Māfuaaga e Sefulu Lua e Talaʻi Ai

Aiseā e tatou te talaʻi ai ma aʻoaʻo atu le tala lelei? Po o le māfuaaga autū ina ia fesoasoani i tagata lotofaamaoni ia maua le ala i le ola? (Mata. 7:14) O le māfuaaga muamua lenā o loo taʻua i lalo, peitaʻi e lē o le māfuaaga autū lenā. O lē fea o māfuaaga e 12 o loo taʻua i lalo e māfua ai ona auai i le talaʻiga, e te manatu e sili ona tāua?

1. E fesoasoani e faasaoina ai ola.—Ioa. 17:3.

2. Ina ia lapataʻia ai tagata amioleaga.—Eseki. 3:18, 19.

3. E fesoasoani i le faataunuuina o le valoaga o le Tusi Paia.—Mata. 24:14.

4. O se faailoaga o le amiotonu o le Atua. E lē mafai ona tuuaʻia Ieova e faapea e na te leʻi tuuina mai se avanoa i tagata amioleaga e salamō ai, a o leʻi faaumatia i latou.—Galu. 17:30, 31; 1 Timo. 2:3, 4.

5. E mafai ai ona totogi la tatou aitalafu e ala i le tuuina atu o le fesoasoani faaleagaga i tagata, o ē ua faatauina i le toto o Iesu.—Roma 1:14, 15.

6. E mafai ai ona tatou ʻalofia le nofosala i le toto.—Galu. 20:26, 27.

7. O se mea e manaʻomia mo lo tatou faaolataga.—Eseki. 3:19; Roma 10:9, 10.

8. E faaalia ai le alofa i tuaoi.—Mata. 22:39.

9. E faaalia ai le usiusitaʻi iā Ieova ma lona Alo.—Mata. 28:19, 20.

10. O se vaega o la tatou tapuaʻiga.—Epe. 13:15.

11. E faailoa atu ai lo tatou alolofa mo le Atua.—1 Ioa. 5:3.

12. E saosaolaumea i le faapaiaina o le suafa o Ieova.—Isa. 43:10-12; Mata. 6:9.

O le mea moni, e lē na o le pau nei o māfuaaga e tatou te talaʻi ai. O se faaaʻoaʻoga, o le talaʻiga e faamalosia ai lo tatou faatuatua ma tatou maua ai foʻi le faaeaga e avea ma ʻaufaigaluega faatasi ma le Atua. (1 Kori. 3:9) Peitaʻi, o le māfuaaga e sili ona tāua e auai ai i le talaʻiga, o le māfuaaga lona 12. E tusa pe faalogo mai tagata iā i tatou pe leai, ae o le talaʻiga e saosaolaumea i le faapaiaina o le suafa o le Atua, ma mautali atu ai Ieova i lē o loo taufaifai mai. (Faata. 27:11) O lea la, ua iā i tatou māfuaaga e sili ona lelei e ʻlē aunoa ai ona aʻoaʻo atu ma folafola atu le tala lelei.’—Galu. 5:42.