Onosaia le Faalavelave Matautia i le Malosi Mai ia Ieova

TUSIA E LE SUI O LE ALA MAI! I SEPANIA

IA FEPUARI o le tausaga na teʻa nei, e toatele i latou mai le faapotopotoga a Molimau a Ieova i Bailén i Sepania na fiafia faatasi i se aso matagofie i Mauga tulata ane o Sierra Nevada. Ae pe tusa toe tolu lava maila (5 kilomita) oo i lo latou aai, na sopoia ai e se taavale o agaʻi mai i le isi itu, le ituala lea na faimalaga atu ai la latou pasi, ma fetoʻai ai loa. Na pa le pasi, ma iu ai ina mu. Na lava le taimi na sosola ai nisi o le pasese, ae o le toatele o ē na i tua na momole i le asu ma maliliu ai.

I le aofaiga atoa, e toʻa luasefulu ono Molimau na maliliu, e aofia ai le toafa o faifeau sa auauna faataimi atoa ma ni nai tamaiti—e toetoe lava o le kuata lea o le faapotopotoga i Bailén. Na faaleo atu e le tupu o Sepania, o Juan Carlos, faalogona ootia o le toatele o tagata Sepania i lana feau faauaealesi na tusi atu i le pulenuu o Bailén e faapea: “Ua matuai faateʻia i le matuia o le faalavelave faafuasei. Ia talia mai la matou faamaisega. Faamolemole ia taʻu atu i aiga o ē ua maliliu o matou tiga alofa loloto ma la matou lagolagosua i nei taimi faanoanoa.”

O le fesili na i mafaufau o nisi o le toaafe o tagata na auai i le toe sauniga e faapea: “Aisea e tupu ai nei ituaiga o faalavelave matautia?” E manino lava, e aafia foi tagata o Ieova i faalavelave faafuasei ona “o le tausaga ma le mea e tupu ai,” e pei ona aafia ai tagata uma. (Failauga 9:11, 12) Peitai, ua folafola mai e Ieova ua toeitiiti ona aveesea lea o nei ituaiga o faalavelave matautia.—Faaaliga 21:4, 5.

O le toatele o tagata o le aiga Peteli a Molimau a Ieova i Sepania ma le faitau afe o Molimau mai isi vaega o le atunuu, sa latou faimalaga atu e faamafanafana ma lagolagoina uso i Bailén. O tagata Bailén, atoa ai ma taʻitaʻi o lena nuu ma le itumalo, na faavauvau foi faatasi ma aiga Molimau. O le toatele na faagaeetia ona o le loto tetele o Molimau loto mafatia.

Na faapea mai le pulenuu o Bailén o Antonio Gómez: “Ua ou masani i Molimau mo le tele o tausaga, ma ou te viiviia tele la outou lotu e ui lava o aʻu o se tagata e talitonu e lē mafai ona tatou iloa le Atua. Ina ua tupu mai le faalavelave, na vave lava ona ou iloa o le a sili atu ona outou onosaia lenei faalavelave matautia pe a faatusatusa atu i isi lotu, ona o le autasi o le tou lotu ma ona tagata. Ua ou vaaia le lagolagoina o aiga faavauvau e le aai atoa. O le taimi muamua atonu na faauiga sese ai e tagata o outou uiga moni ma aʻoaʻoga tou te tausisi i ai, ae ou te fiafia e faapea atu ua lē o toe iai na manatu sese. Ua ia te outou le malosi lilo e sau mai totonu e faigata ona malamalama i ai se tagata e lē o se Molimau.”

Na taʻutino mai e le minisita o galuega o José Borrell, o lē na fai ma sui o le malo o Sepania i le toe sauniga e faapea: “O ā ni upu faamafanafana e mafai ona e avatu i ē ua maliliu faatasi uma tagata o o latou aiga i se faalavelave matautia faapea? E lē sili atu se faamafanafanaga e mafai ona avatu e se tasi nai lo faamafanafanaga ua latou talitonu i ai. . . . E ese le mataina o lo outou talitonuga.”

ʻIa Outou Fefaamafanafanai’

O ā “faamafanafanaga ua latou talitonu i ai”? E silisili i lo o mea uma lava, na latou mauaina le faamafanafanaga mai ia Ieova, “o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava.” (2 Korinito 1:3, 4) E ui i lo latou tulaga faavauvau, ae na latou maua le malosi e faamafanafana ai le tasi i le isi, i le teulotoina o upu a Paulo i tagata Tesalonia e faapea: “O lea ia outou feapoapoai ai, ma ia fefaamafanafanai.”—1 Tesalonia 5:11.

Na lagona le faamomoiloto i le vaai atu i uso ma tuafāfine Kerisiano, o isi e pe ā ma le toavalu o latou aiga na maliliu, o loo ō atu e asiasi i tagata o le faapotopotoga o loo mafatia. Na faamatala mai e le ovasia taʻimua o Francisco Saez, o lē na maliliu uma ona alo e toalua e faapea: “Na matou fetagisi i le taimi na matou feiloai ai. Ae na matou manatua le faamoemoe o le toetu a o matou fetagisi, ma na faamafanafanaina ai i matou.”

Na faaauau le tautalaga a Francisco e faapea: “Matou te lei faapalapala i la matou galuega talaʻi, ma na faia sa matou taumafaiga faapitoa e asiasi atu i aiga o ē ua maliliu e lē o ni Molimau, ma le polosiua Pe a Maliu se Tasi e Pele i a te Oe.” Na toe faapea mai Francisco: “Ia aʻu lava ia, na ou naunau e talaʻi, auā ou te iloa o le talaʻi atu i isi e faaleleia ai oʻu faalogona. Ma le mautinoa, e ui lava na ou tagi ma ou alu, ae na ou toe foi i le fale ua faamafanafanaina.”

Na talia ma le fiafia e tagata Bailén le galuega talaʻi. Ina ua mavae le vaiaso talu ona tupu le faalavelave, na asiasi atu ai Encarna, o sē o loo faavauvau ona ua maliliu lana fanau teine e toalua ma fanau a ana fanau e toafa, i se fafine na faatoʻā amata lana suesuega faale-Tusi Paia. Na avatu e Encarna faamafanafanaga mai le Tusi Paia i lea fafine, o lē ua atoa nei le fa o masina talu ona maliu lana tane. A o faaauau le la talanoaga i le polosiua Pe a Maliu se Tasi e Pele i a te Oe, sa faapea mai o ia: “O le taimi nei ua tau fai faamafanafana e le tasi le isi.”

Na vave ona lagolago mai le auuso i le lalolagi aoao. Ua faapea mai Francisco Capilla o lē e failautusi i le faapotopotoga: “Ua matuā faalaeiauina uma le faapotopotoga ona o le faitau afe o tusi ma feau faauaealesi na matou mauaina. Na faaaogā e le falemeli se taavale e pei o se tamai pasi (van) e momoli saʻo mai ai tusi i lo matou fale i aso uma. Ua matou loto faafetai tele i le manatunatu alofa mai o uso.”

Mauaina le Faamoemoe Ona o le Faalavelave Matautia

Pe ua iai se iuga lelei ua maua mai i lenei ituaiga o faalavelave matautia? Ua tusia faapea e le tupu anamua o Solomona: “O le loto o le tagata poto ua i le fale o i ai le faanoanoa.” (Failauga 7:4) I le ogatasi ma lenei mataupu silisili, o le faalavelave matautia i Bailén ua uunaia ai nisi o tagata e mafaufau atili i la latou faiā ma le Atua. Na taʻu atu e Faustino, i lana avā o Dolores, o se tane lē talitonu na maliliu ona alo e toalua i le faalavelave e faapea: “E iai saʻu tala manaia o loo fia taʻu atu ia te oe. O le a amata laʻu suesuega faale-Tusi Paia, auā ou te fia vaai i laʻu fanau i le lalolagi fou.”

E ui lava e tuai ona faaleleia faalogona faavauvau o o tatou uso ma tuafāfine i Bailén, ae o loo latou mauaina le faamafanafanaga ma o loo faamafanafana atu foi i isi. O loo faamalosia i latou e Ieova e ala i lona agaga faapea foi ma le lagolagosua a le toatele o o latou uso ma tuafāfine agalelei. Ia faaauau ona avatu a tatou talosaga i lo tatou Tamā faalelagi mo i latou.

[Ata i le itulau 28]

O le toafa o ē na maliliu