Auala e Tolu e Faalagolago ai Iā Ieova

Na faatoʻilaloina e Tavita Koliata ona na ia faalagolago iā Ieova. (1Sa 17:45) E finagalo Ieova e faaali atu lona malosi i ana auauna uma. (1No 16:9) E faapefea ona tatou faalagolago i le fesoasoani a Ieova nai lo o tatou lava tomai? O auala nei e tolu:

• Ia tatalo e lē aunoa. Ia tatalo e lē gata mo le faamagaloga pe a uma ona faia se mea sesē ae ia tatalo foʻi pe a faaosoosoina e faia se mea sesē. (Mat 6:12, 13) Ia tatalo e lē gata mo le faamanuia a Ieova i filifiliga ua uma ona e faia, ae ia tatalo foʻi mo le taʻitaʻiga ma le atamai a o leʻi faia se filifiliga.—Ia 1:5

• Ia iai se faasologa o le faitauga Tusi Paia ma suʻesuʻega a le tagata lava ia. Ia faitau le Tusi Paia i aso uma. (Sl 1:2) Ia mafaufau loloto i faaaʻoaʻoga faale-Tusi Paia ma faatatau lesona ua e aʻoaʻoina. (Ia 1:23-25) Ia sauniuni mo le talaʻiga ae aua le faalagolago i lou lava tomai. Ia sauniuni mo le sauniga ina ia e maua ai aogā atoatoa

• Ia galulue faatasi ma le faalapotopotoga a Ieova. Ia mataala i le taʻitaʻiga a le faalapotopotoga ma ia vave ona usitaʻia. (Nu 9:17) Ia usitaʻi i toeaina pe a avatu fautuaga ma faatonuga.—Epe 13:17

MAIMOA I LE VITIŌ LEAI SE MĀFUAAGA E FEFEFE AI I SAUĀGA, ONA TALI LEA O FESILI NEI:

• O ā ni mea na fefefe ai uso ma tuafāfine?

• O le ā na fesoasoani iā i latou e feagai ai ma faalogona fefe?