Se Fesili Faigofie e Maua ai Iʻuga Lelei

E nonofo Mary ma lana tane o Johna i se atunuu o loo talaʻia ai le tala lelei, i le toʻatele o tagata faigaluega mai i Filipaina. I le vaitaimi o le KOVITI-19, na faia ai e Mary ni suʻesuʻega faale-Tusi Paia e lē gata i le atunuu o loo nonofo ai, ae i isi foʻi atunuu. E faapefea?

E fesili atu Mary i tagata o loo latou suʻesuʻeina faatasi le Tusi Paia, “Pe e te iloa se tasi o loo manaʻo e suʻesuʻe i le Tusi Paia?” Pe a latou tali mai e iai, e toe fesili atu Mary, “Pe e mafai ona e fesoasoani mai iā te aʻu e faafesootaʻi o ia?” O le fai atu o lenā fesili faigofie, e masani ona iai ni iʻuga lelei. Aiseā? Talu ai o i latou e talisapaia le Afioga a le Atua, e masani ona mananaʻo e faasoa atu mea ua latou aʻoaʻoina, i o latou tauaiga ma uō e alolofa i ai. O ā ni iʻuga na oo i ai ona o le fai atu e Mary o lenā fesili?

A o suʻesuʻe Mary ma Jasmin, na faailoa atu ai e Jasmin iā Mary nisi o tagata e toʻafā o loo mananaʻo foʻi e faia ni a latou suʻesuʻega. O se tasi o i latou na o Kristine, lea na manaʻo e fai faalua i le vaiaso lana suʻesuʻega, ona o le fiafia i mea na ia aʻoaʻoina. Ina ua fesili Mary iā Kristine pe e na te iloa nisi e fia suʻesuʻe i le Tusi Paia, na tali mai o ia, “Ioe, e iai aʻu uō ou te manaʻo e tou te talanoa.” E na o ni nai vaiaso, ae faailoa atu e Kristine iā Mary nisi o ana uō e toʻafā na mananaʻo e suʻesuʻe. Mulimuli ane, na faafesootaʻi e Kristine isi ana uō, ma na taʻu mai foʻi e i latou na iā Mary isi tagata o loo mananaʻo e fai ni a latou suʻesuʻega.

Na manaʻo foʻi Kristine e suʻesuʻeina e lona aiga i Filipaina le Tusi Paia. O lea, na ia talanoa atu ai i lana tama teine o Andrea. I le taimi muamua, na manatu Andrea, “O Molimau a Ieova o se lotu māvae e lē talitonu iā Iesu, ma e na o le Feagaiga Tuai e latou te faaaogāina.” Ae ina ua uma lana suʻesuʻega muamua, na ia iloa ai e sesē ona manatu. A o faia lana suʻesuʻega, e faapea mai o ia, “Afai o la e fai mai ai le Tusi Paia, o lona uiga la e saʻo!”

A o faagasolo taimi, na faailoa atu ai e Andrea iā Mary nisi o ana uō e toʻalua ma sē e la te faigaluega faatasi, ma na amata ai foʻi ni a latou suʻesuʻega. E lē gata i lea, e leʻi iloa e Mary, a o faia a la suʻesuʻega ma Andrea, e faalogologo ane ai foʻi Angela, le tuafafine tauaso o le tamā o Andrea. I se tasi aso, na fai atu ai Angela iā Andrea ina ia fai iā Mary pe e mafai ona fai sana suʻesuʻega. Na fiafia Angela i mea na ia aʻoaʻoina, ma e uma ane le masina ua tele mau ua ia taulotoina, ma na manaʻo e fai lana suʻesuʻega e faafā i le vaiaso! O le fesoasoani a Andrea, na auai ai e lē aunoa Angela i sauniga e faaaogā ai le Zoom.

Ina ua iloa e Mary o loo iai le tane a Kristine o Joshua i le fale i taimi o a la suʻesuʻega, na fesili atu loa i ai Mary pe fia auai i le la suʻesuʻega. Na tali mai Joshua: “OK, ae e na o loʻu faalogologo lava. Aua neʻi faia mai ni au fesili iā te aʻu. E te fesili mai loa, ou te lē toe fia iai.” E leʻi atoa se lima minute talu ona faia le suʻesuʻega, ae ua tele atu fesili a Joshua nai lo Kristine, ma ua manaʻo e fai foʻi sana suʻesuʻega.

O le fesili faigofie a Mary na iʻu atu ai i le tele o ana suʻesuʻega faale-Tusi Paia. O nisi o i latou na faia e Mary ni fuafuaga ina ia suʻesuʻe ma isi uso ma tuafāfine. Pe a tuufaatasi, e 28 suʻesuʻega faale-Tusi Paia na amata e Mary i atunuu e fā.

E tusa ai o lenei tala fiafia, na papatiso Jasmin, o lē na muamua suʻesuʻe ma Mary, iā Aperila 2021. Na papatiso Kristine iā Me 2022, ma ua toe foʻi i Filipaina i lona aiga. Na papatisoina foʻi isi tagata aʻoga e toʻalua, lea na faailoa atu e Kristine iā Mary. I nai masina talu ona uma ona papatiso Kristine, ae papatiso foʻi Angela, ma ua auauna nei o se paeonia sauatoa. O loo agaʻigaʻi foʻi i luma le tane a Kristine o Joshua, o le la tama teine o Andrea, ma isi tagata suʻesuʻe.

I le uluaʻi senituri, na vave ona oo atu le tala lelei i tauaiga ma uō. (Ioa. 1:​41, 42a; Galu. 10:​24, 27, 48; 16:​25-33) Ia fesili atu i au tagata aʻoga po o isi o loo faaalia le fiafia, “Pe e te iloa se tasi o loo manaʻo e suʻesuʻe i le Tusi Paia?” Pe a e fai atu lenā fesili faigofie, atonu o le a e iloa ai o loo toʻatele nisi o loo mananaʻo e suʻesuʻe le Tusi Paia.