Ia Agaʻigaʻi Pea i Luma o se Tagata Talaʻi
1. O ā faaaʻoaʻoga mai le uluaʻi senituri, e faaalia ai e tatau ona tatou agaʻigaʻi i luma o ni tagata talaʻi?
1 E tatau i Kerisiano ona agaʻigaʻi i luma o ni tagata talaʻi. O le māfuaaga lenā (1) na fesoasoani ai Iesu i ona soo ia agaʻigaʻi i luma i le talaʻiga, (2) na ave ai e Akula ma Pisila ia Apolo, ma “faamatala atili atu ma le saʻo iā te ia le ala o le Atua,” ma (3) na faalaeiau ai e Paulo le faievagelia o Timoteo, ia toʻaga e aʻoaʻo atu ina ia “iloa ai e tagata uma” lona agaʻigaʻi i luma. (Luka 9:1-5; 10:1-11; Galu. 18:24-26; 1 Timo. 4:13-15) E tusa po o le ā le umi o tatou pologa i le Alii i le avea ma tagata talaʻi o le tala lelei, ae e manaʻomia pea ona faaleleia o tatou tomai e talaʻi ai.
2. E faapefea ona tatou aʻoaʻoina mea mai i isi?
2 Aʻoaʻoina Mai i Isi: O se tasi o auala e faaleleia ai o tatou tomai, o le aʻoaʻoina lea o mea mai i isi. (Faata. 27:17) O lea, ia faalogologo lelei i isi a o fai a latou taulimaga. Ia fesili atu mo ni fautuaga patino mai i tagata talaʻi tomai, ma ia faalogologo lelei i a latou fautuaga. (Faata. 1:5) Po o e lē mautonu i le auala e fai ai se toe asiga, amata ai se suʻesuʻega faale-Tusi Paia, pe fai ai isi vala o le talaʻiga? Ia tausolomua e fesili atu i le ovasia o la outou vaega, po o se tagata talaʻi e iai le poto masani mo se fesoasoani. Ae aua neʻi galo, e mafai e le agaga paia o Ieova ona faaleleia o tatou tomai. O lea, ia tatalo e lē aunoa mo le agaga paia.—Luka 11:13.
3. E tatau faapefea ona tatou tali atu i fautuaga?
3 Aua e te ita pe afai e te maua se fautuaga, e tusa pe e te leʻi talosaga mo lenā fautuaga. (Fai. 7:9) I le pei o Apolo, ia talia ma le lotomaulalo le fesoasoani ma ia lotofaafetai. O lou faia faapea e iloa ai lou atamai.—Faata. 12:15.
4. O le ā le māfuaaga autū na taʻua e Iesu e tatau ai ona agaʻigaʻi i luma o se tagata talaʻi?
4 Agaʻigaʻi i Luma ma Faamamaluina ai le Atua: E ala i le faaaogā o talafaatusa, na faalaeiau ai e Iesu ona soo ia agaʻigaʻi i luma o ni tagata talaʻi. Na ia faatusaina o ia i se vine, a o ona soo faauuina o lālā. Na fetalai o ia e teuteuina e le Tamā lālā uma o loo fua mai “ina ia saga fua tele mai.” (Ioa. 15:2) E pei ona manaʻo le pule o se togāvine e fua tele mai lālā o ana vine, e finagalo foʻi Ieova e faaauau ona tatou agaʻigaʻi i luma i le ʻfua o tatou laugutu.’ (Epe. 13:15) O ā iʻuga faamalieloto e tatou te maua pe afai e agaʻigaʻi i luma o ni tagata talaʻi? Ua tali mai Iesu: “Ua faamamaluina loʻu Tamā ona o lenei mea, i lo outou saga fua tele mai.”—Ioa. 15:8.