotoga. Seʻi uunaʻia i tatou e le alofa faa-Kerisiano, e faaauau ona fesoasoani iā i latou e tau faasaga i osofaʻiga a lo tatou fili, o Satani le Tiapolo.—1 Pete. 5:8, 9.

O le tumutumuga fou e 18,706,895 o ē na auai i le Faamanatuga i le Aso Lua, Mati 30, 2010, ua faaalia ai e faitau miliona isi tagata, e mafai ona aufaatasi mai i la tatou tapuaʻiga iā Ieova. E tatou te fiafia ai, ona e leʻi aumaia e Ieova le iʻuga o lenei faiga amioleaga o mea! I le taimi nei, o le alofa, ua fesoasoani iā i tatou e tumau ai pea.—2 Tesa. 3:5.

I le tele o Tauaofiaga Itumalo “Ia Mafuta Pea iā Ieova!” ia na faia i le lalolagi atoa i le 2010, na faamalosia ai la tatou faiā ma Ieova, lo tatou Tamā i le lagi. Ua moni ai upu a le faisalamo: “E fiafia foʻi le nuu e fai Ieova ma o latou Atua!” (Sala. 144:15) Po o le ā lava e ono tupu i le lumanaʻi, ae e tatou te mautinoa afai e faatasi Ieova ma i tatou, e leai lava se mea e tatou te fefefe ai. (Sala. 23:4) Ua lē o toe umi, ae ʻfaalēaogāina galuega a le Tiapolo,’ e Ieova e ala i lona Alo. (1 Ioa. 3:8) O le mea moni, o loo tatou moomoo ia oo mai ia lenā aso! Ae i le taimi nei, o loo tele pea a tatou galuega e fai.—1 Kori. 15:58.

Ia mautinoa e matou te manatua “e lē aunoa” outou i a matou tatalo. (Roma 1:9) Tau ina “ia outou faatumau iā te outou i le alofa o le Atua, a o faatalitali atu i le alofa mutimutivale o lo tatou Alii o Iesu Keriso, lea e iʻu ai i le ola e faavavau.”—Iuta 21.

E matou te alolofa atu iā te outou uma!

O o outou uso,

Vaega Pule o Molimau a Ieova