Le Ofoofogia o Ave o le Fee

O loo galulue inisinia e fausia masini (robots) i le fausiaina o meafaigaluega e fesoasoani i fomaʻi e faia taotoga o maʻi, e ala i le faia o se tipi laʻitiiti i se vaega o le tino. O se tasi o meafaigaluega fou mo lenei galuega, ua fausia e ala i le kopiina o le fegauigauiaʻi o ave o le fee.

Ia Mātau: E mafai e le fee ona puʻe, uu ma oomi se mea i ona ave uumi ma fegauigauiaʻi e valu, i totonu o ni tamaʻi avanoa. E lē gata e mafai e le fee ona faavaivai ona ave, ae e mafai foʻi ona faamalō pe a manaʻomia.

E talitonu tagata suʻesuʻe e tāua foʻi le iai o se lima masini (robotic arm) e pei o ave o le fee, e fegauigauiaʻi ma vavai i le faia o taotoga o maʻi e ala i se tipi laʻitiiti i le tino. O lenei ituaiga o meafaigaluega, ua faafaigofie ai ona faia taotoga o maʻi, lea e semanū e faigatā le auala o le a faia ai.

Seʻi tagaʻi i le fegauigauiaʻi o ave o le fee

Ua uma ona fausia lenei lima masini (robotic arm) ma ua faaaogā e fai ai taotoga faataʻitaʻi. O lenei lima masini (robotic arm) e 135 milimita le umī, ma e mafai e se vaega o lenei lima masini (robotic arm) ona uuina se totoga faaeteetegatā e aunoa ma le faaleagaina, a o faia e le isi vaega o le lima le taotoga. E tusa ai ma faamatalaga a Dr. Tommaso Ranzani o se sui o le vaega na fausiaina lenei meafaigaluega, “e matou te talitonu, o le meafaigaluega lenei o le amataga o ni meafaigaluega fou ua faaleleia, ma e tele ona aogā.”

O le ā sou manatu? Pe na teʻi lava ua iai ave o le fee? Pe na foafoaina?