E Faapefea Ona E Faaalia le Lototalisapaia mo le Togiola?

1-2. O le ā e ao ona uunaʻia i tatou e fai ona o le togiola ma aiseā? (2 Korinito 5:​14, 15) (Tagaʻi foʻi i le ata.)

PE AFAI na laveaʻiina oe e se tasi mai i se fale na solo lea na e taomia ai, e mautinoa e te matuā talisapaia le gaoioiga alofa a lenā tagata na faasaoina lou ola. E ui e toʻatele tagata na ia faasaoina, ae ona e te lē manatu māmā i lenā gaoioiga alofa, o lea e te faamautinoa ai e faaleo pe faaalia atu lou lototalisapaia i lenā tagata.

² E pei ona talanoaina i le suʻesuʻega ua mavae, e lē mafai ona tatou laveaʻia i tatou lava mai i āuga o le agasala tuufaasolo. Peitaʻi, o le taulaga togiola a Iesu ua mafai ona laveaʻia ai i tatou. O lenā togiola ua mafai ai ona (1) faamagaloina a tatou agasala, (2) saunia se faamoemoe e saʻoloto mai ai i le agasala tuufaasolo, ma le (3) maua se leleiga ma le Atua. O le togiola foʻi, ua mafai ai ona tatou maua le faamoemoe e ola e faavavau i le lalolagi fou. O lea la, e atagia mai i le togiola le tele o le alofa o Iesu mo i tatou. O le mea moni, na faaalia e Iesu lenā alofa a o leʻi taitai afio mai i le lalolagi. (Faata. 8:​30, 31) O le ā la e ao ona uunaʻia ai i tatou e faia? Na tusi le aposetolo o Paulo “ua uunaʻia i matou ona o le alofa o le Keriso.” (Faitau le 2 Korinito 5:​14, 15.) O lona uiga, e tatau ona uunaʻia i tatou e le alofa o Iesu, ina ia tatou faaalia atu le lototalisapaia mo le togiola ae aua le manatu māmā i ai.

3. Aiseā e eseese ai auala e tatou te faaalia ai le lototalisapaia mo le togiola?

³ E faapefea ona e faaalia le lototalisapaia mo le togiola? Atonu e eseese uma tali a tagata i lenā fesili. Ina ia faataʻitaʻi, seʻi faapea e iai ni tagata se toʻatolu o loo sauni e malaga. E tutusa le nofoaga o le a faimalaga atu i ai, peitaʻi e eseese vaipanoa o loo faimalaga mai ai. O lona uiga, e eseese foʻi auala e ui atu ai. I se tulaga talitutusa, e ui e tutusa lo tatou sini o le faaalia o le lototalisapaia mo le togiola, ae atonu e ese le auala e te faaalia ai le lototalisapaia mai i isi, e fua i le tulaga o loo iai le lua faiā ma Ieova i le taimi lenei. O lea, seʻi o tatou talanoaina pe faapefea ona e faaalia le lototalisapaia mo le togiola, pe afai o oe o se tasi o i latou nei: (1) tagata aʻoga, (2) Kerisiano papatiso, ma le (3) mamoe ua sē ese mai le lafu.

TAGATA AʻOGA

4. O le ā e mātauina e Ieova e faatatau i tagata aʻoga?

⁴ Pe afai o oe o se tagata aʻoga o le Tusi Paia, ia manatua le manatu lenei: O lou aʻoaʻoina o upu moni o le Tusi Paia, o se faamaoniga lenā e iloa ai e finagalo Ieova e avea oe ma ana uō. (Ioa. 6:44; Galu. 13:48) Ua taʻua i le Faataoto 17:​3, “O Ieova e na te suʻesuʻeina loto.” O lona uiga, e mātau pe e silafia e Ieova au taumafaiga uma ina ia aʻoaʻoina mea e faatatau iā te ia. E olioli foʻi o ia i suiga o loo e faia ina ia faafiafiaina lona finagalo. (Faata. 27:11) Ua mafai ona avea oe ma uō a Ieova, ona o le togiola. (Roma 5:​10, 11) O lea, ia aua lava neʻi manatu māmā i aogā o le togiola.

5. E faapefea ona faatatauina e tagata aʻoga le fautuaga o loo i le Filipi 3:16?

⁵ E faapefea la ona e faaalia le lototalisapaia mo le togiola? O se tasi o auala, o le faatatauina lea o le fautuaga a le aposetolo o Paulo na avatu i Kerisiano i Filipi: “Po o le ā lava le tele o lo tatou agaʻigaʻi i luma, ae seʻi o tatou faaauau ona savavali ma le maopoopo e tusa ma lea lava ala.” (Fili. 3:16) O lea, ia aua lava neʻi faatagaina se mea e taofia ai oe mai i le savali pea i le ala o le ola.—Mata. 7:14; Luka 9:62.

6. O le ā e mafai ona faia e tagata aʻoga pe afai e faigatā ona latou faia ni suiga? (Teuteronome 30:​11-14) (Tagaʻi foʻi i le ata.)

⁶ E faapefea pe afai e faigatā ona e talia se aʻoaʻoga o le Tusi Paia? Ia fai ni au saʻiliʻiliga, ma tatalo iā Ieova e fesoasoani mai ina ia e malamalama lelei i lenā aʻoaʻoga. (Sala. 86:11) Pe afai e uma ane e faigatā lava ona e malamalama, ia faaauau pea lau suʻesuʻega. Atonu o le a e malamalama lelei i lenā aʻoaʻoga i se taimi mulimuli ane. Ae faapefea pe afai e iai se masaniga leaga o loo faigatā ona e tuua? Ia manatua, e lē mafai ona faatonuina e Ieova i tatou e faia se mea e lē mafai ona tatou faia. O lona uiga, e mafai lava ona e ola e tusa ma tapulaa a Ieova. (Faitau le Teuteronome 30:​11-14.) Ua ia folafola mai foʻi, e na te fesoasoani iā te oe. (Isa. 41:​10, 13; 1 Kori. 10:13) O lea, ia aua lava le faavaivai. Nai lo o le soona uaʻi i le luʻi o loo e fesagaʻia, ia taulaʻi atu i mea lelei uma ua saunia e Ieova mo oe, lea e aofia ai le taulaga togiola. A o faamalosia lou alofa mo Ieova, o le a e iloa ai “e lē mamafa ana poloaʻiga.”—1 Ioa. 5:3.a

7. O le ā e mafai ona manatunatu loloto i ai le fanau talavou o ē na ola aʻe i le upu moni?

⁷ Ae faapefea le fanau talavou o ē na ola aʻe i le upu moni? O outou foʻi o tagata aʻoga. O le mea moni, ua avea outou ma tagata aʻoga e sili ona tāua a o outou mātua. Ua taʻua i le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8; 1 No. 28:9) Pe a e faia taumafaiga e avea ma uō a Ieova, o le a mafuta vavalalata mai o ia iā te oe. E lē faia faapea e Ieova ona na e ola aʻe i le upu moni, ae e silasila ma uaʻi mai o ia i tagata taʻitoʻatasi e aofia ai ma oe. Ua mafai ona e maua se faiā ma Ieova ona o le togiola. O lea, ia aua lava neʻi e manatu māmā i lenei meaalofa tautele. (Roma 5:​1, 2) A o leʻi oo atu i le Faamanatuga, o se mea lelei le manatunatu loloto i aogā o le maliu o Iesu mo oe. Ia uunaʻia ai oe e faaalia le lototalisapaia mo le togiola, e ala i le faatutū o ni sini faaleagaga ma taumafai e ausia.b

KERISIANO PAPATISO

8. Ua faapefea ona faaalia e Kerisiano papatiso lo latou talisapaia o le togiola?

⁸ Pe afai ua uma ona e papatiso, e mautinoa e tele auala ua e faaalia ai le lototalisapaia mo le togiola. O se faataʻitaʻiga, na e faia ni suiga i lou olaga ina ia maua ai se faiā vavalalata ma Ieova ma avea ma ana uō. Na e usitaʻia foʻi le faatonuga a Iesu e faia isi ma soo. E lē gata i lea, ua tuuina atu lou ola iā Ieova ma papatisoina. Atonu na e fesagaʻia ni luʻi po o ni teteega ona o lau filifiliga e auauna iā Ieova. (2 Timo. 3:12) E ui i lea, o loo e tumau faamaoni pea, ma o se faamaoniga lenā o lou alofa iā Ieova, ma lou talisapaia o le taulaga togiola na ia saunia.—Epe. 12:​2, 3.

9. O le ā le lamatiaga e ao ona nofouta ai Kerisiano papatiso?

⁹ A o faagasolo taimi, e iai se lamatiaga e ao ona tatou nofouta ai o ni Kerisiano papatiso. E mafai ona tatou lē amanaʻia pe manatu māmā i le togiola ma aogā tatou te maua mai ai. Seʻi mātau le mea na tupu i Kerisiano i Efeso i le uluaʻi senituri. Na faamālō atu Iesu iā i latou ona o lo latou tumau. Peitaʻi, na ia faapea atu foʻi: “O le mea lenei ua ou lē fiafia ai iā te oe, ona ua e tuua le uluaʻi alofa sa iā te oe.” (Faaa. 2:​3, 4) E faaalia mai i fetalaiga a Iesu, e mafai ona avea le tapuaʻiga a se Kerisiano o se mea e tau ina fai. O lona uiga, e mafai e se Kerisiano ona tatalo, auai i sauniga ma talaʻiga ona o se mea ua masani ai. Peitaʻi ua lē toe avea le alofa iā Ieova, ma uunaʻiga e na te faia ai faapea. O le ā la e ao ona e faia pe afai ua tupu lenā mea iā te oe?

10. E faapefea ona tatou “manatunatu” pe “naunau” i la tatou tapuaʻiga iā Ieova? (1 Timoteo 4:​13, 15)

¹⁰ Na faalaeiauina e le aposetolo o Paulo le talavou o Timoteo, ina ia “manatunatu” ma “naunau” i lana tapuaʻiga iā Ieova. (Faitau le 1 Timoteo 4:​13, 15.) E mafai foʻi ona tatou faatatauina lenā fautuaga. E faapefea? Ia mafaufau i ni auala e mafai ona faatumauina ai lo tatou “maelega i la le agaga,” pe faamalosia ai lo tatou naunau i la tatou tapuaʻiga. (Roma 12:11) O se faataʻitaʻiga, e mafai ona faaalu le taimi e sauniuni lelei ai mo sauniga. E fesoasoani lenā e tatou te uaʻi lelei ai i sauniga ma maua ai aogā. Pe a faia foʻi au lava suʻesuʻega, e mafai ona filifili se nofoaga toʻafilemu ina ia faigofie ai ona e manatunatu i mea e te aʻoaʻoina. Pe a faaauau ona tatou faia faapea, o le a faamalosia ai lo tatou talisapaia o le togiola faapea mea uma ua saunia e Ieova mo i tatou. A o lata atu foʻi i le Faamanatuga, o se mea lelei le manatunatu i ni faamanuiaga patino ua tatou olioli ai, ona o le avea o i tatou ma Molimau a Ieova. E fesoasoani lenā e faalolotoina atili ai lo tatou talisapaia o le togiola, lea ua mafai ai ona tatou maua se faiā vavalalata ma Ieova.

11-12. Pe a mou atu lou maelega i nisi taimi, po o lona uiga ua lē toe foaʻi mai e Ieova lona agaga paia iā te oe? (Tagaʻi foʻi i le ata.)

¹¹ Pe a mou atu lou maelega mo le tapuaʻiga, aua le lotovaivai pe mafaufau ua lē toe foaʻi mai e Ieova lona agaga paia iā te oe. Ia manatua le tusi a Paulo na avatu i Kerisiano i Korinito e faatatau i lana faiva: “E tusa po ou te lē faia ma le lotomalie, ua tuuina mai pea iā te aʻu le tiute tauave ia faataunuuina.” (1 Kori. 9:17) O le ā le uiga o le faamatalaga a Paulo?

¹² E iai taimi na mou atu ai le maelega o Paulo i lana faiva. E ui lava i na faalogona, ae na maumauaʻi pea o ia e talaʻi atu. Pe a mou atu foʻi lou maelega, ia maumauaʻi e faia le mea saʻo e tusa pe e leai se uunaʻiga e faia ai faapea. Ia tatalo mo le ʻfaanaunauga faapea le malosi e galue ai.’ (Fili. 2:13) Ia tausisi pea i lau faasologa faaleagaga. O le a iai se aafiaga lelei o na gaoioiga i ou faalogona, auā o le a toe faamalosia ai lou alofa mo Ieova faapea lou maelega.

13. E faapefea ona tofotofo pea po o tatou “iai i le faatuatua”?

¹³ Na taʻua e le aposetolo o Paulo i le 2 Korinito 13:​5, “Ia tofotofo pea iā te outou po o outou iai i le faatuatua; ia suʻesuʻe ifo pea iā te outou po o faapeʻī outou.” O lea, o se mea lelei le faia o se iloiloga faamaoni o i tatou lava, mai i lea taimi i lea taimi. O se faataʻitaʻiga, ia fesili ifo: ʻPo o oʻu faamuamua manaʻoga o le Malo i loʻu olaga?’ (Mata. 6:33) ʻPo o atagia atu i faafiafiaga ou te filifilia ou te ʻinoʻino i le leaga?’ (Sala. 97:10) ʻPo ou te saosaolaumea i le tausia o le filemu ma le autasi i le vā o uso ma tuafāfine?’ (Efe. 4:​2, 3) O le vaitaimi o le Faamanatuga, o se avanoa lelei lea e manatunatu ifo ai i na fesili. O le mafaufau i mea uma ua faia e Ieova ma Iesu mo i tatou, o le a uunaʻia ai i tatou e faaalia le talisapaia mo Ieova, ma ola mo Keriso ae e lē mo i tatou lava.c

MAMOE UA SĒ ESE

14. Aiseā ua sē ese ai nisi Kerisiano mai i le lafu?

¹⁴ O nisi Kerisiano ua lē toe auai i sauniga, e aofia ai i latou na auauna faamaoni iā Ieova mo le tele o tausaga. Aiseā? Ua lofitūina nisi i le “popole i mea o le olaga nei.” (Luka 21:34) O nisi foʻi atonu ua lē fiafia i se tala po o se gaoioiga na faia e se uso po o se tuafafine. (Iako. 3:2) Ae o isi, na latou faia ni agasala matuiā ma e matamumuli e talosaga atu mo le fesoasoani. E tusa lava po o le ā lava le māfuaaga ua e lē toe faatasitasi ai ma le faapotopotoga, ae o le ā se mea e mafai ona e faia? O le ā e uunaʻia oe e fai ona o le sauniuniga alofa o le togiola?

15. E faapefea ona iloa e manatu mamafa Ieova i ana mamoe ua sē ese mai i le lafu? (Esekielu 34:​11, 12, 16)

¹⁵ Ia manatunatu loloto i faalogona o Ieova e faatatau i ē ua sē ese mai i le lafu. O le mea moni e lē o galo i latou iā Ieova. Nai lo o lea, e na te faia taumafaiga uma e saʻilia ai ana mamoe ua leiloloa, fafaga i latou ma fesoasoani i ai e toe foʻi mai iā te ia. (Faitau le Esekielu 34:​11, 12, 16.) O le mea foʻi lenā e faia e Ieova mo oe. O lou faitauina o lenei suʻesuʻega, e faaalia ai o loo e naunau e faia le mea saʻo pe faafiafiaina le finagalo o Ieova. Pe afai na silasila Ieova i se mea lelei i lou loto ma tosina mai oe i le upu moni, o loo silasila foʻi la o ia i mea lelei e uiga iā te oe i le taimi lenei, ma e naunau ia e toe foʻi mai i lona aiga.

16. O le ā e mafai ona fesoasoani i se mamoe ua sē ina ia toe foʻi mai iā Ieova? (Tagaʻi foʻi i le ata.)

¹⁶ O loo taʻua i le polosiua Ia Toe Foʻi iā Ieova upu faalaeiau nei: “Ia e mautinoa o loo nofosauni Ieova e fesoasoani iā te oe a o e toe foʻi atu iā te ia. O le a ia fesoasoani iā te oe e faafetaiaʻia popolega, o faalogona tigā, ma maua le filemu o le loto ma le mafaufau ona o se lotofuatiaifo mamā. Atonu o le a uunaʻia ai oe e auauna iā Ieova faatasi ma ona tagata tapuaʻi.” Ia manatua foʻi, e matuā naunau toeaina e fesoasoani atu iā te oe. O i latou “o se lafitaga mai i le matagi, ma se mea e malu ai mai i timuga mamafa.” (Isa. 32:2) E mautinoa e te naunau e faaalia atu lou lototalisapaia mo le togiola. O lea ia fesili ifo: ʻO ā ni mea e mafai ona ou faia i le taimi lenei “ina ia faaleleia” ai le ma faiā ma Ieova?’ (Isa. 1:18; 1 Pete. 2:25) O se faataʻitaʻiga, pe e mafai ona e auai i se sauniga i le Maota mo Sauniga? Pe e mafai ona e talosaga atu i se toeaina mo se fesoasoani faaleagaga? E mafai ona ia faatulaga se tasi e faia lau suʻesuʻega mo sina taimi. Ia mautinoa, o le a faamanuia Ieova i taumafaiga uma o loo e faia ina ia faaalia atu lou lototalisapaia mo le togiola.

O LE A FAAPEFEA ONA E TALI ATU?

17-18. E faapefea ona tatou faaaogā tatau le taimi a o lumanaʻi le Faamanatuga o lenei tausaga?

¹⁷ Na fetalai Iesu, na auina mai o ia e saunia le togiola “ina ia lē fano tagata uma e faatuatua iā te ia, ae ia maua le ola e faavavau.” (Ioa. 3:16) O le togiola foʻi, ua mafai ai e Ieova ona laveaʻia i tatou mai i aafiaga o le agasala ma le oti. O lea, e lē tatau ona tatou manatu māmā i le togiola. (Roma 3:​23, 24; 2 Kori. 6:1) A o lumanaʻi le Faamanatuga, o se avanoa lelei lenā e tatou te manatunatu loloto ai i le alofa na faaalia e Ieova ma Iesu. O lenā alofa, e tatau ona uunaʻia ai i tatou e faaalia atu le lotofaafetai ma le talisapaia, mo mea uma ua la faia mo i tatou.

¹⁸ O lea, o le a faapefea ona faaalia atu lou lototalisapaia mo le togiola? Atonu e ese le auala e te faaalia ai le lototalisapaia mai i le auala e faaalia ai e isi. Peitaʻi ia mautinoa, o le a faamanuia Ieova i au taumafaiga faatasi ma taumafaiga a le faitau miliona o uso ma tuafāfine, “ina ia lē toe ola i latou mo i latou lava, ae ia ola mo [Iesu] o lē na maliu mo i latou.”—2 Kori. 5:15.