Ia Faaaʻoaʻo i le ʻAuperofeta​—Amosa

1. Aiseā e avea ai ma puna o faalaeiauga le faaaʻoaʻoga a Amosa?

¹ Pe na iai se taimi na e lagona ai le lē agavaa e talaʻi atu ona e lē lelei lou tulaga tauaʻoaʻoga ma e lē tagolima lou aiga? Afai o lea, e mafai la ona faamāfanafanaina oe i le faaaʻoaʻoga a Amosa. O ia o se leoleo mamoe ma o se faifaatoʻaga, peitaʻi na faamalosia o ia e Ieova ina ia folafola atu se feʻau tāua. (Amo. 1:1; 7:​14, 15) I aso foʻi nei, o loo faaaogā e Ieova i latou e lotomaulalo ma faamaulalo. (1 Kori. 1:​27-​29) O ā nisi lesona e mafai ona aʻoaʻoina mai i le perofeta o Amosa e aogā i la tatou faiva?

2. Aiseā e tatau ai ona tatou tumau e ui i teteega e tulaʻi mai i le fanua?

² Tumau ma le Faamaoni e ui i Tofotofoga: O Amasia o se ositaulaga e tapuaʻi i le tamaʻi povi, ma e sau o ia mai i le malo o ituaiga e sefulu o Isaraelu i le itu i mātū. Ina ua faalogo o ia e faatatau i valoaga a Amosa, na matuā ita o ia ma peiseaʻī e faapea atu: ‘Alu ese! O loo iai la matou tapuaʻiga!’ (Amo. 7:​12, 13) Na mimilo sesē e Amasia upu a le perofeta ina ua ia talosaga atu i le tupu o Ierepoamo e taofia le galuega a Amosa. (Amo. 7:​7-11) Peitaʻi e leʻi faavaivai ai Amosa. I aso foʻi nei, o loo saʻilia e taʻitaʻi lotu le lagolagosua a faigāmalo ina ia sauāina tagata o Ieova. Ae ua faamautinoa mai e Ieova, o auupega uma e faasagatau mai iā i tatou e lē manuia.​—Isa. 54:17.

3. O ā vala e lua o le feʻau o loo tatou folafolaina i aso nei?

³ Folafola Atu Sala Faafaamasinoga a le Atua ma Faamanuiaga i le Lumanaʻi: E ui na valoia e Amosa sala faafaamasinoga faasaga i le ituaiga e sefulu o le malo o Isaraelu, ae na ia faaiʻu lana tusi i le folafolaga o le toe faafoʻisiaga ma faamanuiaga. (Amo. 9:​13-​15) O loo tatou faailoa atu foʻi le “aso faamasino” a le Atua lea e faaloloʻi mai, ae e na o sina vaega lenā o le “tala lelei o le malo” lea e tatau ona tatou faailoaina atu. (2 Pete. 3:7; Mata. 24:14) O le faaumatiaina e Ieova o tagata amioleaga iā Amaketo, o le a saunia ai le ala mo le lalolagi parataiso.​—Sala. 37:34.

4. O le ā se faamautinoaga e tatou te iloa ai e mafai ona tatou faataunuuina le finagalo o Ieova?

⁴ O le feagai ai ma teteega a o tatou talaʻia le feʻau o le Malo, e lē taumatea o se mea e tofotofoina ai la tatou filifiliga maumauaʻi, ina ia ola e ōgatusa ma lo tatou tuuina atu iā Ieova faapea le faia o lona finagalo. (Ioa. 15:19) Ae ui i lea, ua tatou mautinoa o le a saunia mai e Ieova mea e tatou te manaʻomia ina ia faataunuu ai lona finagalo, e pei foʻi ona ia faia iā Amosa.​—2 Kori. 3:5.