O se Suʻesuʻega Faale-Tusi Paia na Maua ai Isi Suʻesuʻega

Na aʻoaʻoina e Marta o se tasi o Molimau a Ieova i Kuatemala le gagana Kekchi, ina ia mafai ai ona talaʻi i tagata e tautatala i lenā gagana. I se tasi aso, na ia vaaia ai se tamāloa o tuua le falemaʻi. O foliga vaaia ma ofu o lenā tamāloa, na manatu ai le tuafafine e sau le tamāloa i se nuu o tagata Kekchi e tū i se vaega maugā lea e seāseā talaʻi ai Molimau a Ieova. Na faafeiloaʻi e le tuafafine le tamāloa ma talanoa i ai, e ui e itiiti lona iloa i le gagana Kekchi.

Na ofo e Marta i le tamāloa se suʻesuʻega faale-Tusi Paia. Na talia fiafia e le tamāloa ae na ia fai i le tuafafine e leai sana tupe e totogi ai. Na faamatala i ai e Marta, e lē totogiina le faia e Molimau a Ieova o suʻesuʻega a tagata. Na ia fai foʻi i ai e mafai ona latou suʻesuʻe ma lona aiga atoa i le telefoni, ma na talia e le tamāloa. Talu ai e iloa e le tamāloa faa-Sipaniolo, o lea na ave i ai e Marta se kopi O le Tusi Paia—O le Faaliliuga a le Lalolagi Fou i lenā gagana. Na tuu foʻi e Marta i le tamāloa se kopi o le tusi, O ā Aʻoaʻoga Moni a le Tusi Paia? i le gagana Kekchi. I le vaiaso na sosoo ai, na amata suʻesuʻe ai e Marta le Tusi Paia ma le tamāloa, o lana avā ma le la fanau e toʻalua i luga o le telefoni. E faalua i le vaiaso ona fai le suʻesuʻega. Na faapea mai Marta, “Ona e lē lelei laʻu faa-Kekchi, na matou suʻesuʻe ai i le gagana Sipaniolo ae faaliliu e le tamāloa i lona toʻalua le matou suʻesuʻega. E malamalama tamaiti i le faa-Sipaniolo.”

O lenei tamāloa, o se faifeʻau i lana lotu. Na amata ona ia aʻoaʻoina lana ʻaulotu i mea na ia aʻoaʻoina mai i lana suʻesuʻega Faale-Tusi Paia. Na fiafia le ʻaulotu i mea na aʻoaʻo ai i latou e le tamāloa, ma latou fesili i ai po o fea na ia aʻoaʻoina mai ai nei aʻoaʻoga fou. Ina ua taʻu i ai e le tamāloa na ia aʻoaʻoina mai i lana suʻesuʻega faale-Tusi Paia, na amata loa ona latou auai i le suʻesuʻega. E leʻi umi ae pe ā ma le 15 tagata na faapotopoto i vaiaso taʻitasi e suʻesuʻe le Tusi Paia ma Marta i le telefoni. Na latou tuuina se mea faaleoteleleo i tafatafa o le telefoni ina ia lagona ai e tagata uma le suʻesuʻega.

Ina ua faamatala e Marta i toeaina o lana faapotopotoga lana suʻesuʻega faale-Tusi Paia, na asiasi ai loa se toeaina i le nuu e nonofo ai tagata aʻoga. Na ia valaaulia i latou e auai i se lauga lautele e faia e se ovasia matagaluegaa i se nuu, e pe ā ma le itula e alu ai i le taavale ona savali lea mo le lua itula. Na talia e tagata aʻoga le valaaulia, ma e toʻa 17 i latou na auai.

I nai vaiaso mulimuli ane ai, na faaalu ai e le ovasia matagaluega ma isi Molimau a Ieova ni aso se fā e faalaeiau ai tagata aʻoga. I taeao, e latou te matamata ai i vitiō mai i le jw.org i le gagana Kekchi, ma latou suʻesuʻeina le polosiua O Ai o Loo Faia le Finagalo o Ieova i Aso Nei? I le aoauli, e latou te maimoa ai i ni vaega o le TV i le Initaneti a Molimau a Ieova. Na faatulaga foʻi e le ovasia ia tofu le tagata aʻoga ma le faiaʻoga o le Tusi Paia.

I na aso e fā, na talaʻi ai foʻi Molimau a Ieova i nuu tuaoi o tagata Kekchi ma valaaulia i latou i se sauniga faapitoa. I lenā sauniga, na valaaulia ai e uso i latou na auai e toʻa 47, ina ia fai ni a latou suʻesuʻega faale-Tusi Paia ma Molimau a Ieova. E toʻa 11 aiga na talia lenā valaaulia.

I masina mulimuli ane ai, na faatulaga ai e toeaina se sauniga e faia i faaiʻuga o vaiaso uma i le nuu lea na amata ai suʻesuʻega faale-Tusi Paia. I aso nei, e pe ā ma le 40 i latou o loo auai e lē aunoa i sauniga. Ina ua faamanatuina e uso le maliu o Iesu i lenā nuu, e toʻa 91 i latou na auai.

Pe a mafaufau i le auala na amata ai lenei talaʻiga ma iʻuga lelei ua oo i ai, na faapea mai ai Marta: “Ou te matuā faafetaia Ieova. E iai taimi ou te lagona ai e lē tele ni mea ou te mafaia. Ae e faaaogā i tatou e le Atua e fesoasoani i isi. E na te silafia lelei mea o loo i loto o nei tagata, ma na ia tosina mai i latou i ona tagata. E alofa Ieova iā i latou.”