Pe Mafai ona e Auai i le Talaʻiga i Aso Sa?
1. O le ā e tatou te aʻoaʻoina mai i gaoioiga a Paulo ma ana aumea i Filipi?
1 O le Aso Sapati, o se aso sa mālōlō ai le toʻatele o tagata Iutaia i Filipi. Na asiasi atu Paulo ma ana aumea i le aai, a o faagasolo se tasi o a latou malaga faamisionare. E leai se tasi o le a faitioina fua i latou pe a mālōlō mai i la latou galuega talaʻi i lenā aso. Peitaʻi, na latou iloa, e faapotopoto tagata Iutaia i fafo o le aai e tatalo, o lea na latou faaaogā ai le avanoa e talaʻi atu ai iā i latou. Maʻeu le fiafia o Paulo ma ana aumea ina ua faalogo Litia, ma mulimuli ane papatiso lona aiga atoa! (Galu. 16:13-15) Talu ai o le toʻatele o tagata i aso nei e mālōlō i le Aso Sa, aiseā la e lē faaaogā ai se vaega o lenā aso e talaʻi atu ai iā i latou?
2. O ā luʻitau ua manumalo ai tagata o Ieova, ina ia talaʻi i Aso Sa e aunoa ma le faalavelavea?
2 Le Tauiviga e Talaʻi i Aso Sa: I le faagasologa o le 1927, na faalaeiauina ai tagata o Ieova e faaalu se vaega o Aso Sa uma i le talaʻiga. O le iʻuga na vave ona tetee mai tagata. E toʻatele na puʻeina faapagota i le Iunaite Setete, ona o le lē usitaʻia o tulafono o le Sapati i Aso Sa, saveʻuina o le filemu, ma le faatau atu o mea e aunoa ma se laisene. Ae e leʻi faavaivai ai tagata o Ieova. I vaitausaga o le 1930, na latou faamaopoopoina ai “tauiviga a vaega,” ia e galulue faatasi ai ni faapotopotoga e felataʻi e galueaʻiina se oganuu. I nisi o taimi sa faigatā i taʻitaʻi ona puʻea faapagota i latou, ona o le toʻatele. Pe e te talisapaia moni le faataulagaina na faia e na uso, ina ia tatou saʻoloto ai e talaʻi i Aso Sa e aunoa ma le faalavelavea?
3. Aiseā e avea ai le Aso Sa ma aso e sili ona lelei e talaʻi ai?
3 Se Aso e Sili Ona Lelei e Talaʻi Ai: O le toʻatele o tagata e maua i o latou aiga i Aso Sa. E masani ona latou toʻafimālie. O nisi o tagata lotu e fiafia e talanoa e uiga i le Atua i lenā aso. Afai tatou te auai i sauniga i Aso Sa, o lenā la ua tatou laʻei mo le talaʻiga, aiseā la e lē fuafua ai e talaʻi a o leʻi faia, po o le māeʻa foʻi o le sauniga? Afai e manaʻomia, sauni sina taumafataga māmā e te alu ma ave.
4. O le ā le olioli e tatou te tofo i ai pe a faaalu se vaega o le Aso Sa i le faiva?
4 Afai tatou te faaaluina se vaega o le Aso Sa i le faiva, e lava lelei le taimi o totoe o le aso e tatou te mālōlō ai. Ma o lenā mālōlōga e ō faatasi ma le olioli ona sa e auai i le auaunaga paia. (Faata. 19:23) Atonu foʻi e tatou te tofo i le olioli, i le mauaina o se tasi e pei o Litia!