Se Tusi Mai i le Vaega Pule

La Tatou ʻAufaigaluega Pele e:

Maʻeu lo matou fiafia tele e tusi atu iā te outou i le amataga o lenei tausaga mataʻina! I le faaiʻuga o le 2014, e atoa ai le senituri talu ona pule lo tatou tupu o Iesu Keriso i totonu o ona fili.—Sala. 110:1, 2.

I le amataga o lenei tausaga faaleauaunaga i le fonotaga faaletausaga a le Watch Tower Bible and Tract Society of Pennsylvania, na tatalaina ai e le Komiti o le Tusi Paia o le Faaliliuga a le Lalolagi Fou, se faaliliuga o lenei Tusi Paia ua toe teuteuina i le gagana Peretania, ma o se faaliliuga sili lea ua maua e tagata! Ua silia i le 60 tausaga talu ona faaaogā e Ieova ona atalii faauuina i le agaga, ina ia saunia le uluaʻi Faaliliuga a le Lalolagi Fou. (Roma 8:15, 16) Pe e te lē ioe, o le iloaina o lenā mea moni ua tutasi ai lenei faaliliuga?

Ua tele tausaga o faamuamua e le Komiti o Tusitusiga a le Vaega Pule le faaliliuina o le Tusi Paia. I aso nei, ua mafai ona maua le Tusi Paia atoa o le Faaliliuga a le Lalolagi Fou po o se vaega foʻi, i gagana e 121. E matou te faalaeiau outou ina ia faaalia atu iā Ieova lo outou matuā talisapaia o lenei Tusi Paia, e ala i le faitau ma manatunatu loloto i ai i aso taʻitasi. O le faia faapea o le a e vavalalata atu ai i lona Tusitala, o Ieova le Atua.—Iako. 4:8.

E tatou te lagona le tigā alofa pe a tatou faalogo i tofotofoga o loo feagai ma isi o tatou uso ma tuafāfine pele. Atonu o na tofotofoga e faigatā ai iā i latou ona olioli faatasi ma isi o lo tatou ʻauuso. O se faataʻitaʻiga, na matuā suia atoa le tulaga o mea i se aiga i Asia ina ua faafuaseʻi ona pē atoa le tino o le tinā o le aiga, ma na lē mafai e fomaʻi atamamai ona togafitia o ia. Pagā le faanoanoa o le aiga! Ua nafa nei le tamā ma le tausiaina o manaʻoga o si ana avā. Ua faataatia foʻi e lona atalii ma ona afafine e toʻalua se faaaʻoaʻoga lelei o ni Kerisiano, e ala i le lagolagosua atu ma le alofa i o latou mātua. E mautinoa ua maua e lenei aiga, faapea ma outou uma ua fesagaʻia ma le taulau manuia tofotofoga, le olioli ona o le tutumau pea ma le faamaoni. (Iako. 1:2-4) Ua faamautinoa mai e Ieova i le ʻau faauuina faapea ma isi mamoe, o le a tatou maua le olioli tele pe afai e tatou te tutumau pea e ui i tofotofoga, auā o le a faamanuiaina i tatou i le meaalofa o le ola e faavavau!—Iako. 1:12.

I le tausaga ua mavae, e 19,241,252 i latou na auai i le Faamanatuga. Maʻeu le faalaeiauina o i tatou i le vaai atu i le toʻatele o tagata o faamamaluina Ieova ma Iesu Keriso, e ala i le auai i le sauniga e sili ona tāua mo tagata o Ieova. Na matuā faasilisilia le viiga o Ieova i le vaitaimi o le Faamanatuga, a o avea le faitau miliona ma paeonia lagolago i masina o Mati ma Aperila. Maʻeu le faagaeetia o i tatou i lenā mea! E lē gata i lea, e mautinoa le faafiafiaina o outou i le iloa, ua mafai nei e so o se tasi e paeonia lagolago i masina e asia ai lana faapotopotoga e le ovasia o le matagaluega, ona auai i le fono paeonia atoa lea e faatautaia e le ovasia. Ua iloa e i latou e atamamai faaleagaga le tāua o le maelega i le galuega talaʻi ma totonu o le faapotopotoga. O le pisi i mea faaleagaga e fesoasoani iā i tatou ina ia tutūmausalī ai pea, ma tetee atu ai i taumafaiga a le Tiapolo e faavaivaia lo tatou faatuatua, lea e tatou te paʻuʻū ese ai mai i la tatou tamoʻega.—1 Kori. 15:58.

Maʻeu foʻi le faagaeetia o i tatou i le tausaga faaleauaunaga ua mavae, ina ua faailogaina le tuuina atu o i latou e 277,344 e ala i le papatisoga i le vai, ma ua latou aufaatasi atu ai i o latou uso i le lalolagi aoao i le ala i le ola. (Mata. 7:13, 14) E manaʻomia tele e i latou nei la tatou lagolagosua ina ia latou ʻmausalī ai i le faatuatua.’ (Kolo. 2:7) Ia faaauau ona faalaeiau le tasi i le isi ina ia tutumau ai e oo i le iʻuga. (Mata. 24:13) “Ia faamāfanafana i ē mafatia, ia fesoasoani i ē vaivai, ma ia faapalepale i tagata uma lava.” (1 Tesa. 5:14) E lē gata i lea, seʻi o tatou “tatalo e lē aunoa” e faapea: “Ia oo mai lou malo.”—1 Tesa. 5:17; Mata. 6:10.

E faamoemoe o le a outou fiafia e faitau le Yearbook, ma ia outou mautinoa, e matou te alolofa tele iā te outou taʻitoʻatasi, o ē e alolofa iā Ieova!

O o outou uso,

Vaega Pule a Molimau a Ieova