Le Taimi e Toe Maua ai le Faamoemoe ma le Alofa
UA ILOA e mātua, o faiaʻoga, ma isi o loo feagai ma talavou matutua le lē mafaia e i latou po o talavou po o so o se isi lava tagata ona suia le lalolagi. O loo gaoioi malosiaga leaga e pei o ni galulolo, e leai se isi e mafai ona taofia. Peitai, e tele mea e mafai e i tatou uma ona fai e saosaolaumea ai i le mauaina e talavou o le fiafia, soifua maloloina lelei, ma se olaga solo lelei.
Ona e sili le puipuia i lo le tau togafitia, e ao ai i mātua ona mafaufau lelei e faatatau i ituaiga soifuaga o loo latou ola ai ma mea o latou faamuamuaina e ono aafia ai uiga ma amio a a latou fanau. O le saunia o se siomaga alofa ma manatu mamafa atu i fanau i totonu o le aiga, e avatu ai le saogalemu lea e mafai ona alofia ai le maua i amioga e faaleagaina ai e le tagata ia lava. O se tasi o manaoga sili o le au talavou e ao ona faafetaiaia, o le iai lea o se tasi e faalogo atu ia i latou. Afai o le a lē faalogo atu mātua, e ono faalogo mai tagata o ē e lē o ni faataitaiga lelei.
O le ā le uiga o lena mea mo mātua i aso nei? Ia faaalu se taimi ma lau fanau pe a latou manaomia—a o laiti i latou. Mo le tele o aiga, e lē faigofie lenei mea. O loo latou tauivi e saunia mea manaomia o le soifuaga, ua leai ai se mea e mafai e mātua ae ua tatau ona faigaluega uma. O i latou ua loto malilie ma mafai ona faia ni faataulagaina ina ia faaalu ai se taimi tele ma a latou fanau ua masani ona seleseleina mai le taui o le vaai atu i o latou atalii ma afafine ua taulau manuia i le olaga. E ui i lea, e pei ona uluai matauina, o nisi taimi e ui i ni taumafaiga sili i le vaega a mātua, ae mafai lava ona aliae ni faafitauli matuia i a latou fanau.
E Mafai e Uo ma Isi Tagata Matutua Ona Fesoasoani Atu
O taua, toso teine, ma le faileagaina o talavou ua manaomia ai ni taumafaiga e sili atu mai tagata matutua o loo alolofa moni, ina ia faaleleia āuga leaga o nei mea na aafia ai i latou. O talavou ua faaleagaina i na faiga lē lelei atonu e lē tali lelei atu i taumafaiga e fesoasoani ai ia i latou. E ono manaomia ai le faaalu o le tele o lou taimi ma au taumafaiga. O le mea moni, e lē o se mea poto pe e lē o se alofa foi le taʻufaatauvaaina o i latou po o le teena o i latou. Pe mafai ona iai se avanoa i o tatou faalogona ootia e faaali atu ai le agalelei ma le alofa moomia ina ia mafai ona aapa atu ia maua mai i latou ua lamatia ola?
E lē gata i mātua ae oo foi i uo ma isi tamaiti laiti i le aiga, e manaomia ona matuā mataalia e mātau so o se faanaunauga o i talavou e faapea ona ono aliali mai ai se tulaga faaeteetegata ma se tulaga e foliga mai ai ua lē paleni faalogona. (Tagai i le pusa “Manaomia Fesoasoani Agavaa,” itulau 8.) Afai ua iai ni faailoilo, ia vave ona uaʻi atu. Afai e mafai, taumafai ia tatala mai manatu o talavou o iai ni faafitauli e ala i ni fesili agalelei ina ia faamautinoa ai ia i latou lou naunau moni faaleuo. Atonu e mafai e uo ma tauaiga maufaatuatuaina ona lagolagosua i mātua i le taulimaina o tulaga faigata; peitai, o le mea moni, e ao ona latou faaeteete ina ia aua neʻi o latou faoa le matafaioi a mātua. O le tulaga masani lava o āuga o le fia pule i le ola o talavou, o se taumafaiga faatauanau mo le uaʻi atu—le uaʻi atu o mātua.
O se tasi o meaalofa aupito sili e mafai e so o se tasi ona avatu i talavou o se faamoemoe mausalī lea mo se lumanai fiafia, se uunaiga ia naunau mo le ola. O le toatele o talavou ua oo ina latou iloa le moni o folafolaga a le Tusi Paia i se faiga o mea sili atu ona lelei i le lalolagi e lē o toe mamao ae oo mai.
Faasaoina Mai le Pule i le Ola Semanū e Oo i Ai
Ua faapea mai se tasi tamaitai talavou i Iapani, o lē sa masani ona mafaufau e pule i le ola: “E tele taimi na ou faanaunau ai e fai lena mea. A o oʻu itiiti lava, sa faaleagaina ai aʻu faaleituaiga e se tasi ou te faatuatuaina. . . . I taimi ua mavae, ou te tusia ai ni faamatalaga pupuu se tele ua galo ia te au le aofai e faapea, ‘Ua ou fia oti.’ Talu mai lena taimi ua avea aʻu ma Molimau a Ieova, ma ua ou auauna nei o se faievagelia faataimi atoa, ae e oo mai lava lea uunaiga ia te au mai lea taimi i lea taimi. . . . Peitai ua faataga e Ieova aʻu ou te ola pea, ma e foliga mai o loo ia musumusu mai ia te au, ‘Ia e ola pea.’”
Na faamatala mai e se teine e 15 tausaga le matua mai Rusia e faapea: “Ina ua valu oʻu tausaga, na amata ai ona ou lagona e leai se isi e manaomia aʻu. Sa leai se taimi o oʻu mātua e talanoa mai ai ia te au, ma na ou taumafai lava aʻu ia e foia oʻu faafitauli. Sa ou faaesea aʻu lava mai isi. Sa masani ona matou tauupu ma oʻu tauaiga. Ona oo mai lea i loʻu mafaufau le pule i le ola. Ae maeu se fiafia na oo ia te au ina ua matou feiloai ma Molimau a Ieova!”
I Ausetalia, ua maua mai ai manatu faalaeiau nei mai ia Cathy, faatoʻā 30 ma ona tupu nei ona tausaga, e faaalia ai e mafai i tulaga mafatia ona suia ma maua ai le faamoemoe: “Sa lē aunoa ona ou mafaufau i auala eseese e faauma ai loʻu ola ma mulimuli ane oʻu taumafai e pule i loʻu ola. Na ou fia sola ese mai lenei lalolagi, ua tumu i tiga, le ita, ma le leai o se mea lelei e maua mai ai. O le loto mafatia na faafaigata ai ona ou alu ese mai se ‘tulaga e pei o i totonu o se faamoega apogaleveleve’ sa ou lagona na saisaitia ai aʻu. O lea, o le pule i le ola na foliga mai o le tali lea i lena taimi.
“Ina ua ou muai faalogo e uiga i le mafai moni ona avea le lalolagi ma parataiso, faatasi ai ma se olaga filemu ma fiafia mo tagata uma, sa ou faananau moni atu loa i ai. Peitai sa foliga mai e na o se miti e lē moni. E ui i lea, na faasolo ina amata ona ou malamalama i le silafaga a Ieova i le olaga ma le matuā tāua o i tatou taitoatasi i ona fofoga. Na amata ai ona ou lagona le mautinoa e faapea o loo iai se faamoemoe mo le lumanai. O le iuga, na ou maua ai le ala e sao ese ai mai lena ‘faamoega.’ Peitai, na iloa foi le lē faigofie ona alu ese mai. E iai taimi e lofia ai lava aʻu i le loto mafatia, ma ou lagona ai le matuā fenuminumiai. Ae, o loʻu taulai atu ia Ieova le Atua, na mafai ai ona ou matuā faalatalata atu ia te ia ma lagona ai le saogalemu. Ou te faafetai ia Ieova mo mea uma ua ia faia mo aʻu.”
Lē Toe Maliliu Talavou
E ala i le suesueina o le Tusi Paia, e mafai ai e se tagata talavou ona oo ina iloa e faapea o loo iai se mea e sili atu e mafai ona tepa taulai atu i ai—le mea ua taʻua e le aposetolo Kerisiano o Paulo o “le ola moni.” Na ia fautuaina le taulealea talavou o Timoteo e faapea: “Ia e matuā fai atu i e mauoa . . . aua foi le faamoemoe i le oloa e faaletumau, a o le Atua soifua, o loo foai tele mai ia te i tatou mea uma lava e faafiafia ai. Ia latou agalelei atu, ia tamaoaiga i galuega lelei, . . . ia faapea ona latou teua oloa mo i latou lava, o le faavae lelei mo aso atali, ina ia latou fetagofi atu i le ola moni lava.”—1 Timoteo 6:17-19.
O le uiga moni o le fautuaga a Paulo, e tatau ona tatou faaaofia ai ma isi tagata, fesoasoani atu ia i latou ina ia latou maua se faamoemoe mausalī mo le lumanai. O “le ola moni,” o le folafolaga lea a Ieova i lana “lagi fou ma le lalolagi fou.”—2 Peteru 3:13.
O le toatele o le au talavou o ē na lamatia o latou ola ua oo ina malamalama e faapea, o le faaleagaina e vailaau faasaina ma ola i olaga lē mamā tau amio e matuā leai se uiga ae ua na o se ala umi ma le piopio e agaʻi atu i le oti, o lea o le pule i le ola o se ala puupuu e vave taunuu atu ai i le oti. Ua oo ina latou iloa o lenei lalolagi, faatasi ma taua, feitagai, o amioga matagā, ma ala lē alofa o loo iai, o le a lē o toe mamao ae mavae atu. Ua latou aʻoaʻoina e faapea o le faiga o mea o lenei lalolagi, ua lē toe mafai ona toe faaleleia. Ua latou aveina i fale le manatu e faapea o le Malo o le Atua, e na o le pau lea o le faamoemoe moni, auā o le Malo lea o le a faaoo maia se lalolagi fou lea e lē gata o talavou ae atoa foi ma tagata usiusitai uma o le a lē toe maliliu lava—e oo lava i se toe fia oti o le a leai lava.—Faaaliga 21:1-4.
[Pusa i le itulau 8]
Manaomia Fesoasoani Agavaa
Ua faapea mai le tusi The American Medical Association Encyclopedia of Medicine “e sili atu i le 90 pasene o pule i ola, e māfua ona o maʻi tau le mafaufau.” O loo lisi mai ai maʻi ia e pei o le matuā loto mafatia (e tusa ma le 15 pasene), faavalemalosi ua lē sagatonu le mafaufau (schizophrenia) (e tusa ma le 10 pasene), le faalagolago atu i le ava malosi (e tusa ma le 7 pasene), faaletonu o uiga totino i le musu e faatasitasi ma tagata (e tusa ma le 5 pasene), ma isi maʻi o le mafaufau e māfua ai le fefevale ma le popole tele (e itiiti ifo i le 5 pasene). Ua fautua mai le tusi: “O taumafaiga uma lava ia pule i ola e tatau ona faafoeina ma le matuā manatu mamafa i ai. E luasefulu i le 30 pasene o tagata o ē taumafai e pule i ola e toe taumafai foi e pule i ola a o lei atoa le tausaga.” Ua tusi mai faapea Dr. Jan Fawcett: “E sili atu i le 50 pasene o pule i ola [i le Iunaite Setete] ua tupu i tagata taitoatasi latou te lei faafesootaia lava se fomai faapitoa o le mafaufau.” Ma ua fai mai foi se isi faamatalaga: “O le vala pito sili ona tāua o le togafitiga, o le alu o le tagata maʻi e vaai se fomai faapitoa tau le mafaufau i le vave e mafai ai ina ia fesoasoani e foia le loto mafatia.”