Le Tusi Mai Le Vaega Pule

I Aumea Molimau a Ieova Uma:

O se fiafiaga sili iā i matou le tusi atu iā te outou o auauna faamaoni a Ieova, lea ua silia nei i le fitu miliona le aofaʻi. Pe a outou feiloaʻi ma se uso po o se tuafafine talitonu mai i se isi vaega o le lalolagi, e te lagonaina i le taimi lava lenā se faiā faapitoa o le alofa ma lenā tagata. (Ioa. 13:34, 35) E mautinoa, a o e faitauina lenei Tusi Tausaga, o tala mataʻina o le faatuatua ma le faamaoni o o tatou uso ma tuafāfine i atunuu eseese, e atili ai ona e lagonaina lenā faiā tutasi.

O lipoti mai i vaega eseese o le lalolagi ua faaalia mai ai, o le toʻatele o outou o loo faatāuaina la outou polokalame o le Tapuaʻiga a le Aiga. O loo faaaogā e outou o ē e iai fanau iti le tele o auala e faaoso naunau, ina ia tapuʻe ma faatumau ai le uaʻi mai o a outou fanau iti. (Efe. 6:4) Ua atili ai ona māfana mafutaga a ulugalii ona o fetufaaʻiga faaleagaga e maua mai i lenei polokalame. (Efe. 5:28-33) Ioe, o loo maua e tagata taʻitoʻatasi ma aiga le tele o aogā mai i lenei faatulagaga mo le suʻesuʻeina loloto o le Afioga a le Atua.—Iosua 1:8, 9.

E matou te lagona le tigā alofa mo outou uma o ē na mafatia ona o mala faalenatura talu ai nei. E avea lenei avanoa e matou te faafetai atu ai i le toʻatele o ē na auai e aunoa ma le faatalatū, i galuega fesoasoani a o faagasolo na taimi faigatā. (Galu. 11:28-30; Kala. 6:9, 10) E lē gata i lea, i faapotopotoga taʻitasi, o loo iai outou o ē o loo manatu mamafa i manaʻoga faaletino o o tatou uso, ma tausolomua e fesoasoani atu iā i latou. I le pei o Toreka i aso anamua, ua outou faia le tele o “galuega lelei ma . . . meaalofa.” (Galu. 9:36) Ia outou mautinoa o loo silafia e Ieova nei mea uma, ma o le a ia tauia outou e tusa ma a outou galuega.—Mata. 6:3, 4.

I nisi atunuu, ua solipalaina ai a outou aiā tatau e i latou o ē ua faasesēina tulafono, ina ia “fafauina [ai] faalavelave e ala i le poloaʻiga.” (Sala. 94:20-22) I le iloaina na muaʻi valoia e Iesu na ituaiga sauāga, ua outou tumau ai ma le lototetele ma taulaʻi atu iā Ieova o lo outou sulufaʻiga. (Ioa. 15:19, 20) E faamautinoa atu o loo taʻua e lē aunoa outou i a matou tatalo, a o faaauau ona outou “tali atu i luma o tagata uma e fesili mai iā te outou i le māfuaaga o lo outou faamoemoe.”—1 Pete. 3:13-15.

E matou te faamālō atu ma le māfana i le faitau miliona o outou o ē o loo tumau i le amio mamā i tausaga taʻitasi, e ui o loo faatogafiti ona faaauiluma e Satani amioga lē mamā. A o faatuputupulaʻia le leaga o tapulaa tau amio a le lalolagi, e “maua pea e outou le mana mai i le Alii, ma le tele o lona malosi.” (Efe. 6:10) Ua outou “oofu i le ofutau atoatoa mai i le Atua,” ma tutūmausalī ai e tetee atu i “togafiti a le Tiapolo.” (Efe. 6:11, 12) Ia outou iloa o loo faaaogā e Ieova la outou faaaʻoaʻoga ina ia avatu ai se tali manino i lē o loo taufaifai mai, o Satani!—Faata. 27:11.

O se fiafiaga lo tatou iloaina e faapea i le 2011, e 19,374,737 i latou na auai i le Faamanatuga o le maliu o le Alii. O lenā fuainumera mataʻina o i latou na auai, na māfua ona o la outou tali fiafia mai i le valaaulia mo le paeonia lagolago iā Aperila i le tausaga ua mavae. Ua mafai ona lagona e le faitau miliona o tagata i le lalolagi le leo autasi o viiga iā Ieova, mai i ana Molimau faamaoni! (Roma 10:18) E tusa po o oe o se tasi o le 2,657,377 sa auauna o ni paeonia lagolago i lenā masina, pe sa e taumafai e faateleina au galuega i nisi o auala, ae sa outou faafiafiaina uma i matou ona o lo outou agaga lotomalie ma le maelega i le auaunaga.—Sala. 110:3; Kolo. 3:23.

I le tausaga ua mavae, e 263,131 tagata fou na faailogaina lo latou tuuina atu iā Ieova. E matou te faafetai iā Ieova i lenei mea, ma e matou te faafetai atu foʻi iā te outou uma na aufaatasi ma i matou, i le faalauteleina atu o le valaaulia i isi e faapea: “ʻInā sau ia!’ Ia sau foʻi so o se tasi e fia inu; ma o so o se tasi e manaʻo i ai, ia ave fua le vai o le ola.” (Faaa. 22:17) Aemaise lava ina ua uma ona iloiloina i a tatou tauaofiaga itumalo o le 2011 vala o le Malo o le Atua ua faavaeina, ua atili ai ona tatou faapea atu nai lo o se isi lava taimi, “Ia oo Mai le Malo o le Atua!” Ona ua faalaeiauina i le faamautinoaga a Iesu e faapea “ou te vave alu atu,” ua tatou faaopoopo atu ai ma le lotoatoa o tatou leo i le tali a le aposetolo o Ioane e faapea: “Amene! Inā maliu mai ia le Alii e, Iesu.”—Faaa. 22:20.

A o faaauau ona outou mataala mo le taimi e tupu ai lenā mea mataʻina, faamolemole ia mautinoa e matou te alolofa tele iā te outou taʻitoʻatasi o uso ma tuafāfine pele, o ē o loo faamaonia lo outou alolofa mo Ieova “e ala . . . i gaoioiga ma le faamaoni”!—1 Ioa. 3:18.

O outou uso,

Vaega Pule a Molimau a Ieova