“Ia Faapotopoto le Nuu”
1. Aiseā e tutusa ai le faapotopotoina o le nuu o Isaraelu, ma tauaofiaga itumalo ma faavaomalo?
1 E leʻi umi talu ona tuua e Isaraelu Aikupito, ae faatonuina loa e Ieova Mose e “faapotopoto le nuu” i le Mauga o Sinai e faalogo i Ana fetalaiga, ina ia uunaʻia ai i latou e matataʻu iā te Ia, ma aʻoaʻo ai o latou atalii i ona ala. (Teu. 4:10-13) Maʻeu le faafouina o lo latou faatuatua mai lenā faatasiga. I lenei foʻi tausaga, o le a faapotopoto tagata o Ieova i tauaofiaga itumalo ma tauaofiaga faavaomalo ina ia aʻoaʻoina ai i latou e Ieova. O le ā e tatau ona tatou faia ina ia maua ai aogā mai i lenā tauaofiaga?
2. O le ā e tatau ona tatou faia ina ʻia nofosauni’ ai mo le tauaofiaga?
2 ʻIa Nofosauni’: Na poloaʻiina e Ieova Isaraelu ina ʻia nofosauni’ mo le faatasiga i le Mauga o Sinai. (Eso. 19:10, 11) I se tulaga taitutusa, e tatau foʻi ona nofosauni tagata uma e auai i tauaofiaga, ae e lē na o i latou e iai vaega i le polokalame. O se faataʻitaʻiga, e toʻatele i latou e manaʻomia ona fai se faanoi mai le galuega. Atonu e pei lou tulaga o Neemia. Na manaʻo e tuua lana galuega o se tautū uaina a le tupu o Aretaseta, ina ia alu e fesoasoani i le toe fausia o pa o Ierusalema, ae na manatu o ia o le a lē talia e le tupu lana talosaga. O lea na tatalo ai Neemia ma talosaga atu loa ma le faaaloalo i le tupu. Na faatagaina o ia e alu ma na lagolagoina e le tupu le galuega o le toe fausia o pa o Ierusalema. (Nee. 2:1-9) E ese mai i lau faanoi, po ua e nofosauni i tulaga tau femalagaaʻiga ma se nofoaga e te faamautū ai? E fiafia toeaina e fesoasoani atu i so o se tasi e manaʻomia le fesoasoani i tulaga faapena. Ia vave ona taunuu i le tauaofiaga i aso taʻitasi, ma ia nofosauni e “matuā uaʻi atu” i mea e faalogo i ai.—Epe. 2:1.
3. O le ā e fesoasoani iā i tatou e sauniunia ai o tatou loto mo le tauaofiaga?
3 O le isi vala tāua o lo tatou nofosauni, e aofia ai le sauniunia o o tatou loto ina ia faalogo ma aʻoaʻoina mea. (Esera 7:10) E maua le faasologa o le tauaofiaga i le tuatusi i le initaneti o le jw.org, ma e lisiina mai ai matua o lauga taʻitasi faatasi ma mau autū e tasi pe lua, e faavae mai ai na lauga. E lelei foʻi pe a iloilo na manatu i le Tapuaʻiga a le Aiga i le vaiaso a o lumanaʻi le tauaofiaga. O nisi ʻautalaʻi e latou te faia se kopi o le polokalame ma faaaogā e faia ai faamaumauga pupuu i le tauaofiaga.
4. E faapefea i mātua ona aʻoaʻo a latou fanau i taimi o tauaofiaga?
4 ʻAʻoaʻo o Outou Atalii’: O le isi fuafuaga o le faatasiga i le Mauga o Sinai, ina ia mafai ai e mātua Isaraelu ona ʻaʻoaʻo o latou atalii.’ (Teu. 4:10) I le tauaofiaga, e maua ai foʻi e mātua le avanoa e faia ai faapea. E tatau ona nonofo faatasi mātua ma a latou fanau i aso uma o le tauaofiaga, ma fesoasoani iā i latou ina ia faalogo lelei i le polokalame. E mafai e le aiga ona autalu ma talanoa i le polokalame pe a māeʻa aso taʻitasi, pe faaaofia foʻi i la latou tapuaʻiga a le aiga i se taimi mulimuli ane.
5. O ā aogā e maua mai i le auai atu i le tauaofiaga o loma nei?
5 O le faatasiga i le Mauga o Sinai na fesoasoani i tagata Isaraelu e talisapaia ai lo latou faaeaga tutasi o le avea ma tagata o le Atua. (Teu. 4:7, 8) O la tatou tauaofiaga o loo loma nei o le a tatou maua ai foʻi se avanoa e faia ai faapena. E tolu aso o le a tatou ō ese ai mai i le lalolagi amioleaga a Satani, ae o le a tatou olioli i meaʻai faaleagaga ma se faatasiga e faafouina ai i lo tatou parataiso faaleagaga. (Isa. 35:7-9) Talu ai ua latalata mai le aso o Ieova, e tatou te lē fia misia la lenei avanoa e fefaalaeiauaʻi ai ma isi o tatou uso.—Epe. 10:24, 25.