Ua Fesili Mai Talavou . . .

Pe Tatau Ona Ou Auai i se ʻAu Taalo?

“O LE Ā le tāua o le auai i se ʻau?” o le fesili lea mai se mataupu o le mekasini o le Seventeen. I le tali atu i ai ua taʻua e le mataupu e faapea: “O loo tou taufai taulai uma atu i se sini e tasi, ma e oo ina tou matuā masani lelei ai. E te aʻoaʻoina ai foi le tomai e galulue faatasi ai le tasi ma le isi, e pei o le auala e foia faatasi ai e se vaega ni faafitauli, le auala e feliuliuai ai manatu ma manatunatu ai, ma le auala e fetuutuunai ai i le faia o mea.”

O lea la, o le taalo i taaloga e faamaopopoina lelei e foliga mai e maua ai aogā, ae maise ai le mauaina o le mālie ma faamalosi tino.a Ua oo foi ina faapea mai nisi o le taaalo i ʻau taaalo e fesoasoani i le atiina aʻe o uiga moni o le tagata. Ua mauaina e se tasi talavou e taalo i le liki pesipolo le tagāvai, e faaupuina faapea, “Uiga Moni, Lototele, Faamaoni.”

Ae o le faafitauli, o taaloga faitele e lē masani pea ona ogatasi ma na faamoemoega mananaia. Ua faapea mai le tusi o le Kidsports: “O nisi talavou laiti ua faigofie ona taʻitaʻiseseina e aʻoaʻo le palauvale, e faaʻoleʻole, e tauaimisa, e taufaafefe, ma faatiga i isi.”

Ia Manumalo, e Tusa po o le ā le Taunuuga?

Sa taʻutino mai e se mataupu i le Seventeen e faapea: “E iai le itu e leaga ai taaloga, pe afai e faatāuaina naʻuā e tagata le manumalo.” O lenei tulaga e feteenai tuusaʻo lava ma upu a le Tusi Paia e faapea: “Aua neʻi avea i tatou ma ē mitamita vale, aua neʻi feluiai, aua neʻi felosiai.” (Kalatia 5:26) E ui o sina vaega itiiti o tauvaga faaleuo e mafai ona faaopoopo i le naunau ma le olioli i se taaloga, ae o se agaga e tumu i le faatavā e mafai ona mapuna aʻe ai le uiga faatauvā—ma aveesea ai le mālie o le taalo.

Ua taʻua e se tagata sa taalo lakapi a o iai i le aʻoga maualuga e igoa ia Jon e faapea: “O le faiaʻoga o le matou ʻau, o se tagata e ese le inainā: e masani ona ʻeʻe ma avau mai ia i matou . . . Sa ou matuā fefe ai pe a ou alu i toleniga. . . . Sa ou lagona e pei ua ou nofo i se nofoaga o faasalaga.” E ui e lē o faiaʻoga uma o ʻau e soona faia faapea, ae o le toatele lava latou te faamamafaina le manumalo. O upu faaiu a se tasi tusitala e faapea: “O le toatele o tagata taaalo . . . ua oo atu i se tulaga ua avea ai le agaga fiafia e tauvā ma avega mamafa ua lē mafai ona gafatia ina ia taulau manuia.” O le ā e mafai ona iu i ai?

Ua lipotia mai e le Science News se suesuega ua faaalia ai e faapea o tagata taaalo lakapi ma le pesipolo i kolisi, e “12 pasene ua lipotia atu le oo i ai o faafitauli e lē itiiti ifo i le lua vala mai vala e lima: o mafatiaga tau i le mafaufau, mafatiaga o le tino, le faigata ona alofia le faaaogaina o vailaau faasaina ma le ava malosi, le faaleagaina o le mafaufau ma le tino, ma le lē lelei ai ona fai meaaʻoga.” I le ogatasi ma lea mea, ua lipotia mai ai e le tusi On the Mark e faapea: “E toeitiiti o tagata uma e fesootai ma afeleti faitele ua ioe e faapea o loo iai se faafitauli tele i le faaaogaina sese o vailaau i taimi o taaloga.”

E Faagutugutulua ai i Tulaga Tau Amio

O le uunaiga e fia mālō e mafai ona faapogaia ai se talavou taalo ina ia faagutugutulua i tapulaa talafeagai o le lē faaituau ma le faamaoni. Ua mātauina e le tusi Your Child in Sports e faapea: “I taaloga i aso nei, o le manumalo ua lē gata ina lelei; ua na o le pau lena o le mea e taulia. O le faiaʻina e lē gata e lē lelei, ae o se mea e lē taliaina foi.”

O se isi mea moni e ese le faigata: E masani ona uunaia e faiaʻoga o ʻau a latou tagata taaalo ina ia faamanuʻa tagata o le isi ʻau lea o loo latou taaalo. Ua faapea mai se tasi o mataupu o le Psychology Today: “Ina ia e lelei i taaloga, e tatau ona e taalo leaga. O le talitonuga foi lena o le toatele o tagata taaalo afeleti, o faiaʻoga o ʻau, ma ē lagolagoina taaloga.” Ua faapea mai se tasi tagata taalo lakapi faapolofesa, o ona uiga i aso taitasi e “leo mālū, e magafagafa ma faaleuo.” Ae a oo atu i le malae taalo, e pei o ia o se sauai. I le faamatalaina o ona uiga pe a taalo i totonu o le malae, ua faapea mai o ia: “Ou te sauā ma lē pulea. . . . Ou te matuā lē alofa lava. E matuā leai soʻu faaaloalo i le tagata lea o le a ou faaoo lima i ai.” E masani lava ona faamalosia e faiaʻoga o ʻau le faia o na ituaiga o uiga.

Ua faalaeiauina e le Tusi Paia Kerisiano: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Pe e mafai ea ona e atiina aʻe na uiga pe afai o aso uma e uunaia ai oe e tuualaga faamalosiau e faaleaga, solipala, ma faamanuʻa le isi ʻau o loo tou taaalo? Ua taʻutino mai e Ropati e sefulu ono ona tausaga e faapea: “Ou te taalo i taaloga faitele. E te lē popole lava po o ai e afaina ia te oe, pau lava le mea ia e malo.” Ae nei la ua avea o ia ma Kerisiano papatisoina, ua suia ai ona manatu. Ua faapea mai o ia: “Ou te lē toe faia lava na mea.”

Pe o se Faamalositino po o le Faamanuʻaina o le Tino?

Aua foi neʻi galo, e iai lamatiaga faaletino. O le mea moni, o taaloga e aumaia ai lamatiaga e tusa lava pe na o le taaalo ma ni uo ina ia faafiafiaina ai. Ae e sili ai ona faateleina lamatiaga pe a aʻoina talavou ina ia taumafai e faatino o latou tomai i se tulaga e pei o se tagata taaalo faapolofesa.

Ua mātauina e le tusi Your Child in Sports e faapea: “E mafai foi ona manunuʻa tagata taaalo faapolofesa. Ae e tele lo latou tomai, matuā lava lo latou malosi, o ni tagata matutua o ē ua iloa ma malilie i ia lamatiaga ma mauaina ai ni totogi lelei mo le faia faapea. I le ma lea, e tele ina latou mauaina le ituaiga o toleniga faapitoa e sili ona lelei, o mea faigaluega e sili ona lelei, ma le tausiga faafomaʻi e sili lelei. . . . E lē maua e tamaiti i le aʻoga na manuia.” Ua faatonuina Kerisiano ina ia ‘tuuina atu o latou tino o se taulaga ola, paia, ma le mālie i le Atua.’ (Roma 12:1) Pe e lē tatau ea ona e manatunatu lelei pe tatau ona e tuu atu lou tino i lamatiaga lē aogā ma le lē tāua?

O Isi Vala e Manatunatu i Ai

E tusa lava pe foliga mai e itiiti ni lamatiaga i le soifua maloloina, e tumau pea ona tele le taimi e alu i taaloga faitele. O taimi o toleniga e lē gata ina faaitiitia ai lou taimi tafao ae e mafai foi ona faaaluina ai le tele o le taimi lea sa tatau ona faatulaga e te suesue ai ma fai au meaaʻoga. Na lipotia mai e le Science News e faapea o tagata taaalo afeleti i kolisi ua tauāu ina “maualalalo ifo o latou togi” nai lo isi tamaiti aʻoga ia latou te faia nisi matata faaopoopo i galuega a le aʻoga. O le mea e sili ona tāua, atonu o le a e iloa ai o le taalo i se ʻau taaalo e faigata ai ona e tuliloaina le mea lea e taʻua e le Tusi Paia “o mea e sili ona tāua”—o manaoga faaleagaga. (Filipi 1:10, NW) Ia fesili ifo ia te oe lava, ‘Pe o loʻu auai ea i le ʻau taalo e manaomia ai ona ou misia sauniga faa-Kerisiano, pe o le a faatapulaaina ai loʻu auai i le galuega talaʻi?’

Ia fuafua lelei foi, iuga e mafai ona oo i ai pe a faaaluina le tele o le taimi i talavou ma tagata matutua o ē e lē tutusa o outou manatu i tulaga tau amio tatau, o talanoaga mamā, po o le agaga tauvaga. Ae maise ai ua faapea mai le Tusi Paia, “o le feoai ma e amio leaga e leaga ai amio lelei.” (1 Korinito 15:33) Ia manatunatu, mo se faataʻitaʻiga, i se mataupu o loo i le itulau o tala faapitoa i le nusipepa o le The New York Times: “O potu e teu ai lavalava ma isi meatotino a le ʻau taaalo . . . o iina e talanoa ai tamaloloa e faatatau i itutino o fafine i ni faaupuga auiliili faaleituaiga, o iina latou te gugutu solo ai i a latou ʻai na maua i taaloga’ ma talasua ai e faatatau i le fasiga o fafine.” E mafai la faapefea ona e taulau faaleagaga pe afai e te filifili e iai i sea ituaiga o siomaga?—Faatusatusa i le Iakopo 3:18.

Faia se Faaiuga Poto

Pe ua e mafaufau ea e auai atu i se ʻau taalo? Atonu la o le a fesoasoani ia te oe manatu ua folasia e te muai manatunatu ai i aafiaga o le faia faapea. Ia manatunatu i loto fuatia ifo o isi pe a fai lau faaiuga. (1 Korinito 10:24, 29, 32) O le mea moni, e leai se tulafono e lē masuia e mafai ona fai, auā e eseese tulaga o mea i le lalolagi atoa. I nisi nofoaga atonu e manaomia ai e tamaiti aʻoga ona auai i taaloga. Ae afai e te masalosalo, ia talanoaina le mataupu faatasi ma ou mātua po o se Kerisiano taʻumatuaina.

E toatele talavou Kerisiano ua latou faia ni faaiuga faigata ina ia lē taaalo i ʻau taalo. E lē faigofie lenei mea pe afai o oe o se tagata taalo ma e te fiafia tele i taaloga! O omiga mai faiaʻoga o le aʻoga, o faiaʻoga o ʻau, ma mātua, e mafai ona faaopoopo atu i lagona lē fiafia. Ua taʻutino mai e le talavou o Simi e faapea: “O se tauiviga tele na ou faia ina ia ou lē taalo. O loʻu tamā lē talitonu o sē sa taʻutaʻua i taaloga afeleti i le vaitaimi a o iai i le aʻoga maualuga. O nisi taimi e matuā faigata lava ia te au loʻu lē iai i le ʻau.” E ui i lea, o le lagolagosua mai mātua talitonu ma Kerisiano taʻumatuaina i le faapotopotoga e mafai ona fesoasoani tele ia te oe e te pipii mau ai i lau faaiuga. Ua faapea mai Simi: “Ou te matuā faafetai lava i loʻu tinā. E iai taimi ou te faanoanoa ai ona o le uunaiga e fia taalo i taaloga. Ae e fesoasoani mai pea o ia e toe faamanatu mai ia te au oʻu sini aogā i le olaga.”

O taaloga fai ʻau e mafai ona aʻoaʻoina ai e tagata taaalo le felagolagomai ma le foiaina o faafitauli. Ae e tele avanoa e aʻoaʻoina ai na mea e ala i le galulue faatasi ma le faapotopotoga Kerisiano. (Faatusatusa i le Efeso 4:16.) O taaloga fai ʻau e mafai foi ona mālie, ae e lē tau manaomia ona e auai i se ʻau ina ia e olioli ai. O nisi taaloga e mafai lava ona olioli faatasi ai ma uo Kerisiano i tuafale o le tou fale pe i se paka e latalata ane. O tafaoga a aiga e mafai ona saunia ai nisi avanoa mo taaloga e lelei ma aogā. Ua faapea mai Greg, e 16 ona tausaga: “E sili ona lelei le taaalo faatasi ma isi mai lau lava faapotopotoga. E mālie, ma o loo e aufaatasi ai ma au uo!”

O le mea moni, o se taaloga e na o outou ma au uo atonu o le a lē maua i ai le naunau aasa lea e pei ona iai i se ʻau e fia malo. Ae aua lava neʻi galo, i sona tulaga e sili ona lelei “e itiiti le aoga . . . o le faamasani i la le tino; a o le amio Atua e aoga lea i mea uma lava.” (1 Timoteo 4:8) Ia atiina aʻe le tuutoina i le Atua, ona matuā avea moni ai lea o oe ma sē e manumalo i le silafaga a le Atua!

[Faaopoopoga i lalo]

[Faamatalaga faaopoopo i le itulau 26]

“O le faiaʻoga o le matou ʻau, o se tagata e ese le inainā: e masani ona ʻeʻe ma avau mai ia i matou . . . Sa ou matuā fefe ai pe a ou alu i toleniga”

[Ata i le itulau 27]

E masani lava, o faiaʻoga uma o ʻau latou te faamamafaina le manumalo—e tusa lava pe iu ai i le faamanuʻaina o isi