Molimau a Ieova ua Faaleleia Atili ai Taotoga o le Fatu

SA FAAULUTALA mai e le Daily News a Niu Ioka ia Aokuso 27, 1995, le latou lipoti e faapea, “Taotoga e Lē Faaaogaina ai le Toto.” Sa ia faailoa mai e faapea, o le Falemaʻi o Cornell Medical Center i Niu Ioka, sa “ia faailoa mai se suiga tele o le auala e faia ai taotoga e suia ai le auala e tafe ai le toto i alātoto o le fatu (bypass)—o le taotoga lava lea e tasi sa manaomia ona faia talu ai nei i le Pulenuu sa iai muamua o David Dinkins—e aunoa ma le alu ai o se vaega tele o le toto.”

“I le faagaeeina i mea o loo faatāuaina e Molimau a Ieova,” sa faapea mai le pepa, “o le mea e ofoofogia ai lenei faiga fou . . . o le a faailoa mai lea i le faasaoina o le faitau afe o tālā e faaaluina mo falemaʻi, ma o le a faaitiitia moni ai le matautia o le faaleagaina o le toto o ē ua gasegase.” Sa faapea mai Dr. Todd Rosengart, o lē taʻitaʻia le polokalame mo le faia o taotoga, e lē faaaogaina ai le toto i lea falemaʻi e faapea: “Ua mafai nei ona matou faaitiitia le faaaogaina o le tuigā toto a o faia taotoga mai i le mea e masani ai o le lua i le fa iunite mo le tagata e toatasi i le leai o se mea o toe faaaogaina.”

Sa taʻua e Dr. Karl Krieger, o le fomaʻi e faia taotoga o fatu i le falemaʻi, o lē sa fesoasoani i le uluai faagaoioia o lea fuafuaga e faapea: “E ala i le aveesea o le manao atu mo toto e foai mai e nisi, ma le faaaogaina o ni vaega o le toto, ua matou faaitiitia ai foi lamatiaga pe a maeʻa taotoga i ni fiva ma faamaʻi e ono tulai mai, lea e masani ona fesootai atu i tuigā toto.”

O nisi o tagata atamamai ua faapea mai “o le lē faaaogaina o le toto i taotoga e suia ai le auala e tafe ai le toto i alātoto o le fatu, e faaitiitia ai le taimi e faaalu e uaʻi faapitoa atu ai i maʻi pe a maeʻa taotoga—mai i le 24 itula po o le sili atu, i le na o le ono lava itula. O maʻi sa filifilia mo taotoga e lē faaaogaina ai le toto, sa mafai ona toe faafoisia lo latou malosi ma teʻa i tua ma le falemaʻi e oo atu i le 48 itula e vave ai, nai lo i latou sa tuiina i ai toto.” O le uiga o lena mea o se faasaoina tele lea mo falemaʻi, le malo, ma kamupanī inisiua. Na mātauina e Dr. Rosengart e faapea “o lenei taotoga e mafai ona faasaoina ai e lē itiiti mai i le 1,600 tālā Amerika mo le tagata gasegase e toatasi.”

Sa faaauau ona lipotia mai e le Daily News:

“O se mea e uigaese, o le taotoga fou sa faataunuuina e lē ona o se manaoga faanatinati tau i le tamaoaiga po o le faafomaʻi, ae o faalogona maumaututū faaletapuaiga. O tagata o le Molimau a Ieova—o la latou talitonuga e faasā ai tuigā toto—sa saili atu se fesoasoani mo o latou tagata matutua ua aafia i le faamaʻi o le fatu. . . .

“Ona o le manaoga faanatinati o tagata o le Molimau a Ieova, ua tuufaatasia ai e fomaʻi a latou auala e faasaoina ai le toto ma vailaau fou. Sa latou mauaina se auala fou e faaaogā ai le latou masini faafomaʻi mo le fatu ma māmā lea e faaaogā e faaola ai pea i latou o gasegase a o faia taotoga o le fatu.

“I le faaopoopo atu i le 40 o maʻi Molimau a Ieova ua faia i ai muamua taotoga e lē faaaogaina ai le toto, i le ono masina ua tuanai sa faaaogā ai e le vaega i Niu Ioka ma Cornell lenei faiga mo tagata mamaʻi i le lautele. Sa taʻua e Krieger: ‘Talu mai lena taimi, sa latou faia ai ni taotoga se 100 e lē faaaogaina ai le toto, a o latou suia le auala e tafe ai le toto i alātoto o le fatu ma e aunoa ma se tasi na maliu.’ O le fua faatatau o le maliu ona o faiga masani o taotoga e suia ai le auala e tafe ai le toto i alātoto o le fatu e pe ā ma le 2.3%.”

I le lalolagi aoao, e 102 falemaʻi ua faaopoopo atu i ai polokalame mo taotoga e lē faaaogaina ai le toto i o latou falemaʻi, ma ua tatalaina atu ai nei taotoga ua sili ona malupuipuia, i le lautele mo tagata mamaʻi i le lalolagi aoao.