O Lē Fea Tapuaiga e Faamaonia e le Atua?

O LE mea e faanoanoa ai, o le feitagai o lotu i Falani i le senituri e 16 e lei uma ai iina. I le senituri na sosoo atu i ai, na matuā vaeluaina ai Europa i le faailogatagata, a o amata ona toe fetauai ia tagata Katoliko ma tagata Porotesano i le vaitaimi o le Taua e Tolusefulu Tausaga (1618-1648). I le suafa o le Atua, sa toe amata ai foi ona fefasiotiai tagata o ē na faapea mai o i latou o Kerisiano.

E lei taofia lava le feitagai ma le fefasiotiai o lotu. Talu ai nei foi na fefasiotiai ai tagata Katoliko ma tagata Porotesano i Aialani, ma o loo fai e tagata Orthodox ma le Katoliko Roma le mea lava lena e tasi i le oganuu lea sa taʻua muamua o Yugoslavia. Ae o le mea atonu e faigata ona talitonuina, i le Taua Muamua ma le Taua Lona Lua a le Lalolagi, na fasiotia ai e Katoliko ma Porotesano le faitau selau o afe o tagata o a latou lava lotu i tafā o le taua. Pe e tautonuina ea lenei fefasiotiaiga? O le ā le silafaga a le Atua?

Taumafaiga Ina ia Tautonuina

Na taʻua e le 1995 Britannica Book of the Year e faapea: “Sa taumafai le tele o vaega eseese o tagata lotu i le 1994 e tautonuina faiga sauā e faapea ua o se mea talafeagai.” I le sili atu i le 1,500 tausaga talu ai, na fai ai foi se taumafaiga faapena a le faifilosofia Katoliko o “Sagato” Aukusotino e tautonuina ia fasiotiga tagata. E tusa ai ma le New Catholic Encyclopedia, o ia na “pogai mai ai le manatu e iai taua e tautonuina,” ma ua matauina e lea tusi e faapea o ona manatu ua ‘aumai ai se aafiaga e oo mai lava i aso nei.’

Ua manatu māmā, ma oo lava ina faaauilumaina ma faamamaluina e lotu Katoliko, Orthodox, ma Porotesano le manatu, o loo fasioti i le suafa o le Atua. Ona e faamasaatoto le talaaga o nei lotu, e faapena foi ma le tele o isi lotu iloga o loo iai i le lalolagi. E faapefea la, ona e matauliaina tagata o loo faia le tapuaiga moni?

E lē lava le tau ina faalogo atu i mea ua latou faapea mai latou te talitonu i ai. E faatatau i lenei tulaga, na lapatai mai Iesu Keriso e faapea: “Ia outou ma perofeta pepelo, o e o mai ia te outou i ofu faamamoe, a o totonu o luko feai lava i latou. Tou te iloa i latou i o latou fua. . . . E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. . . . O laau uma e le fua mai i fua lelei, e taia ia ma lafoina i le afi.” (O upu faasisipa o a matou ia.)—Mataio 7:15-20.

Iloa i o Latou Fua

E faitau miliona tagata loto faamaoni ua matauina e faapea o lotu a le lalolagi o ‘laau leaga’ ia ua fua maia “fua leaga,” e faapitoa lava i lo latou faia o taua faamasaatoto. O loo faamatalaina i le Tusi Paia le emepaea o lotu sese e faapea o se fafine talitane faaleagaga e taʻua o “Papelonia le Aai Tele.” Ua taʻua e le Tusi Paia e faapea “ua iloa foi ia te ia le toto o perofeta ma le au paia, ma i latou uma ua fasiotia i le lalolagi.”—Faaaliga 17:3-6; 18:24.

O lea la, nai lo le faamaoniaina o taua ia o loo faamanuiaina e taʻitaʻi lotu, ua lē o toe umi nei ae aumai e le Atua le faasalaga faafaamasinoga i lotu ia o loo fasiotia tagata i lona suafa. O le a ia faia lenei mea ina ia faataunuuina ai le valoaga a le Tusi Paia lea o loo faapea mai: “E faapea ona lafotuina o Papelonia le aai tele, e le toe iloa lava.” Pe a oo ina tupu lenei mea e fiafia ai, ona gaoioi loa lea o le Atua e “faasalaina e ia le fafine talitane e sili” ma “taui atu ia te ia lava le toto o ana auauna.”—Faaaliga 18:21; 19:2.

O tagata o ē o loo ʻinoʻino ma lē fiafia i fasiotiga tagata uma o loo fai nei, e ono tau mānatu pe o iai moni ni Kerisiano o ola e talafeagai ma le valoaga a le Tusi Paia e faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) Pe e te silafia ni tagata matataʻu moni i le Atua ua lafoaia taua?

Le Tapuaiga e Faamaonia e le Atua

I se suesuega i le vafealoai na taʻua o le “More About Justifying Violence” (O Faamatalaga i le Tautonuina o Faiga Sauā), na lolomia e le iunivesite o Michigan, na taʻua ai e faapea: “Talu mai le amataga o le senituri, o loo faaauau ai pea e Molimau a Ieova lo latou ‘Solitu Faa-Kerisiano’ o le lē auai i faiga sauā, i taimi o taua iloga e lua a le lalolagi sosoo mai ai ma le vaitaimi o fetauaiga faavaegaʻau i le ‘Taua Faaupufai.’” Ina ua faamatalaina le mafuaaga o le solitu o Molimau, fai mai le suesuega na fai: “O aʻoaʻoga a Molimau a Ieova e faavae mai i lo latou talitonuga o le Tusi Paia o le afioga faagaeeina a le Atua.”

Ioe, e ola Molimau a Ieova e tusa ai ma le Tusi Paia, lea e aʻoaʻo mai e faapea: “O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso. . . . Ia tatou fealofani. E le pei o Kaino, na fasioti foi i lona lava uso.”—1 Ioane 3:10-12.

E masani ona faasino atu e Molimau a Ieova manatu o tagata agaʻi i le faamasaatoto o lotu a le lalolagi o loo iai. Latou te faaleoina atu foi le valaau faanatinati a le Tusi Paia ua faapea mai: “Loʻu nuu e, ia outou o ese ia te ia [Papelonia le Aai Tele], ina neʻi faatasia outou i ana agasala, ina neʻi tofusia foi outou i ona mala; auā ua paʻi atu ana agasala i le lagi, ua manatua foi e le Atua ana amioleaga.”—Faaaliga 18:4, 5.

E toatele tagata faamaoni ua latou utagiaina le valaau ina ia lafoaia le emepaea o lotu sese a le lalolagi. Afai o aafia loloto oe ma e lē fiafia i fasiotiga tagata uma o loo fai i le igoa o lotu, matou te valaaulia oe e faafesootai le tagata na avatua lenei mekasini ia te oe po o le tusi mai i se tasi o tuatusi o loo taʻua i le itulau e 5. O le a fiafia Molimau a Ieova e fesoasoani ia te oe e suesueina e uiga i le folafolaga a le Tusi Paia e faatatau i se lalolagi fou amiotonu, lea o le a lē toe iai ni taua.—Salamo 46:8, 9; 2 Peteru 3:13.

[Ata i le itulau 24]

“Ua latou taʻu ane ua latou iloa le atua, a e faafiti ia te ia i a latou galuega.” Tito 1:16