Ia Faaaogā Tatau Lou Taimi i le Talaʻiga
E 1,945,487,604 itula na faaalu e Molimau a Ieova i le talaʻiga i le tausaga faaleauaunaga i le 2014. O le faamaoniga manino lea o lo tatou filifili e pisi i le auaunaga iā Ieova. (Sala. 110:3; 1 Kori. 15:58) Talu ai “ua itiiti le taimi o totoe,” o lea e ao ai ona faaaogā tatau lo tatou taimi i le talaʻiga, ina ia talanoa atu ai i le toʻatele o tagata.—1 Kori. 7:29.
E manaʻomia le fetuutuunaʻi ina ia faaaogā tatau ai lo tatou taimi i le talaʻiga. O se faaaʻoaʻoga, pe afai e masani ona e faaalu se itula pe sili atu, i se vala patino o le talaʻiga e aunoa ma le talanoa i se tagata, pe e mafai ona e faia ni fetuunaʻiga ina ia e maua ni tagata se toʻatele ma talanoa atu i ai? E eseese le tulaga o mea mai i lea vaipanoa i lea vaipanoa, ae e ono fesoasoani iā te oe fautuaga o loo mulimuli mai, ina ia faaaogā tatau ai lou taimi ma ʻalofia ai ona e “tuʻi i le ʻea.”—1 Kori. 9:26.
Talaʻiga i le Fale i le Fale: O le masani a le ʻautalaʻi mo le tele o tausaga, e amata lo latou aso i le talaʻiga e ala i le talaʻi mai i lea fale i lea fale. Peitaʻi, o le toʻatele o tagata e faigaluega a o faagasolo le aso. Aiseā la e lē taumafai ai e talaʻi mai i lea fale i lea fale i le aoauli po o le afiafi, ona e toʻatele ai tagata e maua atu i o latou fale ma e lē o pisi? Atonu e sili atu iʻuga e maua mai i le molimau atu i nofoaga faitele po o pisinisi a o faagasolo le aso.
Talaʻiga i Nofoaga Faitele: E tatau ona faatutū laulau ma fata e faaali ai tusi ma mekasini, i nofoaga e toʻatele tagata e fepasiaʻi ai i le oganuu a le faapotopotoga. (Tagaʻi i La Tatou Faiva o le Malo o Iulai 2013, itu. 5.) Pe afai ua tau leai ni tagata e fepasiaʻi solo i le nofoaga lea na faatulaga mo le talaʻiga i nofoaga faitele, atonu e filifili le Komiti o le Auaunaga a le Faapotopotoga e faatū le laulau po o le fata i se isi nofoaga o loo toʻatele tagata e fepasiaʻi ai.
Toe Asiga ma Suʻesuʻega Faale-Tusi Paia: Pe e mafai ona faatulaga au toe asiga ma suʻesuʻega faale-Tusi Paia e fai i taimi e lē fua tele mai ai isi vala o la tatou faiva? O se faataʻitaʻiga, pe afai e tele iʻuga lelei e maua pe a talaʻi mai i le fale i lea fale i taeao o Aso Toonaʻi, pe e mafai ona tuu lau suʻesuʻega faale-Tusi Paia e fai i le aoauli po o le afiafi? Pe a fai toe asiga, e lelei i le ʻautalaʻi ona faatulaga se taimi tonu e toe asia ai a latou asiga uma o loo nonofo i se vaipanoa e tasi, ina ia mafai ona tele mea e latou te faataunuuina i le faiva.
E moni e mafai ona tau lo tatou taimi i so o se taimi e tatou te auai ai i le talaʻiga, ae e sili atu ona tele lo tatou olioli pe afai e fua mai la tatou faiva. Pe afai e iai se vala o le talaʻiga e lē o fua mai i se taimi patino, taumafai e fai se isi vala o le faiva. Ia tatalo mo le taʻitaʻiga a Ieova “le Alii o le seleselega,” ina ia mafai ona e faaaogā tatau lou taimi i le talaʻiga.—Mata. 9:38.