Pe E te Lotomalie e Talosaga mo le Aʻoga mo Tagata Talaʻi o le Malo?

Pe e i le va o le 23 i le 65 ou tausaga ma o loo e iai i le auaunaga faataimi atoa? Pe e lelei lou soifua mālōlōina, ma e mafai ona e auauna i so o se nofoaga o loo tele ai le manaʻoga? Pe afai o lau tali o le ioe, pe na e mafaufau e talosaga mo le Aʻoga mo Tagata Talaʻi o le Malo? Talu mai le uluaʻi vasega o lenei aʻoga, e faitau afe ulugalii faaipoipo ma uso ma tuafāfine nofofua ua talosaga atu. Peitaʻi, o loo manaʻomia tele ni uso nofofua. Ia talosaga iā Ieova e foaʻi mai iā te oe le faanaunauga, ina ia faafiafiaina o ia ma faaaʻoaʻo i lona Alo. (Sl 40:8; Mat 20:28; Epe 10:7) Pe a uma, ia iloilo auala e mafai ai ona faaitiitia nisi o ou tiute tauave i le aiga, taimi i le galuega, po o au aitalafu, ina ia mafai ai ona e agavaa.

O ā vala o le auaunaga ua mafai ona auauna ai i latou na auai i lenei aʻoga? O nisi na faauu, ua tofia e auauna i vaipanoa e ese le gagana e tautatala ai, pe faia se sao i talaʻiga faapitoa i nofoaga faitele. O nisi na mulimuli ane avea ma ovasia matagaluega, o ni suitulaga i ovasia matagaluega, po o misionare i le fanua. A o e manatunatu i mea e ono mafai ona e faia i le auaunaga iā Ieova, tau ina ia iā te oe le faanaunauga na iai i le perofeta o Isaia e faapea: “O aʻu lenei! Inā auina atu ia aʻu.”​—Isa 6:8.

MAIMOA I LE VITIŌ MISIONARE MO LE FANUA​—O SE ʻAUFAIGALUEGA MO LE SELESELEGA, ONA TALI LEA O FESILI NEI:

• 

  E faapefea ona filifilia misionare mo le fanua?

• 

  O ā galuega lelei o loo faia e misionare ua tofia i le fanua?

• 

  O ā nisi o faamanuiaga o le auaunaga faamisionare?