Ua Fesili mai Talavou . . .

Aisea ua Faaipoipo Uma ai Isi Seʻi Vaganā ai Aʻu?

“Maimau pe ana ua ou faaipoipo. Semanū ua ou fiafia.”—Cheryl.a

O SE uiga masani le manaoga o le fia faaipoipo. Sa tuu e le Atua i le tamaloa ma le fafine le fetosinaai faalenatura i le va o ituaiga. Ma sa ia faavaeina le faaipoipoga o se aufaatasiga tumau i le va o le tane ma le fafine.—Kenese 1:27, 28; 2:21-24.

O lea, e malamalama lava le tulaga atonu ua e lagonaina le lotovaivai pe ua tuulafoaia oe faapea e lē manao se isi ia te oe pe afai e te lei faaipoipo—ae maise lava pe afai o le toatele o au aumea ua uma ona faaipoipo. O uo e foliga mai e lelei o latou manatu e mafai ona faaopoopo atu ai i omiga. “O aʻu e 24 oʻu tausaga ma ou te nofofua, ma o le taimi nei e lē o iai se tasi o ma tuutala,” ua fai mai ai Tina. “Talu ai e foliga mai o tagata uma lava ua popole i loʻu lē faaipoipo ma ua māfua ai ona mafatia tele oʻu faalogona i lenei mea. Ua latou tuu ia te au le faalogona ua ou matua ua tuai ona ou faaipoipo ia po o le iai foi o se mea o faaletonu ia te au.”

O nisi tagata, o le nofofua ua mafai ona peiseai o se pa, se mea ua lē mafai ona aʻea, ua vavaeesea ai i latou mai le mauaina o le fiafia. I le tuanai atu o tausaga taitasi, atonu e lagona ai ua pei o se isi atu piliki ua faaopoopo atu i luga o lena pa. O le a amata e le talavou ona lagonaina faapea o ia, e lē aulelei po o le lē manaomia foi. Na fai mai se tamaitai talavou i Italia e igoa ia Rosanna: “Ou te lagonaina soo le faalogona o le tuuatoatasi ma le lē aogā; ua foliga mai ua leai se avanoa ou te faaipoipo ai.” E mafai foi ona iai na faalogona i tama talavou. Mo se faataʻitaʻiga, o Falani, na ia lagona e faapea o ana uo uma, ua avea ma ē e sili atu ona fiafia ma atamamai faalelalolagi ina ua uma ona latou faaipoipo. Sa amata loa ona ia tau mānatu po o le a faapena foi ma ia pe a ia faaipoipo.

Po o e mafaufau ea faapena? Afai o e nofofua, po o e tau mānatu i nisi taimi po o iai ea se mea o faaletonu ia te oe, ia pe atonu o le a faavavau ona iai pea i lenei olaga faanoanoa o le nofofua?

Faaipoipoga—Eseesega o Talafatu e Faatusatusa atu i Mea Moni

Muamua lava, seʻi o tatou iloiloina le talitonuga taatele faapea o le faaipoipo e faafuasei ona tatalaina ai le avanoa i le mauaina o le fiafia. E moni o le faaipoipo e mafai, ma i le tele o taimi, e saosaolaumea mo le fiafiaga o se tasi. Peitai, e lē faapea a faaipoipo loa ua maua e se tasi le fiafia. E oo lava i faaipoipoga e sili ona lelei e aumaia ai lava ni tulaga o le “puapuaga i le tino.” (1 Korinito 7:28) O le fiafiaga o le faaipoipoga e maua i le na o le faaauau ona e faataulagaina o oe lava, atoa ma le galue maumauai i ai. Seʻi manatunatu i le tagata silisili na soifua mai, o Iesu Keriso, o ia o se tasi sa nofofua. Pe sa mafai ona faapea atu se isi ia te ia sa lē fiafia? E leai! O lona olioli na maua mai lea i le faia o le finagalo o Ieova.—Ioane 4:34.

O le isi talafatu e faapea o le faaipoipo e mautinoa o le vaifofo lea o le tuuatoatasi. Ma le mautinoa e leai! Na faapea mai ma le faanoanoa se tasi o tamaloa Kerisiano faaipoipo: “E lē faatuatuaina aʻu e laʻu avā po o le faia o ni ma talatalanoaga uigā, e matuā leai lava!” O nisi o avā Kerisiano ua faitio mai faapea, e lē talanoa atu a latou tane ia i latou po o le foliga mai e sili le naunau i a latou galuega po o a latou uo nai lo i latou. E faanoanoa e faapea atu o le avea ma sē e faaipoipo ae lagonaina le tuuatoatasi o se mea ua masani ai.

O le isi vaega o i latou ia o ē manatu i le faaipoipoga o se ala e sola ese mai ai i faafitauli faaleaiga. Ua faapea mai se tasi o tamaitai ua faaipoipo: “Ou te manatu sa tatau ona tuu mai e oʻu mātua ia te au se avanoa ou te faamasani ai i le olaga. Peitai la te lei faatagaina aʻu e faia saʻu uo tama ia po o le alu atu foi mo ni evaevaga ma aʻu uo . . . Pe ana tuu mai e oʻu mātua se avanoa, oʻu te manatu ou te lē faaipoipo i le 16 o oʻu tausaga. Peitai sa ou manao e faaali atu ia i laua ua ou matua.”

Atonu e te lagona faapea o le olaga i le aiga ua faasāsā naua. Peitai o le faaipoipoga e aumai ai tiute tauave e mafai ona matuā faatapulaa ai le saʻolotoga o se tasi. Manatu i mea o loo aafia ai i le alu e faigaluega, totogia aitalafu, le faaleleia o mea ua leaga i le fale ma le taavale, kuka, faamamā, taina o lavalava, atonu ma le tausiaina o fanau! (Faataoto 31:10-31; Efeso 6:4; 1 Timoteo 5:8) O le toatele o talavou ua lē mautonu o latou mafaufau pe a fesagai ma nei tiute tauave e faia e i latou ua matutua.

O nisi ua talitonu e faapea o le faaipoipo o le ki lea i le mauaina o le naunau mai i ai o isi. Peitai e leai se faamautinoaga faapea o le a naunau mai isi ia te oe—ia po o lau paaga foi—ona talu ai ua e faaipoipo. O le a fiafia tagata ia te oe pe a e agalelei, matamau, ma lē manatu faapito, tusa lava pe ua e faaipoipo pe e te nofofua. (Faataoto 11:25) E ui lava e faigofie atu i se ulugalii ona auai faatasi ma uo ua uma ona faaipoipo, e tatau i le tane ma le avā ona manatua o i laua o le “tino e tasi.” (Kenese 2:24) O le mea sili e tatau ona la uaʻi atu i ai o le faapefea ona la faaleleia le la faiā—ae lē o le faiā ma a la uo.

Ua E Sauni mo le Faaipoipo?

Ioe, e ui ina e iloa le fetaui lelei o nei manatu, ae atonu e te lagonaina pea le faavaivai i nisi o taimi. O se alagaupu anamua ua faapea mai: “O le faamoemoe ua tuai ona taunuu e faanoanoa ai le loto.” (Faataoto 13:12) O le talavou o Tony, mo se faataʻitaʻiga, na ia iloa ua toeitiiti oo atu i se tulaga o le leai o se faamoemoe ona o lona nofofua. Sa amata ona ia lagona faapea ua ia sauni e faaipoipo atu i so o se tasi. O se teine talavou e igoa ia Sandra sa faapea ona ia maua le lotovaivai i taimi uma lava na te iloa ai ni faigauō fou; sa ia tau mānatu po o afea o le a oo mai ai sona avanoa.

A o lei faatagaina oe e paʻū atu i le loloto o tulaga mafatia, fesili ifo oe ia te oe lava, ‘Pe ua ou sauni moni lava e faaipoipo?’ O le mea moni afai o oe o se talavou, atonu o le tali manino lava, o le leai! I totonu o le Iunaite Setete, o le tele o faaipoipoga a talavou ua lē taulau i totonu o le lima tausaga.b Ioe, o nisi o talavou atonu ua talafeagai le matutua o o latou tausaga ma atonu e mafai ona iu lelei a latou faaipoipoga. Ae lē faapea ai o oe ua fetaui ma ua tatau ona e faaipoipo. Po ua e iloiloina ma le faamaoni pe ua e sauni e tauaveina tiute tauave o le faaipoipoga?

O le suesueina ma le faamaoni o oe lava atonu e faamaonia ai mea moni ua faaalia. Mo se faataʻitaʻiga, o le ā le matua ma le maufaatuatuaina o loo ia te oe? Pe e mafai ona e teuina tupe, pe e te faaalu i le taimi lava e te maua ai? Pe e te totogia au aitalafu i le taimi tonu? Po o mafai ona e taulimaina se galuega po o se auaiga? Pe e lelei lau faiā ma isi, pei o aumea i galuega ma mātua, pe o le tele o taimi e te feteenai ai ma i latou? Afai o lea, atonu o le a e iloaina o le faia o se faiā lelei ma se paaga faaipoipo o le a matuā faigata tele.

Afai o loo e iai pea i tausaga o le talavou, atonu o le a e iloaina faapea e te manaomia nisi tausaga o le poto masani ina ia e oo atu ai i le tagata matua, ua lava saunia mo le avea o se tane lelei ma se avā lelei. O le iloaina o lenei mea moni o le a fesoasoani ia te oe e toe fetuunai ai ou faamoemoega ma vaai i le faaipoipoga o se mea e fetaui mo le lumanai. Atonu e fesoasoani lea ia te oe ina ia ‘mau lou loto’ i lou tulaga nofofua, e pei ona iai i lenei taimi.—1 Korinito 7:37.

Sauniuniga Tatau

Ae faapefea, pe afai ua e talitonu ua mou atu ‘le tauosoosoga o le talavou’ ma lagona faapea ua e sauni e faaipoipo? E mafai ona faalotovaivaia pe afai e toaitiiti ni tagata e ono faaipoipo atu i ai po o le teena foi o oe i taimi uma lava e faailoa atu ai lou fiafia i se tasi. Ae pe e mafai ea ona uiga lenei mea faapea ua lē manaomia oe? E matuā leai lava. O le tupu o Solomona na matuā lē taulau so o se taumafaiga na ia taumafai i ai mo le teine talavou o lē sa ia alofa naunau i ai—ae o ia o se tasi e sili ona mauoloa, sili ona atamai, i lo se isi lava na soifua mai! O le ā le faafitauli? Sa leai se faalogona naunau alofa i le loto o le teine mo ia. (Pese a Solomona 2:7) O le mea lava foi lena e tasi, atonu e te lei feiloai atu lava i se tasi e te lua fetaui lelei.

Pe e te lagona ea faapea e te lē aulelei e ono tosina mai ai se isi? E moni, o foliga lalelei e iai mea e lelei ai ae e lē o mea uma. Pe a e mafaufau i ulugalii faaipoipo ua e iloa, pe lē moni ea o isi o i latou e eseese o latou maualuga, eseese fuaitino, eseese tulaga e fetosinaai ai? Manatua, o le tagata moni e mataʻu i le Atua o le a ia manatunatu muamua pe faapefea lou tulaga i le “tagata lilo o le loto.”—1 Peteru 3:4.

O le mea moni, o se mea e lē tatau ona faaleamanaia ou foliga vaaia; o se mea fetaui lou taumafai ia teuteu faalelei ou foliga. O le lē teuteua lelei o le faiga o lavalava ma foliga vaaia e mafai ona avatu ai i isi le manatu sese e uiga ia te oe.c I le ma lea foi, o le lē lava o ou tomai e talanoa ai po o le lē lelei o ou uiga o le a lē fiafia ai isi ia te oe a o lei oo ina latou iloa lelei oe. O se uo taʻumatuaina po o se matua, o le a mafai ona taʻu atu ia te oe pe o iai ni fetuutuunaiga manaomia i ia itu. O mea moni e uiga ia te oe atonu e tiga, ae o le taliaina o ia mea e mafai ona fesoasoani ia te oe e fai ai ni fetuutuunaiga, ma i lea o le a naunau mai ai isi.—Faataoto 27:6.

Peitai, i le iloiloga mulimuli, o lou aogā po o lou tāua o se tagata e lē faalagolago pe ua faaipoipo po o nofofua. O le mea moni e tāua, o le silasila a le Atua ia te oe, ma e ‘silasila o ia i le loto.’ (1 Samuelu 16:7) O le manatu e ao ona taulai atu i ai o le mauaina o le faamaoniga a Ieova ae lē o le faaipoipo. Taumafai ia aua neʻi faatagaina le faanaunauga fia faaipoipo e pulea ou manatunatuga ma au talanoaga. Mātau ma le faaeteete au aumea, filifilia o musika, ma faafiafiaga.

E moni, atonu o le a lē teʻa ese le faanaunauga fia faaipoipo, ae aua le popole. Ia maua pea le onosai. (Failauga 7:8) Nai lo le vaai i lou nofofua o se faasalaga, faaaogā avanoa uma ua aumaia e le saʻolotoga o le nofofua e auauna ai i le Atua e aunoa ma le tosina ese ai. (1 Korinito 7:33-35, 38) O le faaipoipo atonu e oo mai lava le taimi e fetaui ai ma oe—atonu e vave oo mai nai lo le mea o loo e manatu i ai.

[Faaopoopoga i lalo]

[Ata i le itulau 14]

E faigofie ona oo lagona o se tasi e pei ua tuulafoaia o ia pe afai ua faaipoipo uma ana aumea