Ia Taula‘i Atu Pea i le Faia o Tagata ma Soo
1. O le ā e manaʻomia ina ia faasaoina ai tagata?
1 I le lipoti o le tausaga faaleauaunaga 2014, na atagia mai ai le maelega ma le maumauaʻi o tagata o le Atua e talaʻi atu le tala lelei o le Malo. (Mata. 24:14) Ua sili atu ona toʻatele tagata i aso nei ua oo i ai le feʻau o le Tusi Paia nai lo o se isi lava taimi, ona o la tatou talaʻiga mai i lea fale i lea fale, o tauiviga faapitoa e tufatufa ai sāvali ma valaaulia, faapea auala eseese e tatou te talaʻi ai i nofoaga faitele. Peitaʻi, ina ia faasaoina ola o tagata, e tatau ona tatou fesoasoani iā i latou ina ia avea ma soo o Iesu, e ala i le suʻesuʻe o le Tusi Paia ma i latou.—1 Timo. 2:4.
2. O ā fesili e mafai ona tatou fesili ifo ai, ina ia nofosauni ai e ofo atu se suʻesuʻega faale-Tusi Paia?
2 Ia Nofosauni e Ofo Atu se Suʻesuʻega Faale-Tusi Paia: Pe a faaalia e se tagata le naunau moni, pe e te maumauaʻi e fesili atu mo faamatalaga e faafesootaʻi ai o ia, ma vave ona toe foʻi i le tagata ma le sini ia amata se suʻesuʻega faale-Tusi Paia? O le ā le taimi mulimuli na e faataʻitaʻia ai le faia o se suʻesuʻega faale-Tusi Paia i le uluaʻi asiasiga? Po o e taumafai malosi e ofo atu se suʻesuʻega faale-Tusi Paia i au alāmekasini? Po ua e faaali atu vitiō “Aiseā e Suʻesuʻe ai le Tusi Paia?” ma le “O le ā e Faia i se Suʻesuʻega Faale-Tusi Paia?” i ē e tou te faigaluega pe aʻoʻoga faatasi, o tuaoi, tauaiga, ma isi e te masani ai? Pe a faaaogā se fata po o se laulau e faaali ai lomiga, pe e te taumafai malosi e faailoa atu iā i latou o loo aveina lomiga mo suʻesuʻega, e mafai ona tatou faia se suʻesuʻega faale-Tusi Paia ma i latou e aunoa ma se totogi?
3. O le ā e manaʻomia ina ia taulau manuia ai i le aʻoaʻoina atu o le upu moni?
3 Fesoasoani Mai Ieova ma Iesu: Sa tomua e Iesu lana faatonuga ia ʻfai tagata ma soo,’ i le faaupuga ʻia ō atu.’ Na faailoa mai ai i inei e Iesu, e manaʻomia ni a tatou taumafaiga fitā ma ia tausolomua. Peitaʻi, e lē o tuulafoaʻia na o i tatou, auā na folafola mai e Iesu o le a ia faatasi mai. (Mata. 28:19, 20) E lē gata i lea, ua foaʻi mai e Ieova lona agaga paia ma saunia mai meafaigaluega ma toleniga e tatou te manaʻomia, ina ia aʻoaʻo ai isi i le upu moni. (Saka. 4:6; 2 Kori. 4:7) E mafai ona tatou tatalo i le Atua mo le ʻlotomalie ma le mana e galulue ai’ i lenei galuega tāua.—Fili. 2:13.
4. Aiseā e tatau ai ona tatou taulaʻi atu pea i le faia o tagata ma soo?
4 E tatou te matuā olioli ona o le talaʻia o le tala lelei. Peitaʻi, e sili atu ona tatou olioli pe a tatou aʻoaʻo se tasi i le upu moni, ma fesoasoani i ai ina ia aufaatasi ma i tatou i le “auala e tau atu i le ola.” (Mata. 7:14; 1 Tesa. 2:19, 20) E sili atu i lenā, o le taulaʻi atu pea i le faia o tagata ma soo, ua tatou faafiafia ai Ieova o Lē ʻe lē finagalo e faaumatia se tasi, ae e finagalo ia oo uma lava i le salamō.’—2 Pete. 3:9.