Ia Fiafia i Au Galuega Mamafa
1. O le ā e ono faaitiitia ai lo tatou maelega i le faiva?
1 Na foafoaina le tagata ina ia “iloa e ia mea lelei ona o lana galuega mamafa.” (Fai. 2:24) Peitaʻi, pe afai e tatou te lē iloa iʻuga lelei o la tatou faiva, o le a oo la iā i tatou le lotovaivai, ma iʻu ina faaitiitia pe e lē tumau ai le maelega. O le ā e fesoasoani iā i tatou ina ia faatumauina se vaaiga saʻo?
2. Aiseā e tatau ai ona iai se vaaiga saʻo e tusa ai o la tatou faiva?
2 Se Vaaiga Saʻo: Ia manatua, e ui e toʻaitiiti i latou sa talia le feʻau a Iesu, ae e mautinoa sa taulau manuia lana faiva. (Ioane 17:4) I lana talafaatusa i le tagata lūlū fatu, na ia valoia ai o le a lē taliaina e le toʻatele le feʻau o le Malo, lea ua tai pei o se fatu ua lūlūina. (Mata. 13:3-8, 18-22) Peitaʻi, e iai pea iʻuga lelei e maua mai iā tatou taumafaiga fitā.
3. E faapefea ona “fua mai” la tatou galuega e tusa lava pe e lē talilelei mai tagata?
3 Auala e Fua Tele Mai Ai: E tusa ai o le talafaatusa a Iesu, o le a “fua mai” i latou e taliaina le feʻau. (Mata. 13:23) Pe a tātupu le lālā saito ma matua, o le a fua mai ai ni fatu fou, ae e lē o ni tamaʻi lālā saito. O lea, o Kerisiano e taulau manuia, e lē faapea e latou te mauaina ni soo fou i taimi uma, ae e latou te lūlū pea fatu o le Malo, e ala i le talaʻi atu pea. O lenā tulaga o le a maua ai le faamalieina, e tusa lava po o le ā le tali mai a tagata. O loo tatou saosaolaumea i le faapaiaina o le suafa o Ieova. (Isa. 43:10-12; Mata. 6:9) O na “fua o laugutu” e faafiafiaina ai Ieova. (Epe. 13:15, 16) Ua tatou maua le faaeaga e avea ai o se ʻaufaigaluega faatasi ma le Atua.—1 Kori. 3:9.
4. O ā iʻuga o la tatou faiva e tatou te ono lē iloa?
4 E lē gata i lea, atonu e tatou te lē o iloaina iʻuga lelei o a tatou taumafaiga fitā. Atonu sa iai nisi sa faalogo i le talaʻiga a Iesu na faatoʻā avea ma soo, ina ua faamutaina lana faiva i le lalolagi. I se tulaga tutusa, atonu e faatoʻā tuputupu aʻe le fatu o le Malo i le loto o se tasi i se taimi mulimuli ane, ma e ono sau o ia i le upu moni e aunoa ma lo tatou iloa. O le mea moni, e tele iʻuga lelei e maua mai i la tatou faiva. O lea la, seʻi “saga fua tele mai” pea a tatou galuega ma faamaonia ai o i tatou o soo o Iesu.—Ioane 15:8.